En il rom da la debatta davart il preventiv 2014 ha il cussegl grond augmentà cun maioritad absoluta las contribuziuns al teater da la citad da Cuira, a la filarmonia da chombra, ad Origen ed ad autras instituziuns culturalas per 500'000.– francs, e quai uschia che las trais emprimas instituziuns numnadas, ch'èn activas durant l'entir onn, survegnan per l'onn 2014 contribuziuns effectivas dal chantun Grischun da mintgamai circa 400'000.– francs. Per part vegnan las contribuziuns da gestiun pajadas a quint dal preventiv ordinari da l'uffizi da cultura, per part a quint dal fond da la lottaria naziunala sco contribuziuns a projects. La tractativa e la decisiun en quella debatta davart il preventiv han mussà che la legislativa na vuleva betg mo conceder contribuziuns (da gestiun) pli autas per l'onn 2014, mabain ch'ella vuleva mantegnair l'augment da las contribuziuns a favur da las instituziuns culturalas er per ils onns 2015 e suandants, fin a l'entrada en vigur d'ina revisiun da la lescha per promover la cultura.
Cunquai che la regenza n'è betg stada pronta da declerar en l'ura da dumondas da la sessiun d'avrigl 2014 (dumonda Augustin) che l'augment per 500'000.– francs vegnia mantegnì er en il preventiv dals onns 2015 e suandants, ma damai che quai correspunda – sco exprimì instantamain en la debatta davart il preventiv 2014 – a la voluntad dal cussegl grond, incumbenseschan las sutsegnadras ed ils sutsegnaders la regenza da mantegnair l'augment dal preventiv da l'uffizi da cultura da 500'000.– francs per ils onns 2015 e suandants e da far ina proposta correspundenta al cussegl grond en il rom dal preventiv 2015. L'augment da las contribuziuns da gestiun a quint da l'uffizi da cultura sto dentant vegnir concepì uschia, che quest uffizi na sto betg spargnar, vul dir cumpensar l'augment dal preventiv en auters lieus.
Cuira, ils 24 d'avrigl 2014
Augustin, Locher Benguerel, Troncana-Sauer, Albertin, Barandun, Baselgia-Brunner, Berther (Mustér), Bezzola (Samedan), Bleiker, Blumenthal, Bondolfi, Bucher-Brini, Caduff, Casty, Casutt-Derungs Silvia, Cavegn, Clalüna, Claus, Darms-Landolt, Davaz, Della Vedova, Dermont, Engler, Fallet, Fasani, Florin-Caluori, Foffa, Fontana, Frigg-Walt, Furrer-Cabalzar, Gartmann-Albin, Giacomelli, Hartmann (Champfèr), Heiz, Hitz-Rusch, Holzinger-Loretz, Jaag, Jeker, Joos, Kappeler, Kleis-Kümin, Koch (Igis), Kollegger (Cuira), Kunz (Cuira), Märchy-Caduff, Marti, Michael (Castasegna), Müller (Tavau Plaz), Niggli (Samedan), Noi-Togni, Parolini, Parpan, Perl, Peyer, Pfäffli, Pfenninger, Pult, Righetti, Rosa, Sax, Tenchio, Thöny, Tomaschett-Berther (Trun), Trepp, Tscholl, Wieland, Berther (Segnas), Deplazes, Hensel, Jenny-Marugg (Claustra Vitg), Michel (Cuira), Monigatti
Resposta da la regenza
A chaschun da la tractativa detagliada dal preventiv 2014 durant l'ultima sessiun da december ha dunna cussegliera guvernativa Locher Benguerel fatg la proposta d'augmentar las contribuziuns a differentas instituziuns culturalas ed a federaziuns da tetg (conto 4250.3636114) per 500 000 francs, e quai da 140 000 francs a 640 000 francs. Il cussegl grond ha acceptà questa proposta cun 67 cunter 42 vuschs e cun 5 abstenziuns.
Cun il conclus nr. 197 dals 4 da mars 2014 ha la regenza decidì davart l'utilisaziun dals daners da cultura supplementars, ch'il cussegl grond ha mess a disposiziun supplementarmain per l'onn 2014, sco er davart l'attribuziun da las contribuziuns a differents orchesters. Ils daners concedids dal cussegl grond èn vegnids repartids sco suonda:
Teater Cuira 120 000 francs
Filarmonia da chombra dal Grischun 86 000 francs
Archiv grischun per la cultura da las dunnas 24 000 francs
Fundaziun Nairs Scuol 30 000 francs
Origen Festival Cultural 200 000 francs
Opera Viva Sursaissa 40 000 francs
Plinavant stevan a disposiziun 94 000 francs sin il conto 4250.3636113 "Contribuziuns ad orchesters". Da quests daners èn – tenor il conclus da la regenza menziunà – 72 000 francs ids a la Filarmonia da chombra, 10 000 francs al "ensemble ö!" e 12 000 francs a l'orchester "le phénix".
Il conclus dal cussegl grond menziunà pertutga mo il preventiv 2014. Per che la summa possia vegnir concedida danovamain l'onn 2015 u ils onns suandants, sto ella puspè vegnir budgetada.
Quant enavant che l'augment concludì dal cussegl grond po vegnir budgetà er l'onn 2015 u ils onns suandants, n'è betg anc decidì. Tar la planisaziun dal preventiv ston vegnir resguardadas differentas prescripziuns. Il chantun è obligà da tegnair en equiliber sias finanzas a media vista. Tenor las directivas da la politica da finanzas 2013-2017 sto la regenza limitar il deficit dal preventiv a maximalmain 50 milliuns francs. In'emprima priorisaziun da l'attribuziun da meds finanzials è l'incumbensa da la regenza. En quest connex tegna ella er quint da la necessitad d'eventualmain cumpensar auters imports supplementars. L'autezza definitiva da las singulas posiziuns vegn fixada da la regenza, cur ch'il preventiv general tenor las directivas da la politica da finanzas menziunadas è avant maun. Quai è mintgamai il cas l'avust. Igl è nunusità, sch'il cussegl grond vul gia fixar singulas posiziuns avant quest termin, cumbain ch'i n'exista ni in'obligaziun legala ni ina necessitad en chaussa. Il cussegl grond – che ha la suveranitad concernent il preventiv – ha il dretg da far correcturas vi dal preventiv e da prender conclus correspundents il december, a chaschun da la debatta davart il preventiv.
Las regulaziuns vertentas davart la separaziun da las cumpetenzas concernent l'elavuraziun ed il conclus dal preventiv fan senn. Per pudair elavurar il preventiv entaifer las restricziuns legalas ed observar las prescripziuns da la politica da finanzas sto la regenza survegnir ina flexibilitad da preventiv uschè gronda sco pussaivel. En spezial er en vista al fatg ch'ils meds finanzials daventan pli stgars n'èsi betg raschunaivel, sch'il cussegl grond prenda ordavant influenza sin singulas posiziuns dal preventiv.
Per ils motivs menziunads refusa la regenza l'incumbensa.
27 da zercladur 2014