La Realta Biogas SA, a la quala il chantun è participà, po en il fratemp tegnair quint da las experientschas ch'èn vegnidas fatgas durant in entir emprim onn da gestiun. L'indriz è ina contribuziun bainvegnida per duvrar ils ruments organics; el producescha energia regenerabla sin plaun local ed observa la limitaziun d'emissiuns.

L'idriz da biogas a Realta ha en emprima lingia la finamira da preparar e da duvrar energeticamain il ladim liquid ed il rument verd che resulta en l'agricultura. Per quest intent è adattada optimalmain la procedura tschernida per tractar ils ruments. La fermentaziun cun questa procedura n'inactivescha dentant betg suffizientamain il material schermigliant da las neofitas invasivas ed ils scherms infectus. Il privel ch'ils scherms infectus e che las neofitas sa derasian exista, sch'i vegnan elavurads directamain ed a medem temp las vanzadiras ed il rument verd che derivan dals posts da rimnada separads da la regiun. En l'indriz da biogas a Realta eri previs d'elavurar a medem temp tals ruments organics sco substrat supplementar. Perquai han ins stuì prender mesiras preventivas adattadas per evitar d'importar en l'indriz substanzas nuschaivlas u nungiavischadas u schizunt organissems privlus.

1. Las experientschas cun il manaschi da biogas a Realta èn dal tuttafatg positivas. Ses grad d'utilisaziun durant l'emprim onn da gestiun surpassa las aspectativas.

2. Na. La vendita previsa da la chalur che resulta durant la stad è garantida. Cun construir l'indriz da biogas èsi stà dal cumenzament ennà in giavisch da tut las instanzas participadas da na betg dismetter la chalur restanta, mabain da la duvrar uschenavant sco pussaivel en las immobiglias dal stabiliment per l'execuziun giudiziala, las qualas vegnan administradas da l'uffizi da construcziun auta. L'uffizi da construcziun auta e la Realta Biogas SA han fatg gia avant che prender en funcziun l'indriz da biogas in contract davart la furniziun da la chalur. Tut las cundiziuns davart la furniziun da la chalur ch'èn cuntegnidas en quel vegnan observadas oz e la quantitad minimala da vendita ch'è fixada en il contract è vegnida surpassada per bainquant. La Realta Biogas SA na profita anc betg da l'indemnisaziun per cuvrir ils custs da la furniziun d'electricitad (ICF). Sche las cundiziuns restan talas e qualas er en l'avegnir, n'avess la Realta Biogas SA dentant – er sche la ICF vegniss approvada – naginas fadias d'ademplir questas cundiziuns.

3. Actualmain n'èsi betg previs da prender mesiras per augmentar la vendita da chalur durant la stad, er sch'in augment da la vendita da chalur fiss raschunaivel e stuess vegnir cuntanschì. Sch'i vegnan construids novs projects, vegn ins a sa stentar er en il futur – en il rom da quai ch'è pussaivel economicamain – da duvrar la chalur restanta e d'explotar uschè ferm sco pussaivel il potenzial d'energia regenerabla ch'è avant maun.

4. Pervia dal privel che las neofitas invasivas sa derasian, ha l'uffizi per la natira e l'ambient recepì en la permissiun da manaschi cundiziuns pertutgant l'acceptaziun dal rument verd che vegn duvrà sco substrat supplementar. La Realta Biogas SA ha integrà questas cundiziuns pertutgant l'acceptaziun en ses reglament da manaschi dals 22 da mars 2013 ed agescha tenor questas prescripziuns. Quai ha per consequenza ch'ils furniturs regiunals ston prender mesiras per ch'i n'arrivian, sche pussaivel, naginas neofitas invasivas ensemen cun il rument verd en l'indriz da biogas. Tranter la Realta Biogas SA e l'uffizi per la natira e l'ambient na datti naginas differenzas en chaussa.

5. La noziun d'ina "battaglia perdida" n'è betg adequata en connex cun neofitas. Il cumbat cunter las neofitas gia emessas ha lieu plitost en moda differenziada tut tenor la spezia, l'existenza, la derasaziun ed il potenzial nuschaivel e tanscha da la controlla da la derasaziun fin tar la dismessa totala. Uschia han ins pudì impedir tut tenor regiun per exempel la derasaziun da l'ambrosia privlusa u da las darsvennas gigantas ed eliminar inquala existenza. Ina prioritad impurtanta hai qua d'impedir che novs effectivs s'etableschian.

6. Las proceduras alternativas en connex cun il tractament da las materias restantas che pudessan inactivar segiramain il material reproductiv da las neofitas, pretendessan in tractament cun chalur u ina combustiun e n'avessan betg pudì vegnir cumbinadas cun la fermentaziun dal material organic che deriva da l'agricultura. Per l'indriz da Realta han ins pia tschernì la procedura cun la fermentaziun supplementara senza pass d'igienisaziun e prendì en cumpra las cundiziuns correspundentas pertutgant l'acceptaziun sco er las controllas dals products e dals lieus. Il problem è vegnì giuditgà sin fundament d'ina valitaziun da las proceduras ch'è vegnida fatga da la gruppa da lavur per neobiotums invasivs che sa cumpona da gremis spezialisads da la confederaziun e dals chantuns (AGIN), per il cumpostadi e per la fermentaziun da las neofitas invasivas.

12 marzo 2014