Tenor diversas communicaziuns en las medias planiseschan gestiunaris tudestgs da bus interurbans curs tenor urari dal / al e tras il Grischun sin il traject Minca – Cuira – Bellinzona – Lugano – Milaun e viceversa.
Quai che dat en egl èn ils pretschs bass dals bigliets che sa chattan cleramain sut quels da la viafier e da l'AutoDaPosta Grischun. Gist en connex cun l'AutoDaPosta menziunà sco ultim stoi vegnir constatà ch'il pretsch dal bus sco er dal carburant na dastgass betg esser bler pli bunmartgà per ils gestiunaris da bus interurbans che per exempel per l'AutoDaPosta SA.
Pia sa tschenta la dumonda cun tge meds ch'ils gestiunaris da bus interurbans realiseschan lur pretschs bler pli bass malgrà ina gestiun orientada al gudogn.
Tenor in rapport en l'emissiun "Tagesthemen" da la ARD dals 24 d'avust 2014 cuntrafan numerus gestiunaris da bus interurbans a prescripziuns legalas. Tenor quest rapport vegnan ultra da quai ils manischunzs mess per part massivamain sut pressiun da cuntrafar sapientivamain a las uras da guidar maximalas ed a las prescripziuns dal temp da paus. Il rapport da la ARD vegn a la conclusiun che sulettamain controllas pli frequentas na bastassan betg, mabain che er ils pretschs stoppian vegnir augmentads.
Tenor ils plans da gestiunaris da bus interurbans èsi ultra da quai planisà sin la lingia Minca – Cuira– Milaun da far pausas. A Cuira metta l'AutoDaPosta Grischun uffizialmain a disposiziun sia staziun sco fermada. Ils gestiunaris da bus interurbans da la Germania èn però suttamess ad in scumond da cabotagi, q.v.d. ch'els na dastgan prender si en Svizra – en cas d'ina partenza a Minca u a Milaun – naginas persunas che vulan viagiar mo entaifer la Svizra.
L'uffizi federal da traffic ha ultra da quai publitgà ils 10 da fanadur 2014 ina "Visiun 2030" en il rom d'in document da strategia. En quel stat tranter auter (p. 16 e p. 22) ch'i stoppian vegnir stgaffidas meglras cundiziuns generalas per il traffic transcunfinal cun bus interurbans e ch'i stoppia vegnir sviluppada ina politica concernent il traffic da bus internaziunal.
Las sutsegnadras ed ils sutsegnaders dumondan perquai la regenza il suandant:
• Tgi controlla cura, nua e quant savens ils gestiunaris da bus interurbans ch'èn activs en il Grischun u che traversan il Grischun, sche las prescripziuns legalas concernent las uras da guidar, ils temps da paus e las pausas vegnan observadas?
• Cun tge perditas finanzialas tar l'AutoDaPosta fa il chantun quint per il traject Cuira – Bellinzona pervia da la nova concurrenza? Èsi da far quint che las contribuziuns d'indemnisaziun ch'il chantun sto pajar vegnan a s'augmentar?
• Co giuditgescha la regenza las intenziuns menziunadas qua survart da l'uffizi federal da traffic concernent il traffic da bus interurbans, en spezial concernent la stabilitad da l'urari, la segirezza, la situaziun da concurrenza e la capacitad commerziala da manaschis da bus interurbans?
Cuira, ils 29 d'avust 2014
Peyer, Caviezel (Cuira), Atanes, Baselgia-Brunner, Bucher-Brini, Cahenzli-Philipp, Deplazes, Gartmann-Albin, Jaag, Locher Benguerel, Monigatti, Noi-Togni, Perl, Pfenninger, Pult, Thöny, von Ballmoos
Resposta da la regenza
1. La polizia chantunala dal Grischun sco post d'execuziun è responsabla per controllar, sche las prescripziuns da las uras da guidar e da paus sco er da las pausas da las manischunzas e dals manischunzs vegnan observadas. Ensemen cun la dumonda d'approvaziun dal manaschi da bus da lingia sto la firma dal bus interurban inoltrar ils documents da dumonda (plans da servetsch) sur l'uffizi federal da traffic (UFT) a l'uffizi d'energia e da traffic dal Grischun (UEnTr). Quests documents, particularmain ils plans da servetsch, vegnan examinads da la polizia chantunala dal Grischun (center da controlla per il traffic pesant a Riòlta sut). L'observanza da las prescripziuns correspundentas vegn confermada u i vegn rendì attent, en cas d'ina inobservanza, a l'observanza correcta da las disposiziuns legalas. Cun controllas sistematicas en il center da Riòlta sut, ma er cun controllas mobilas, vegnan controllads autocars pliras giadas per onn en furma d'emprovas da controlla. Ultra da quests geners da controlla vegnan fatgas controllas en periodas irregularas en ils manaschis da las firmas da bus. Las controllas vegnan fatgas adina puspè, quai vul dir en il rom da l'incarica da basa da la polizia. En quest connex vegn fatga ina controlla tecnica dal vehichel, ma i vegn er controllà, sche las uras da guidar e da paus sco er sche las pausas e sche ulteriuras disposiziuns legalas vegnan observadas.
2. En Svizra vala in scumond da cabotascha per colliaziuns da bus internaziunalas, q.v.d. ch'i na dastgan vegnir transportads naginas passagieras e nagins passagiers mo sin trajects parzials cun lieu da partenza e d'arriv en Svizra. Il chantun Grischun na fa pervia da quai betg quint cun perditas sin il traject Cuira – Bellinzona, perquai ch'ils bus dastgan transportar mo passagieras e passagiers da/a Milaun. Il viadi Cuira – Milaun è actualmain plitgunsch nunattractiv, perquai ch'il temp da viadi è vegnì prolungà pervia d'ina nova situaziun d'urari da vart da las VFF tranter Bellinzona e Milaun, che ha per consequenza dapi questa stad, ch'ins sto spetgar circa 50 minutas a Bellinzona. Grazia a las colliaziuns da bus interurbans survegn la clientella dal e per il Grischun puspè ina colliaziun dal traffic public attractiva a Milaun. Eventualas perditas minimalas tar las passagieras ed ils passagiers che viagian sur Bellinzona a Milaun (u viceversa) dastgassan vegnir cumpensadas dal fatg ch'ils bus da lingia transcunfinals portan ulteriurs giasts en il Grischun, che frequentan puspè qua la rait dal traffic public. Ni sin il traject Cuira – Bellinzona ni en tut stoi perquai vegnir fatg quint cun in augment da las contribuziuns d'indemnisaziun dal chantun pervia da la purschida transcunfinala nova. La regenza resguarda questa purschida sco cumplettaziun raschunaivla da l'ulteriur traffic public e betg sco concurrenza e privel.
3. Ils exempels da la Germania mussan ch'igl exista in potenzial commerzial per colliaziuns da bus interurbans. Quai en spezial là, nua che las colliaziuns cun la viafier na correspundan betg als basegns da la clientella. Areguard il Grischun pertutga quai mo las colliaziuns en las metropolas vischinas Milaun e Minca. Ina purschida attractiva da traffic da bus transcunfinal è er en l'interess dal chantun Grischun. Cun quella po l'ulteriura purschida dal traffic public vegnir cumplettada en moda raschunaivla. Bus da lingia transcunfinals avran novs segments da clientella per il traffic public – per exempel per giuvenils u per persunas che giessan uschiglio cun l'auto en vacanzas.
Perquai resguarda la regenza las intenziuns dal UFT da meglierar las cundiziuns generalas per il traffic transcunfinal, cun bus interurbans, sco adequatas e – almain per il perimeter Grischun – sco tut en tut betg problematicas areguard la concurrenza per la purschida existenta. En quai che concerna la segirezza resp. la controlla da l'observanza da las disposiziuns legalas poi vegnir renvià a las explicaziuns qua survart. Cun consequenzas per la stabilitad da l'urari na vegni betg fatg quint.
23 d’october 2014