Las valurs da stimaziun da las immobiglias en il Grischun creschan ad in crescher. Sche las valurs da las immobiglias èn pli autas, resultan valurs da l'atgna locaziun pli autas, e quellas tutgan sco entradas fictivas tar las entradas da las persunas natiralas.
La valur da l'atgna locaziun è suttamessa a la taglia dapi l'introducziun d'ina taglia federala directa, ed ella sa basa sin l'artitgel 8 da la constituziun federala, tenor il qual l'egualitad giuridica duai valair er en il dretg fiscal tras il tractament fiscal egual da tut ils pajataglias. En l'emprim commentari tar il conclus davart la taglia per la defensiun naziunala statti scrit che «er la valur da locaziun d'ina immobiglia u d'ina abitaziun duvrada sez tutga en mintga cas tar l'entrada suttamessa a la taglia. Sco tala valur vala la summa ch'il proprietari u il giudider stuess pajar per prender en locaziun in object sumegliant.»
Tenor la lescha d'armonisaziun da taglia èn er ils chantuns obligads da suttametter la valur da l'atgna locaziun a la taglia. Tar la fixaziun da las valurs da l'atgna locaziun han ils chantuns dentant ina tscherta libertad d'agir. Ina reducziun procentuala da la valur da l'atgna locaziun tar l'immobiglia duvrada permanentamain sez è giustifitgada, perquai ch'il proprietari è main flexibel ch'il locatari sco er perquai che la promoziun da la proprietad d'abitar è francada en la constituziun federala. Per immobiglias duvradas permanentamain sez conceda il chantun Grischun ina deducziun fiscala da 30 % sin la valur da l'atgna locaziun.
Tenor las indicaziuns da l'uffizi federal da statistica n'è la quota da la proprietad d'abitar en il Grischun praticamain betg sa midada tranter ils onns 1990 e 2011. Entaifer il medem temp ha il Grischun gì in augment da la populaziun da var 11 %. Tenor las indicaziuns da l'administraziun chantunala da taglia è la valur brutta da l'atgna locaziun creschida mo ils onns 2002 fin 2011 da 939,6 milliuns francs sin 1'229,4 milliuns francs l'onn 2011, è pia s'augmentada per circa 31 %.
Quest augment enorm è d'ina vart segiramain ina consequenza da l'augment dals pajataglias secundars. Da l'autra vart èn ils pretschs da locaziun sa sviluppads durant circa ils ultims 10 onns da differenta maniera ch'ils pretschs da la proprietad d'abitar. Tar objects cumparegliabels èn ils pretschs da locaziun s'augmentads main ferm ch'ils pretschs da la proprietad d'abitar ed uschia er che la valur da l'atgna locaziun. Da quest svilup stoi vegnir tegnì quint cun adattar la taxaziun da la valur da l'atgna locaziun.
Las sutsegnadras ed ils sutsegnaders incumbenseschan la regenza d'auzar la deducziun per l'immobiglia abitada permanentamain sez sin il maximum federal, pia da 30 sin 40 pertschient.
Cuira, ils 22 d'october 2013
Casanova-Maron, Barandun, Bezzola (Zernez), Burkhardt, Claus, Clavadetscher, Engler, Fontana, Furrer-Cabalzar, Giacomelli, Hartmann (Champfèr), Heiz, Hitz-Rusch, Holzinger-Loretz, Jenny (Arosa), Kasper, Kunz (Cuira), Marti, Michael (Castasegna), Michel (Tavau Monstein), Niggli (Samedan), Pfäffli, Rosa, Steck-Rauch, Troncana-Sauer, Valär, Vetsch (Pragg-Jenaz), Waidacher, Wieland, Zweifel-Disch, Candrian, Felix (Scuol), Jenny (Claustra), Patt, Schucan
Resposta da la regenza
Tenor l'art. 22 al. 3 da la lescha da taglia per il chantun Grischun vegn la valur da l'atgna locaziun per l'immobiglia abitada permanentamain al lieu da domicil taxada cun 70 pertschient da la valur da locaziun stimada. L'incumbensa pretenda confurm al senn ina taxaziun da mo 60 pertschient.
Tras l'imposiziun da taglia sin la valur da l'atgna locaziun vegni cuntanschì d'ina vart che la taglia vegn imponida tenor la capacitad economica e da l'autra vart che las proprietarias ed ils proprietaris d'abitaziuns vegnan tractads en moda giuridicamain eguala sco las locatarias ed ils locataris. L'imposiziun da taglia sin la valur da l'atgna locaziun ha dentant er ina impurtanza centrala per il Grischun pervia da las abitaziuns secundaras, cunquai ch'il substrat da taglia necessari po uschia vegnir generà tras las immobiglias da vacanzas.
En l'incumbensa vegni fatg valair che las valurs da l'atgna locaziun sajan creschidas massivamain ils ultims onns e ch'ellas sajan plinavant sa distanziadas fermamain dals tschains da locaziun effectivs. Tuttas duas pretensiuns n'èn betg correctas. Las valurs bruttas da l'atgna locaziun èn s'augmentadas parallelamain cun l'augment dal dumber d'immobiglias duvradas sez. Tras la moda e maniera da stimar las valurs da l'atgna locaziun na poi betg dar grondas differenzas tranter la valur da l'atgna locaziun ed il tschains da locaziun, quai che vegn cumprovà tras las suandantas explicaziuns davart il proceder da l'uffizi da stimaziun.
La revisiun da la stimaziun en ina vischnanca cumenza cun quels bains immobigliars surbajegiads ch'èn vegnids dads en locaziun u vendids ad ina terza persuna independenta. Quests objects vegnan inspectads, e lur valurs vegnan eruidas. Uschia vegn generada ina glista da valurs da locaziun, sin basa da la quala vegn fixada la media dals tschains da locaziun da martgà. Quests tschains servan sco basa per lura stimar ils objects che vegnan duvrads da las proprietarias e dals proprietaris sez. Tras il proceder tschernì servan ils tschains da locaziun effectivs d'ina vischnanca sco basa per eruir las valurs da l'atgna locaziun. Uschia èsi garantì che l'autezza da las valurs da l'atgna locaziun correspundan als tschains da locaziun da martgà d'objects sumegliants e che la valur da l'atgna locaziun e dal tschains da locaziun da martgà sa sviluppeschan parallelamain.
Il tribunal federal pretenda ina imposiziun da taglia sin la valur da l'atgna locaziun d'almain 60 pertschient dal tschains da locaziun da martgà en mintga cas singul (StE 2006 A 21.11 nr. 46). Las valurs da l'atgna locaziun en il chantun Grischun vegnan actualmain stimadas da nov mo mintga 10 fin 15 onns, ed in'adattaziun pauschala da las valurs da l'atgna locaziun è pussaivla tranteren mo limitadamain. Sch'ils tschains da locaziun da martgà creschan suenter che la stimaziun è vegnida fatga, na vegn la prescripziun constituziunala d'ina imposiziun minimala da 60 pertschient dal tschains da locaziun da martgà betg pli cuntanschida en mintga cas singul. La soluziun pretendida cun l'incumbensa cuntrafa pia al dretg federal.
Er ord vista d'in tractament giuridicamain egual da locatarias e locataris e da possessuras e possessurs d'atgna proprietad sto l'incumbensa vegnir refusada. Las locatarias ed ils locataris na pon betg deducir da la taglia ils custs da locaziun; quests custs èn irrelevants per la taglia. Las possessuras ed ils possessurs d'atgna proprietad ston declerar la valur da l'atgna locaziun, pon dentant deducir cumplainamain ils custs appartegnents per realisar il gudogn (custs dal mantegniment da l'immobiglia e tschains da debits). Sche l'imposiziun da taglia sin la valur da l'atgna locaziun vegniss limitada a 60 pertschient, senza ch'ils custs per realisar il gudogn vegnissan limitads, na pudess ins betg pli discurrer d'in tractament giuridicamain egual.
Per ils motivs giuridics numnads e perquai che l'imposiziun pli bassa da taglia sin la valur da l'atgna locaziun chaschunass in manco d'entradas da mintgamai circa 6,9 milliuns francs per il chantun e per las vischnancas, propona la regenza da refusar l'incumbensa.
22 da schaner 2014