Tenor la realisaziun da la refurma da la GF è l'incumbensa da la cussegliaziun per mammas e per babs – post spezialisà per geniturs da poppins e d'uffants pitschens – da nov sulettamain chaussa dal chantun. Perquai è ils 20 da november 2014 vegnida lantschada ina publicaziun concernent la surdada da l'incumbensa da la cussegliaziun per mammas e per babs. La publicatransfurmaziuns ziun è vegnida fatga cunter tuttas aspectativas mo per purschiders che offreschan per tut il territori chantunal.
Ils 24 da mars 2015 ha la regenza decidì da surdar la cussegliaziun per mammas e per babs (CMB) en il Grischun per in pretsch dad 800 francs per uffant en l'emprim onn da vita. L'incumbensa ha survegnì l'uniun cussegliaziun d'uffants e da giuvenils (KJBE) a Cuira.
Sinaquai ha l'uffizi da sanadad dal Grischun incumbensà la KJBE d'installar e da manar la nova organisaziun da la cussegliaziun per mammas e per babs en il Grischun per il 1. da schaner 2016. La contribuziun da gestiun per l'onn 2016 importa pia 1,448 milliuns francs.
Ina concurrenta è er stada l'uniun cussegliaziun per mammas e per babs dal Grischun (CMB GR) ch'è vegnida fundada da nov aposta per quai or da las instituziuns responsablas CMB vertentas. Las offertas da tuttas duas purschidas (KJBE e CMB GR) èn stadas pli charas che la tariffa dad 800 francs per uffant en l'emprim onn da vita. La KJBE ha offrì per 890 francs, l'uniun CMB GR per 958 francs. Sin basa da la planisaziun da las finanzas per l'onn 2016 ha la regenza fixà en ses conclus in import maximal dad 800 francs per uffant ed ha incumbensà l'uffizi da sanadad d'elavurar ina soluziun cun l'uniun KJBE. Sa basond sin las reglas da submissiun èsi surprendent e contestà ch'igl è vegnì tractà mo cun la KJBE, dentant betg cun l'uniun CMB GR.
En la publicaziun uffiziala da la regenza dals 20 da november 2014 èn vegnidas definidas detagliadamain las pretensiuns e las caracteristicas da qualitad davart la scolaziun, la furmaziun supplementara, la classificaziun concernent il salari, il reglament da persunal ed ils indrizs d'informatica che la nova instituziun responsabla sto ademplir. En cas da l'uniun KJBE chaschuna la decisiun da la regenza malgrà tut ina reducziun annuala dals meds finanzials disponibels da circa 160 000 francs.
Perquai ch'il chantun è tenor lescha responsabel per l'incarica da prestaziuns da servetsch da la cussegliaziun per mammas e per babs e perquai che quest servetsch sto vegnir purschì vinavant, tschentan las sutsegnadras ed ils sutsegnaders las suandantas dumondas:
1. La regenza è persvasa che las persunas responsablas da la KJBE vegnan a s'engaschar per ina purschida da cussegliaziun d'emprima qualitad. Nua datti – en il cas concret – differenzas e nua pon vegnir fatgas meglieraziuns envers la purschida da cussegliaziun vertenta?
2. Per tge motivs n'èn betg tuttas duas uniuns vegnidas envidadas a novas tractativas, particularmain, perquai che tuttas duas offertas eran pli charas ch'il pretsch dad 800 francs per uffant en l'emprim onn da vita, che la regenza ha fixà posteriuramain?
3. Co vesa ora la realisaziun concreta dal concept da cussegliaziun e nua vegn eventualmain scursanida l'incumbensa da prevenziun da la CMB, sche la pauschala che stat a disposiziun per uffant per la cussegliaziun en ils emprims trais onns da sia vita importa mo 800 francs?
4. Co vesa ora la realisaziun concreta dal profil d'exigenzas per tut las cussegliadras da mammas per exempel concernent il studi supplementar ad in diplom CMB (diplom professiunal superiur) che l'uffizi da sanadad ha pretendì en la publicaziun dals 20 da november 2014?
5. Tge uffizi fa la surveglianza e porta la responsabladad per la KJBE en quai che concerna la realisaziun e la garanzia da qualitad en la CMB?
6. Tge signifitga il transferiment en la nova organisaziun per il persunal ch'è engaschà tar l'instituziun responsabla vertenta?
Cuira, ils 21 d'avrigl 2015
Rutishauser, Baselgia-Brunner, Hardegger, Albertin, Atanes, Blumenthal, Bucher-Brini, Buchli-Mannhart, Caduff, Cahenzli-Philipp, Casty, Casutt-Derungs, Caviezel (Cuira), Clalüna, Darms-Landolt, Deplazes, Dosch, Foffa, Gartmann-Albin, Geisseler, Jaag, Jeker, Kollegger, Locher Benguerel, Lorez-Meuli, Mani-Heldstab, Märchy-Caduff, Marti, Michael (Donat), Monigatti, Niggli-Mathis (Grüsch), Noi-Togni, Perl, Pult, Thöny, Tomaschett-Berther (Trun), Widmer-Spreiter, Gugelmann, Vassella
Resposta da la regenza
Sin la publicaziun da la cussegliaziun per mammas e per babs èn vegnidas inoltradas duas candidaturas. Perquai ch'ils custs da realisaziun dad 890 francs per uffant offrids da l'uniun KJBE eran per 10 pertschient sur la media che stat a disposiziun tenor la valur dal plan da finanzas, è l'uffizi da sanadad vegnì incumbensà d'adattar ensemen cun la petenta l'incarica da prestaziun definida en la publicaziun uschia, ch'ella po vegnir realisada cun ils meds finanzials disponibels dad 800 francs per uffant.
La regenza respunda las dumondas concretas sco suonda:
1. La purschida da cussegliaziun actuala è caracterisada da la cussegliadra per mammas e per babs ch'è mintgamai responsabla e sa differenziescha pulitamain da regiun a regiun. Uschia datti en intginas regiuns praticamain mo visitas a chasa, entant che autras regiuns han dapli cussegliaziuns en ils posts da cussegliaziun.
Il concept da cussegliaziun da l'uniun KJBE persvada tras quai ch'igl è previs da realisar la prescripziun da la cussegliaziun per mammas e per babs en l'entir territori chantunal. Cun otg centers da cussegliaziun principals e cun diesch centers da cussegliaziun secundars èsi uschia previs ch'ils centers da cussegliaziun sajan repartids sin l'entir territori chantunal. Per geniturs che abitan in pau pli lunsch davent dals centers da cussegliaziun principals e secundars, prevesa il concept da cussegliaziun dapli visitas a chasa.
L'uniun KJBE ha tant experientscha cumprovada en il sectur da l'assistenza d'uffants e da giuvenils sco er experientscha cumprovada da direcziun e da management. Ella ha ina buna rait ed è etablida fitg bain en il chantun. Tras l'integraziun organisatorica da la cussegliaziun per mammas e per babs en la structura organisatorica existenta da l'uniun po la cussegliaziun per mammas e per babs profitar dals servetschs existents da l'uniun (persunal / furmaziun supplementara, finanzas, relaziuns publicas, incasso e.u.v.). Plinavant existan sinergias impurtantas tranter la cussegliaziun per mammas e per babs ed auters secturs da fatschenta da l'uniun. Questas sinergias èn il motiv per l'offerta pli favuraivla.
2. Tras quai che la purschida era bler meglra tant areguard il pretsch sco er areguard la qualitad, è l'incumbensa vegnida surdada a l'uniun KJBE. Las discussiuns davart l'adattaziun da la purschida da prestaziuns a la summa reducida han correspundentamain gì lieu mo cun l'uniun KJBE.
3. La realisaziun concreta dal concept è chaussa da l'uniun KJBE e da la manadra u dal manader elegì tras l'uniun. La summa dad 800 francs per uffant, che stat a disposiziun a l'uniun KJBE, correspunda a la contribuziun ch'il chantun e las vischnancas pajavan fin ussa per uffant als servetschs da la cussegliaziun per mammas e per babs. Ina reducziun da la purschida na vegn pia betg ad avair lieu.
4. Las cussegliadras che lavuran a partir da l'onn 2016 en la cussegliaziun per mammas e per babs en il chantun ston absolver in studi supplementar ad in diplom renconuschì en cussegliaziun per mammas e per babs, nun ch'ellas hajan gia la scolaziun correspundenta. En quest connex vegn guardà ch'i sajan adina mo tantas persunas en scolaziun, che l'incarica da prestaziun possia vegnir ademplida da tut temp.
5. La surveglianza da la cussegliaziun per mammas e per babs è chaussa da l'uffizi da sanadad.
6. Ils 27 da matg 2015 ha l'uniun KJBE organisà in'occurrenza d'infurmaziun per tut las cussegliadras da las organisaziuns existentas da la cussegliaziun per mammas e per babs che lavuran en il chantun. Las persunas ch'èn engaschadas tar las instituziuns purtadras actualas han la pussaivladad da s'annunziar tar l'uniun sco cussegliadras per mammas e per babs. L'uniun KJBE ha l'intenziun d'occupar – uschenavant sco pussaivel – vinavant las cussegliadras d'enfin ussa. L'uniun ha dentant la cumpetenza d'eventualmain surdar pensums da lavur pli gronds ed uschia d'engaschar damain persunal.
25 da zercladur 2015