Guerras, conflicts e la mancanza da perspectivas sin tut il mund ed en spezial en vischinanza directa dal spazi da Schengen laschan fugir nundumbraivels umans. Tenor il UNHCR èn quai passa 50 milliuns umans, uschè blers sco mai pli dapi la 2. guerra mundiala. Fugitivas e fugitivs da la Siria, da l'Irac u da stadis africans emprovan da sa render en segirezza en Europa, er cun traversadas fitg privlusas da la Mar mediterrana. En vista a las attatgas dal IS cun ses spretsch per ils umans vegn il dumber da persunas dal territori dals dus flums che tschertgan protecziun anc a s'augmentar. La marina taliana na lascha betg pli simplamain najar questas fugitivas e quests fugitivs, mabain als salva. Passa 100'000 èn arrivads uschia en noss stadi vischin dapi il cumenzament da l'onn.
Cun quest dumber d'umans vegnan ils fatgs d'asil da l'Italia e sco consequenza da quai il sistem da Dublin inflexibel a lur cunfins. En il fratemp arrivan en Svizra adina dapli umans che basegnan protecziun, 2,7 pertschient dad els vegnan attribuids da la confederaziun al chantun Grischun per la collocaziun e per l'assistenza. Questa incumbensa impurtanta è ina sfida per nus.
En ina communicaziun a las medias dals 19 da zercladur ha la regenza declerà da restar tar la pratica da la collocaziun collectiva en centers chantunals. Ella saja sa cumprovada. Però datti ussa ina mancanza acuta da plazza en ils centers chantunals. Il center d'expulsiun perifer Flüeli vegn transfurmà ad interim en in center da transit, ils abitants masculins vertents vegnan transferids en il center minimal Waldau ch'è adina puspè vegnì crititgà. Cun inserats tschertga il chantun urgentamain immobiglias ch'èn adattadas sco alloschis collectivs per ils fatgs d'asil. Da collocaziuns individualas per exempel tar famiglias renunzia el dentant.
En vista a questa situaziun vulessan las sutsegnadras ed ils sutsegnaders savair il suandant da la regenza:
1. Quant ditg dura l'utilisaziun provisorica dal center minimal Waldau sco center d'expulsiun e da l'immobiglia a Valzeina sco center da transit?
2. Co vegnan adattads ils urdens da chasa da quests centers?
3. Sco mesira d'urgenza prevesa il chantun da collocar requirentas e requirents d'asil en implants da protecziun civila ed en stabiliments militars da protecziun. Quant ditg è ina tala collocaziun sut terra supportabla per las singulas requirentas d'asil e per ils singuls requirents d'asil?
4. L'art. 40 da l'ordinaziun tar la lescha introductiva tar la legislaziun davart las persunas estras e davart ils fatgs d'asil prescriva che l'uffizi da migraziun e da dretg civil attribuescha – en cas ch'i manca in dumber suffizient da centers collectivs – umans dal sectur d'asil a las vischnancas per als collocar e per als alimentar. Cura ston las vischnancas far quint cun talas attribuziuns?
5. Examinescha il chantun collocaziuns individualas avant che obligar las vischnancas?
Cuira, ils 29 d'avust 2014
Perl, Locher Benguerel, Atanes, Baselgia-Brunner, Cahenzli-Philipp, Caviezel (Cuira), Deplazes, Gartmann-Albin, Jaag, Monigatti, Noi-Togni, Peyer, Pfenninger, Pult, Thöny
Resposta da la regenza
1. Sco mesira d'urgenza èsi stà necessari da midar l'utilisaziun dals dus centers suenter che las attribuziuns da la confederaziun èn creschidas andetgamain. Quai ha chaschunà, sco er l'utilisaziun dal bain mobigliar da reserva "Schiabach" a Tavau, che la problematica da collocaziun è sa padimada per entant. Uschespert che las capacitads chantunalas necessarias (metter en funcziun il center da transit "Rustico" a Laax ed in auter bain immobigliar) èn avant maun e/u l'attribuziun vegn reducida puspè, vegnan ils centers d'asil a Valzeina ed a Landquart, che vegnan ussa duvrads per auters intents, puspè duvrads tenor lur intent oriund sco center d'expulsiun resp. sco center minimal. L'uffizi da migraziun e da dretg civil ha in grond interess da disponer puspè da l'infrastructura correspundenta (per persunas che retschaivan agid d'urgenza e per sancziuns cunter persunas che n'èn betg pli supportablas en auters centers).
2. Ils singuls urdens da chasa èn vegnids adattads en correspundenza cun las novas utilisaziuns temporaras e tenor ils basegns individuals dals dus objects ed èn sa cumprovads. En cas da basegn pon ils urdens da chasa vegnir repassads da tut temp, er sch'ils basegns èn sa midads. Durant las ultimas emnas n'è però betg sa mussà in basegn d'adattaziun en quest reguard.
3. A partir dals 28 d'october 2014 vegn l'uffizi da migraziun e da dretg civil a prender en funcziun il stabiliment militar da truppas per la protecziun civila Plankis a la Emserstrasse a Cuira sco alloschi d'urgenza per maximalmain 100 requirentas e requirents d'asil. Ina collocaziun sut terra è acceptabla per in temp limità. Las abitantas ed ils abitants duain però vegnir dischlocads mintgamai uschè svelt sco pussaivel, il pli tard però suenter 2 mais, en in center da transit sur terra (u en cas excepziunals e sche la capacitad è avant maun, puspè en il center per l'emprima registraziun "Foral" a Cuira). En il cas normal duessi però esser pussaivel d'als attribuir ad in center da transit. Quant ditg ch'il stabiliment militar Plankis sto vegnir duvrà sco center da transit temporar dependa essenzialmain dals dumbers d'attribuziuns e da la disponibladad dals centers da transit planisads da nov. La dimora maximala da 2 mais correspunda dal rest er a la pratica da la confederaziun en centers federals temporars (Sur [Valragn], Lucmagn e.u.v.).
4. Las attribuziuns da la confederaziun mumentanas e prognostitgadas per ils proxims mais vegnan a pudair vegnir dumagnadas cun las structuras chantunalas adattadas. Il concept cumprovà da collocar collectivamain persunas en il sectur d'asil na vegn pia betg a stuair vegnir midà. Il chantun vegn mo a divergiar da quest princip en situaziuns excepziunalas extraordinarias ed ad attribuir requirentas e requirents d'asil a las vischnancas. Ina tala situaziun po natiralmain capitar, ella n'è actualmain però betg en vista, e cun las structuras chantunalas han pudì vegnir dumagnadas gia pli baud fluctuaziuns (per part anc pli grondas).
5. Collocaziuns individualas èn pussaivlas. Ellas pon vegnir tratgas en consideraziun en cas excepziunals extrems per dumagnar in basegn da collocaziun fitg grond, particularmain er, sch'el capita a curta vista. Sco menziunà sut cifra 4 na vegnan collocaziuns individualas però betg tratgas en consideraziun actualmain, perquai che las structuras chantunalas èn probablamain suffizientas per il basegn mumentan e prognostitgà.
29 d'october 2014