Il cussegl grond ha refusà l'urgenza da la dumonda qua avant maun sin proposta da la conferenza da las presidentas e dals presidents ils 4 da december 2012 (cf. PCG 2012/2013; 473, 475, 531). La regenza prenda posiziun en il rom dal termin ordinari per tractar la dumonda da la fracziun da la PLD sco suonda:

La communicaziun a las medias da la regenza dals 3 da december 2012 stat en connex cun la disposiziun relaschada da la cumissiun federala da las OPA dals 13 da november 2012 tar la dumonda dal chantun Grischun e da l'Axpo sco acziunaris principals da la Repower. Cun la dumonda han giavischads il chantun e l'Axpo – en il rom da la transacziun intenziunada – da constatar, sche l'obligaziun da purschida existia envers las acziunaris ed ils acziunaris da minoritad resp. da conceder in'excepziun da l'obligaziun da purschida tenor la legislaziun da la bursa. Motiv per la communicaziun a las medias menziunada è stada l'ordinaziun da la OPA che la publicaziun da la posiziun dal cussegl administrativ da la Repower davart la transacziun – ensemen cun il dispositiv da la disposiziun da la OPA – ed il renviament al dretg da protesta stoppian vegnir fatgs immediatamain suenter la publicaziun da la suttascripziun dal contract da cumpra d'aczias e la publicaziun da la disposiziun da la OPA. La chaussa è cumplexa e pervia da motivs dal dretg da la bursa e dal dretg dals cartels èsi schizunt stringent che betg tut ils detagls da la transacziun na pon vegnir fatgs publics.

Tar lur dumonda communabla a la OPA han menziunads il chantun e l'Axpo che las aczias cumpradas da mintgamai 12,3 % (structura da transiziun) na duain betg vegnir prendidas si permanentamain en lur portafegls, mabain vegnir transferidas a curta fin a mesa vista per grondas parts (min. 15,6 % fin max. 21,4 %) ad in nov partenari strategic (acziunari substitutiv) sco proprietad (structura da mira). Latiers planisescha il chantun da surpigliar da sia part d'aczias cumprada da nov da 12,3 %, fin 3 % permanentamain en ses agen effectiv. Fin 6 % ulteriuras aczias da Repower duain medemamain vegnir surpigliadas ed integradas entaifer in spazi da temp stimà da 5 onns en structuras separadas, tar las qualas las vischnancas duain esser participadas e las qualas ellas pon gidar a concepir activamain. Questa "societad da participaziun da las vischnancas" n'è exista anc betg. Ella ston anc vegnir definida pli detagliadamain en il discurs politic. Almain 3,3 % da las parts d'aczias dal chantun che restan duain vegnir vendidas communablamain cun la participaziun cumprada da nov da l'Axpo da 12,3 % (q.v.d. min. 15,6 %) ad in acziunari substitutiv adattà e strategic.

Cun in contract d'acziunarias e d'acziunaris nov han reglads il chantun e l'Axpo ils princips essenzials da lur posiziun sco acziunaris principals da la Repower ed il transferiment da las aczias previs. Tematicamain vegn mantegnida la concordanza cun il contract d'acziunarias e d'acziunaris vertent da l'onn 1999. Il chantun e l'Axpo na vulan nagin rinforzament da la controlla da la Repower. Omisduas partidas vulan garantir la cuntinuitad da l'acziunariat da la Repower e contribuir cun quai vinavant a la stabilitad da l'interpresa Repower.

Il chantun e l'Axpo mantegnan tenor il contract d'acziunarias e d'acziunaris per la fasa transitorica las relaziuns da pussanza vertentas tar la cumposiziun e tar l'execuziun dal dretg da votar dal cussegl d'administraziun da la Repower. Il chantun nominescha pia vinavant 6 commembras e commembers e l'Axpo 3 commembras e commembers per il cussegl d'administraziun da 12 persunas. Ils 3 sezs dal cussegl d'administraziun da l'Alpiq vertents vegnan occupads da nov communablamain tras commembras e commembers independents e cumpetents sin proposta da l'Axpo tar la radunanza generala da la Repower dals 15 da matg 2013. Tut ils conclus impurtants per la Repower dovran ultra quai medemamain l'unanimitad tranter las partidas dal contract d'acziunarias e d'acziunaris, q.v.d. il consentiment dal chantun e da l'Axpo (dretg da veto).

Il chantun e l'Axpo èn s'obligads sin la basa dal nov contract d'acziunarias e d'aziunaris che la Repower restia vinavant ina interpresa d'energia grischuna autonoma da l'economia privata che vegn manada tenor princips da l'economia da manaschi ch'è dentant activa sin plaun internaziunal. La Repower na duai pia betg mo vegnir purtada fin a l'integraziun d'in nov investider adattà, mabain er suenter d'in investider ch'empermetta ina garanzia cumpletta che la Repower haja vinavant success en il martgà d'electricitad europeic sco interpresa integrada verticalmain.

Igl è planisà d'exequir la transacziun durant l'emprim quartal da l'onn 2013. Las cundiziuns dal dretg da concurrenza da l'execuziun tenor il dretg svizzer èn gia ademplidas; mancar mancan mo anc las permissiuns resp. las confermas da duas autoritads da concurrenza exteriuras (Ungaria, Germania). Davart l'import dal pretsch da la transacziun èn las partidas sa cunvegnidas da taschair, quai betg sco ultim, per betg sminuir nunnecessariamain la libertad d'agir per l'implementaziun da la structura da mira (cun integrar il terz investider, q.v.d. l'acziunari substitutiv).

Cun las infurmaziuns qua avant maun èn vegnids infurmads directamain ils 7 da december 2012 tras il represchentant cumpetent da la regenza – uschenavant che quai è stà pussaivel sin basa da las disposiziuns dal dretg da la bursa e dal dretg dals cartels – er gia la cumissiun da gestiun dal cussegl grond, la cumissiun per ambient, traffic ed energia sco er la cumissiun predeliberanta concernent l'initiativa da charvun. Cun quai ha ademplì la regenza sia obligaziun d'infurmaziun en il rom da las pussaivladads. Davart ulteriurs pass vegn ella a pudair infurmar, uschespert ch'ils cuntegns correspundents han cuntanschì il grad da concretisaziun necessari.

06 da mars 2013