En la sessiun da favrer 2008 è la regenza vegnida incumbensada cun 103 cunter 0 vuschs da s'engaschar per l'ina per colliaziuns da viafier pli sveltas tranter Cuira e Turitg sco er per l'autra per colliaziuns da viafier directas tranter il Grischun e l'eroport da Turitg-Kloten (incumbensa Kunz concernent las colliaziuns da viafier tranter Cuira e Turitg e la colliaziun directa da viafier tranter Cuira e Turitg-eroport, text protocol da l'october 2007, p. 221). L'emprim punct ha pudì vegnir meglierà successivamain, er sch'il temp da viadi da la colliaziun la pli svelta è anc cleramain sur in'ura. Il segund punct n'è anc betg evas. Il Grischun è pia l'unica ed a medem temp la pli gronda destinaziun turistica da la Svizra che n'ha betg ina colliaziun da viafier directa cun l'eroport intercontinental da Turitg. I gida er relativamain pauc, sch'ils trens da l'eroport e quels a Cuira arrivan e partan sin il medem perrun a Turitg, perquai che la gronda part dals giasts che viagian cun il tren – savens cun blera e greva bagascha – ston midar gia a Landquart u alura a Cuira da las VFF a la VR. Concernent l'impurtanza d'ina buna colliaziun cun la rait da traffic naziunala ed internaziunala per il Grischun sco lieu attractiv per il turissem, per l'economia e per il domicil vegni renvià a la debatta che ha gì lieu il favrer 2008.
Las sutsegnadras ed ils sutsegnaders supplitgeschan perquai la regenza da respunder las suandantas dumondas:
Persequitescha la regenza anc l'incumbensa respectiva? Sche gea, tge è il stadi actual? Sche na, pertge betg?
Cuira, ils 29 d'avust 2014
Kollegger, Kunz (Cuira), Peyer, Alig, Buchli-Mannhart, Burkhardt, Caduff, Casty, Cavegn, Caviezel (Tavau Clavadel), Clavadetscher, Danuser, Deplazes, Engler, Felix (Haldenstein), Felix (Scuol), Giacomelli, Grass, Gunzinger, Hardegger, Hartmann, Heiz, Hitz-Rusch, Holzinger-Loretz, Hug, Jeker, Jenny, Kasper, Komminoth-Elmer, Kunz (Fläsch), Lorez-Meuli, Mani-Heldstab, Michael (Donat), Müller, Niggli (Samedan), Niggli-Mathis (Grüsch), Papa, Pedrini, Pfäffli, Schutz, Steck-Rauch, Steiger, Stiffler (Tavau Platz), Stiffler (Cuira), Thomann-Frank, Toutsch, Troncana-Sauer, Valär, Vetsch (Claustra Vitg), Vetsch (Pragg-Jenaz), Waidacher, Weidmann, Widmer-Spreiter, Wieland
Resposta da la regenza
L'october 2007 ha il deputà Kunz inoltrà ina incumbensa, en la quala el ha pretendì ina colliaziun directa e senza midar tren da Cuira a l'eroport da Turitg ed ina colliaziun da tren pli svelta tranter Cuira e Turitg, ina colliaziun da main che in'ura (PCG 2007 / 2008, p. 221). La regenza è sa declerada pronta da prender encunter l'incumbensa sut tschertas cundiziuns restrictivas. Il cussegl grond ha acceptà l'incumbensa cun 103 cunter 0 vuschs en il senn da las explicaziuns en scrit da la regenza (PCG 2007/2008, p. 504, 554).
Areguard la colliaziun senza midar tren da Cuira a l'eroport da Turitg ch'è vegnida pretendida ha la regenza explitgà gia quella giada ch'i vegn ad esser fitg difficil da la realisar pervia da las capacitads restrenschidas en il center da Turitg. La varianta che propona da passar tras il "Oberland" turitgais e da construir da nov la lingia tranter Schmerikon e Rüti vegn refusada dals chantuns da staziunament Son Gagl e Turitg. Sut questas circumstanzas resta ad interim mo la pretensiun envers las VFF da permetter da midar dal tren d'intercity Cuira – Turitg ad in tren per l'eroport sin il medem perrun a la staziun principala da Turitg.
En il rom da la missiva da la regenza al cussegl grond concernent la planisaziun da novas colliaziuns da traffic (carnet nr. 12 / 2012 – 2013) èn vegnidas examinadas soluziuns pussaivlas per accelerar la colliaziun Turitg – Cuira, e quai partind d'in tact da mesa ura da l'intercity (Basilea –) Turitg – Sargans – Landquart – Cuira. En il center da las examinaziuns era en spezial il giavisch da reducir il temp da viadi da ed a Turitg sin main che in'ura. Il project davart l'acceleraziun dal traject da las VFF Turitg – Cuira è vegnì assegnà da la regenza a la categoria da prioritads la pli auta (projects A che ston vegnir examinads vinavant).
Las dumondas pon vegnir respundidas sco suonda:
1. La regenza persequitescha vinavant las pretensiuns da l'incumbensa Kunz , perquai che quellas cuntegnan il giavisch central da cuntanscher in Grischun sco chantun attractiv d'abitar, da lavurar e da far vacanzas.
2. Ultra dal Tessin è il Grischun l'unica destinaziun turistica gronda senza colliaziun directa cun l'eroport da Turitg. La confederaziun, il chantun e las VFF èn conscients davart l'impurtanza ch'ina colliaziun uschè buna sco pussaivel dal Grischun cun l'eroport da Turitg ha. Il chantun Grischun ha laschà examinar l'onn 2012 differentas pussaivladads tecnicas per ina colliaziun senza midar tren cun l'eroport da Turitg, ed el ha discutà la realisaziun da diversas variantas cun las VFF sco er cun l'uffizi federal da traffic (UFT). Pervia da las autas frequenzas da trens en l'eroport da Turitg n'è ina soluziun anc adina betg en vista, malgrà la lingia diametrala en la staziun da Turitg ch'è en il fratemp vegnida engrondida. Il basegn d'ina colliaziun directa dal Grischun a l'eroport da Turitg vegn renconuschì tant da las VFF sco er dal UFT e vegn recepì correspundentamain en ils projects per ils proxims pass d'engrondiment.
En ils ultims onns han gì lieu tractativas intensivas cun las VFF e cun l'UFT per colliar il Grischun meglier cun la rait naziunala da viafier. Cunzunt tar la colliaziun svelta dad intercity tranter Cuira e Turitg han ins pudì far progress impurtants. Dapi ils 15 da zercladur 2014 circuleschan trens d'intercity supplementars mintga duas uras en il tact da mesa ura. Fin il pli tard l'onn 2022 duai quest urari vegnir extendì ad in tact integral da mesa ura. Preparada è er la prolungaziun dals trens ad auta sveltezza ICE da Hamburg e da Francfurt directamain a Cuira per il december 2015. La colliaziun cun Son Gagl è vegnida accelerada gia il december 2013 e duai vegnir concentrada en il rom da la finanziaziun ed amplificaziun da l'infrastructura da viafier (FAIV) medemamain al tact da mesa ura.
23 d’october 2014