Las chombras federalas han concludì da na betg abolir la Lex Koller. Uschia na pon persunas estras senza domicil fix en Svizra anc adina betg cumprar immobiglias d'abitar. Quai vala er per persunas giuridicas che han bain lur sedia en Svizra, ma che vegnan dominadas da persunas a l'exteriur.
Damai che la Lex Koller vegn mantegnida, daventa l'execuziun da las disposiziuns prioritara. Tenor la lescha federala davart l'acquist da bains immobigliars tras persunas da l'exteriur è l'execuziun en emprima lingia chaussa da quel chantun, en il qual il bain immobigliar sa chatta. Las sutsegnadras ed ils sutsegnaders supplitgeschan en quest connex la regenza da respunder las suandantas dumondas:
1. Tge instanza controlla il domicil da la cumpradra u dal cumprader?
2. Tenor tge princips vegn fatga questa controlla? Tge criteris chaschunan in scleriment pli detaglià?
3. Tgeninas èn las instanzas da surveglianza?
4. Co vegni controllà che las persunas giuridicas na vegnian betg dominadas da persunas a l'exteriur? Tgenins èn ils criteris da la controlla?
5. Tenor la lescha vertenta dastgan persunas estras cumprar immobiglias da mastergn. Co vegni garantì che la Lex Koller na vegn betg guntgida, sche la zona vegn midada per intents d'abitar ubain sche lieus da manaschi vegnan transfurmads a spazi d'abitar?
6. Tge capita cur che las cumpradras ed ils cumpraders transfereschan lur scrittiras puspè a l'exteriur suenter avair acquistà legalmain l'immobiglia?
7. Quantas venditas ha l'instanza da surveglianza controllà ils ultims tschintg onns?
8. Tge resursas da persunal stattan a disposiziun al chantun per executar la Lex Koller?
Cuira, ils 11 da zercladur 2013
Müller (Tavau Plaz), Baselgia-Brunner, Bucher-Brini, Frigg-Walt, Gartmann-Albin, Jaag, Kappeler, Locher Benguerel, Michel, Noi-Togni, Peyer, Pfenninger, Pult, Rosa, Thöny, Trepp, Deplazes, Hensel, Monigatti
Resposta da la regenza
Tenor la lescha federala concernent las disposiziuns davart la libra circulaziun da persunas en la cunvegna per midar la convenziun per la fundaziun da la AECL (CULF 2002 685), en vigur dapi il 1. da zercladur 2002, sco er tenor l'art. 5 al. 1 lit. a da la lescha federala davart l'acquist da bains immobigliars tras persunas da l'exteriur (LAIE, Lex Koller; CS 211.412.41) na valan burgaisas e burgais dals stadis commembers da la UE/AECL che han lur domicil legal ed effectiv en Svizra betg pli sco persunas da l'exteriur. Burgaisas e burgais da la UE/AECL che han lur domicil en Svizra pon pia cumprar en Svizra proprietad funsila senza stuair dumandar ina permissiun. Er pon cunfinarias e cunfinaris dals stadis commembers da la UE/AECL cumprar ina segunda abitaziun en la regiun da la plazza da lavur senza stuair dumandar ina permissiun per quai (art. 7 lit. j LAIE). Per acquistar bains immobigliars che servan permanentamain sco lieus da manaschi na dovran persunas natiralas e giuridicas da l'exteriur dapi il 1. d'october 1997 nagina permissiun pli. Sin l'execuziun da la Lex Koller n'aveva il project d'aboliziun ch'è vegnì annullà ultimamain dal cussegl federal sin cumond dal parlament nagina influenza.
Dumondas 1 e 2: Igl è l'incumbensa da l'uffizi dal register funsil da guardar che las disposiziuns da la Lex Koller vegnian resguardadas tar la procedura da registraziun. En cas d'in acquist tras ina burgaisa u in burgais da la UE/AECL che ha ses domicil en Svizra pretenda l'uffizi dal register funsil ina copia da la permissiun da dimora sco er in attest da domicil per controllar la legalitad dal domicil. La permissiun da dimora conceda l'uffizi da migraziun e da dretg civil, l'attest da domicil la vischnanca da domicil. Sche l'administratur dal register funsil na po betg excluder – en cas d'ina cumpra – senz'auter l'obligaziun da dumandar ina permissiun, q.v.d. sch'i dat indizis che la prendida da domicil effectiva pudess esser en dubi en il cas singul, renviescha el l'acquistadra u l'acquistader a l'autoritad da permissiun per l'ulteriura controlla, numnadamain a l'inspecturat dal register funsil e register da commerzi (IRFRC). Dubis pussaivels che la burgaisa u il burgais da la UE/AECL haja effectivamain prendì domicil en Svizra datti eventualmain, sche l'acquist da bains immobigliars capita avant u il medem mument cun la prendida da domicil e sch'il conjugal/partenari e/u la famiglia mantegna ses domicil vertent a l'exteriur.
Dumonda 3: Il IRFRC controllescha l'activitad dals uffizis dal register funsil en il rom da las inspecziuns. L'autoritad chantunala da surveglianza cun autorisaziun da far recurs cunter decisiuns dal IRFRC sco autoritad da permissiun da la Lex Koller è il departament da giustia, segirezza e sanadad. Sin plaun federal controllescha l'uffizi federal da giustia las decisiuns dal IRFRC.
Dumonda 4: Er las persunas giuridicas renviescha l'uffizi dal register funsil en la procedura da registraziun al IRFRC, sch'i dat dubis areguard l'obligaziun pussaivla da dumandar ina permissiun. Quai è regularmain il cas tar persunas giuridicas che l'uffizi dal register funsil n'enconuscha betg. Savens sa procuran quellas perquai gia ordavant tar il IRFRC ina constataziun che l'obligaziun da dumandar ina permissiun n'è betg necessaria. Controlladas vegnan las relaziuns da participaziun e da finanziaziun da la societad sco er la finanziaziun da la fatschenta concreta d'acquist.
Dumonda 5: Per immobiglias da fatschenta na dovran persunas da l'exteriur nagina permissiun per l'acquist e per la finanziaziun. Midadas d'utilisaziun u transfurmaziuns en spazi d'abitar posteriuras dovran eventualmain ina permissiun sut ils aspects da la Lex Koller, sch'i n'era betg previsa in'utilisaziun permanenta per il mastergn il mument da l'acquist. En quest cas pudess vegnir supponida ina inobservanza da la Lex Koller ed il stadi illegal stuess vegnir eliminà d'uffizi da l'autoritad da permissiun. I smanatschan consequenzas dal dretg administrativ, civil e penal.
Dumonda 6: Sche l'acquistadra u l'acquistader transferescha ses domicil puspè a l'exteriur, po ella u el mantegnair sia proprietad funsila acquistada legalmain en Svizra.
Dumonda 7: Las cifras da las prendidas da domicil controlladas dal IRFRC ils ultims onns: 2008: 2, 2009: 5, 2010: 5, 2011: 11, 2012: 24. En tut ils cas èn vegnidas furnidas las cumprovas per ina prendida da domicil legala ed effectiva, uschia che la liberaziun da l'obligaziun da dumandar ina permissiun ha pudì vegnir constatada. En totalmain trais cas ha l'autoritad da permissiun stuì constatar posteriuramain l'obligaziun da dumandar ina permissiun per cumpras ch'èn gia stadas inscrittas en il register funsil e procurar ch'il stadi legal vegnia stabilì. En il center stat l'effect preventiv da questas proceduras.
Dumonda 8: Per exequir la Lex Koller dovra il IRFRC actualmain totalmain 180 pertschient da plazzas, repartids sin collavuraturas e collavuraturs da l'elavuraziun specifica, dal secretariat e da la direcziun da l'uffizi.
15 d’avust 2013