En il chantun Grischun existan differentas organisaziuns a glisch blaua che vegnan clamadas, sch'i dat in eveniment; questas organisaziuns èn particularmain la polizia, ils pumpiers e las organisaziuns da salvament (sanitad, care teams). Per il stadi, per la populaziun e per l'economia èn las organisaziuns a glischa blaua organs indispensabels per garantir la segirezza interna e publica. La coordinaziun optimala tranter las organisaziuns a glisch blaua è ina incumbensa fitg pretensiusa en cas d'in eveniment. Disturbis, interrupziuns u surchargias en las acziuns da las organisaziuns a glisch blaua pon avair consequenzas directas, immediatas e per part mortalas per las persunas pertutgadas. Umans, animals, edifizis e valurs materialas na pudessan ni vegnir mess en segirezza ni salvads.
Las deputadas ed ils deputads sutsegnads dumondan la regenza tge stadi concernent la coordinaziun tranter las organisaziuns a glisch blaua che exista oz en il chantun Grischun, particularmain:
1. sch'i vegnan organisadas scolaziuns cuminaivlas ed exercizis cuminaivels;
2. sche la coordinaziun e la direcziun da las acziuns èn sin in nivel suffizient;
3. sch'i dat ina infrastructura suffizienta e cuminaivla tranter las organisaziuns a glisch blaua;
4. sche la communicaziun tranter las organisaziuns a glisch blaua è garantida en il cas da catastrofa;
5. sch'i dat in basegn d'agir e co che l'eventual basegn d'in tal è.
Cuira, ils 23 d'avrigl 2013
Cavegn, Dosch, Märchy-Caduff, Berther (Camischolas), Blumenthal, Della Vedova, Dermont, Geisseler, Niederer, Parpan, Pedrini (Roveredo), Righetti, Tomaschett (Breil), Zanetti, Lauber, Müller (Haldenstein)
Resposta da la regenza
Da las organisaziuns a glisch blaua fan part la polizia, ils pumpiers ed ils servetschs da salvament sanitars. La lescha da polizia (LPol; DG 613.000), la lescha davart la protecziun preventiva cunter incendis ed ils fatgs da pumpiers en il chantun Grischun (lescha davart la protecziun cunter incendis, LPI; DG 840.100), la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas, LTM; DG 506.00) e la lescha davart l'agid en cas da catastrofas (LAC; DG 630.100) furman la basa legala correspundenta.
La regenza respunda las dumondas sco suonda:
1. Gea. L'organisaziun d'acziun per il cumbat cunter donns (servetsch d'avaria) che la regenza ha nominà cun ses conclus dals 26 da settember 2000 (protocol nr. 1551) garantescha ch'i han lieu regularmain en ils tunnels da via sut la direcziun da l'uffizi da construcziun bassa exercizis da las organisaziuns a glisch blaua e da las organisaziuns associadas (Rega, CAS, care team e.u.v.). En il servetsch d'avaria èn represchentads l'uffizi da construcziun bassa, la polizia chantunala, l'uffizi da sanadad, ils pumpiers (GVG) e l'uffizi per la natira e l'ambient sco er la Viafier retica. Ils ultims onns èn vegnids fatgs exercizis en differents tunnels dal Grischun: l'onn 2003 en il portal nord dal tunnel dal Veraina, l'onn 2008 en il tunnel dal Crap da Flem, l'onn 2009 en il portal sid dal tunnel dal Veraina e l'onn 2012 en il tunnel da Saas. Tar quests exercizis vegnan scoladas la doctrina d'acziun e la direcziun sin tut ils stgalims. Ils deficits che vegnan identifitgads vegnan integrads en la scolaziun da las organisaziuns associadas respectivas.
2. Gea. Ils onns 2009 fin 2011 han gì lieu en las quatter regiuns ch'èn vegnidas furmadas per il provediment da basa da la polizia chantunala dal Grischun tschintg uschenumnads trenaments da scenaris cun ils caders da las organisaziuns a glisch blaua e da las organisaziuns associadas. L'accent da quest trenament è stà d'exercitar las incumbensas directivas. Uschia è vegnida meglierada la coordinaziun da las acziuns tranter las differentas organisaziuns associadas ed èn vegnidas rinforzadas las enconuschientschas davart las structuras vicendaivlas.
3. Gea. Las singulas organisaziuns a glisch blaua èn equipadas bain per dumagnar eveniments quotidians ed eveniments gronds.
4. Gea. La communicaziun tranter las organisaziuns a glisch blaua ha lieu dapi curt temp cun agid da la rait da func da segirezza POLYCOM Grischun.
5. Basegn d'agir datti en il sectur dal post da commando (eveniments gronds). Il post da commando è il lieu da direcziun en cas d'eveniments gronds u en cas da catastrofas. Quest lieu da direcziun n'è normalmain betg preparà. En il Grischun n'han ni la polizia chantunala ni ils pumpiers ni la sanitad infrastructuras correspundentas. Cunquai che la polizia chantunala è responsabla per la direcziun generala da l'acziun, duess er ella disponer da l'infrastructura mobila correspundenta.
27 da zercladur 2013