Dumonda Kappeler concernent l'applicaziun da la clausula da bagatella per la construcziun da «sinergia»
Sessiun: 22.10.2013
A chaschun da l'ura da dumondas dals 22 d'october 2013 ha il cusseglier guvernativ Cavigelli explitgà ch'i vegnia realisada ina concurrenza da projects per in planisader general per la construcziun da «sinergia». Areguard ils ulteriurs mandats èn previsas surdadas singulas.
Pervia da la summa totala da construcziun ston tut las lavurs da construcziun da «sinergia» vegnir surdadas tenor GATT/
WTO.
En quest connex vegn la regenza supplitgada da respunder las suandantas dumondas:
- Vegn applitgada la clausula da bagatella en il rom da GATT/WTO?
- Tge prestaziuns resp. pachets da lavur duain esser pertutgads da la clausula da bagatella?
Cuira, ils 22 d'october 2013
Kappeler, Kasper, Augustin, Brandenburger, Burkhardt, Casanova-Maron, Casutt Renatus, Dosch, Foffa, Holzinger-Loretz, Jenny (Arosa), Joos, Krättli-Lori, Niederer, Niggli (Samedan), Stiffler (Cuira), Tomaschett (Breil), Valär, Vetsch (Pragg-Jenaz), Wieland, Degonda, Jenny (Claustra), Schucan
Resposta da la regenza
Tar la dumonda 1: Gea. La clausula da bagatella tenor l'art. 7 al. 2 da la cunvegna interchantunala davart las acquisiziuns publicas (CIAP; DG 803.510) vegn applitgada er per construir il nov center administrativ a Cuira. Tenor questa disposiziun ston incaricas da construcziun en il sectur da contracts internaziunals, che na cuntanschan sulettas betg la valur da 2 milliuns francs e che na surpassan ensemen betg 20 pertschient da la valur da l'entira ovra da construcziun, vegnir surdadas almain tenor las disposiziuns dal sectur betg cumpiglià da contracts internaziunals. Quai vul dir ch'il dretg chantunal vegn applitgà per questas incaricas.
Tar la dumonda 2: Decider davart las sorts da lavurs che pon la finala vegnir surdadas tenor las disposiziuns dal sectur betg cumpiglià da contracts internaziunals (sectur dal martgà intern) pon ins pir, cur ch'ins enconuscha il project da construcziun concret e suenter ch'il preventiv dals custs detagliads è avant maun. La finamira dal chantun è quella da trair a niz – tar questa construcziun – dal tuttafatg la procentuala maximala permessa tenor la clausula da bagatella. En quest connex stoi vegnir tegnì quint adequatamain dals offerents indigens.
15 da november 2013