Dumonda da la fracziun da la PS concernent l'ulteriur svilup da las colliaziuns cun cabels da fibras da vaider en il Grischun
Sessiun: 23.04.2013
En la sessiun d'avrigl 2011 ha il cussegl grond dal Grischun debattà davart ina incumbensa da la fracziun da la PS concernent il provediment da l'entir chantun cun la tecnologia da fibras da vaider. L'incumbensa è vegnida modifitgada levamain sin proposta dal deputà Joos ed acceptada cun 92:0 vuschs. L'incumbensa acceptada sa cloma: "La regenza vegn incumbensada d'examinar – tut tenor il svilup sin plaun federal – ina legislaziun executiva chantunala e da realisar en il fratemp las recumandaziuns formuladas en il rapport dals 26 da fanadur 2010. La meglieraziun punctuala che vegn menziunada en quel rapport e che cumpiglia l'access a bindel lartg s'orientescha a la finamira da proveder tut las immobiglias entaifer las zonas da construcziun che han in basegn effectiv fin l'onn 2012 cun almain 4 MBit/s e fin l'onn 2014 cun almain 8 MBit/s sco er da dar impuls effizients per realisar projects innovativs a bindel lartg (sco p.ex. FTTH)."
Las sutsegnadras ed ils sutsegnaders dumondan perquai la regenza:
1. Tge è vegnì fatg dapi quella giada?
2. Tge aspect ha il provediment dal chantun oz cun la tecnologia a bindel lartg e cun la tecnologia da fibras da vaider?
3. Co giuditgescha la regenza sias decleraziuns da quella giada (protocol dal cussegl grond dals 19 d'avrigl 2011, p. 726 ss.) areguard las forzas commerzialas per il provediment dal chantun, areguard las incumbensas da coordinaziun dal chantun, areguard la necessitad da furnir prestaziuns pli sveltas per las IPMs grischunas, per l'hotellaria e per la parahotellaria sco er areguard las chasadas privatas?
4. Tge prestaziuns da sustegn ha il chantun demussà envers las vischnancas?
5. Tge discurs e cun tge resultats ha il chantun manà cun la confederaziun?
6. Pertge n'è il provediment cun la tecnologia da fibras da vaider betg vegnì integrà en la revisiun totala da la lescha per il svilup economic, malgrà las decleraziuns che la regenza aveva fatg quella giada?
7. Co giuditgescha la regenza il svilup dals proxims 4 onns e tge ulteriuras mesiras concretas prevesa ella da prender?
Cuira, ils 23 d'avrigl 2013
Peyer, Baselgia-Brunner, Bucher-Brini, Frigg-Walt, Gartmann-Albin, Jaag, Müller (Tavau Plaz), Noi-Togni, Pult, Thöny, Trepp, Deplazes, Hensel, Michel (Igis), Monigatti, Pedrini (Soazza), Vassella
Resposta da la regenza
1. La situaziun en il sectur dal provediment a bindel lartg è vegnida analisada. Dal rapport intermediar dals 18 da schaner 2012 en chaussa (vesair www.are.gr.ch) ha la regenza prendì enconuschientscha ils 31 da schaner 2012.
2. L'incarica da provediment da basa è ademplida a 100 % tenor las indicaziuns da la Swisscom. En il sectur da las sveltezzas fitg autas per il transferiment da datas permetta il provediment tar 77,2 % da la populaziun ina televisiun digitala da standard e tar 83,1 % ina televisiun digitala d'auta resoluziun (HDTV). Questas sveltezzas na cumpiglian betg las purschidas dals gesturs da rait a cabel che megliereschan il provediment supplementarmain. L'atlas a bindel lartg permetta da nov da far ina valitaziun qualitativa. Tenor questa valitaziun dastgass passa 90 % da la populaziun disponer d'in provediment a rait fixa che permetta ina televisiun da standard. D'agiuntar è il provediment mobil a bindel lartg. Tenor la Swisscom pudessan retrair bain cun quel 90,1 % da la populaziun ina televisiun da standard.
3. La regenza resta fidaivla a sias decleraziuns. La concurrenza tranter ils differents offerents e la dumonda creschenta – intimada tras la televisiun digitala – provocheschan in'amplificaziun svelta e cumplessiva da l'infrastructura. In studi ch'è vegnì incumbensà da la societad per ina rait a fibras da vaider en Svizra (december 2011) mussa che la regulaziun retegnida che sa basa cunzunt sin il dretg da concurrenza en Svizra, dat – en cumparegliaziun – pli auts impuls d'investiziun ch'il reschim da la UE che vegn pratitgà en Germania cun ina ferma regulaziun dal stadi. Il provediment è sa meglierà ulteriuramain en il Grischun. Situaziuns da provediment insuffizientas datti mo pli en singuls cas (4 annunzias durant ils ultims 2 onns) e pon vegnir reparadas entaifer temp util. Quai po vegnir giuditgà sco ina conferma da la strategia da la regenza.
4. Duas vischnancas ed ina regiun han survegnì in sustegn en furma da cussegliaziuns. Ina dumonda en scrit dals 8 da matg 2013 è vegnida fatga senza inditgar il speditur e n'ha pia betg pudì vegnir elavurada.
5. Dapi il 1. da fanadur 2011 cooperescha il chantun sin plaun spezialisà en la gruppa da lavur da la confederaziun per dar access a la Svizra cun raits a bindel fitg lartg. La gruppa da lavur ha fatg in mussavia per las vischnancas ch'èn confruntadas cun projects d'amplificaziun ed ha elavurà in atlas a bindel lartg che demussa la situaziun actuala da provediment.
6. Ils 31 da schaner 2012 ha la regenza prendì enconuschientscha dal rapport intermediar da l'uffizi per il svilup dal territori davart il provediment a bindel lartg dal Grischun ed ha incumbensà l'uffizi per economia e turissem d'examinar la creaziun d'ina basa legala suffizienta per ch'il provediment a bindel lartg da firmas possia vegnir sustegnì en singuls cas motivads cun meds finanzials chantunals. Ina tala promoziun è actualmain pussaivla sin fundament da l'art. 13 da la lescha vertenta per promover il svilup economic. Il sboz da consultaziun tar la revisiun totala da la lescha per promover il svilup economic prevesa vinavant questa promoziun.
7. La dumonda da sveltezzas per il transferiment da datas dastgass s'augmentar durant ils proxims quatter onns en spezial pervia da la televisiun digitala d'auta resoluziun. La tecnologia da VDSL vegn amplifitgada ils proxims onns quasi en l'entir chantun ad FTTS (fiber to the street). Uschia vegn derasà il bindel lartg ultrasvelt er ordaifer ils centers. La proxima generaziun da l'internet mobil (LTE long term evolution) daventa standard ils proxims onns e vegn a meglierar vinavant la purschida mobila a bindel lartg. La necessitad d'ina legislaziun executiva chantunala n'è anc adina betg dada ord vista da la regenza. Ma la regenza è dentant pronta da tractar pli detagliadamain il tema dal provediment a bindel lartg en il rom da l'incumbensa Caduff che pretenda ina vista cumplessiva.
6 da zercladur 2013