Sa basond sin la lescha per promover il svilup economic ha il parlament grischun deliberà meds finanzials chantunals da 10,5 milliuns francs a favur dal program da turissem dal Grischun 2014–2021, e quai en il rom d'in credit d'impegn net ed en il rom da la nova politica regiunala da la confederaziun. Sur il program da promoziun federal Innotour èn medemamain vegnids mess a disposiziun meds finanzials federals da 10,5 milliuns francs per realisar il program da turissem. Tut en tut stattan a disposiziun 21 milliuns francs per promover il program da turissem dal Grischun per ils onns 2014 fin 2021.
Il cussegl grond conceda a Grischun vacanzas (GRV) mintga onn credits en l'autezza da circa 7,5 milliuns francs. GRV furnescha las prestaziuns per incumbensa dal chantun en il rom d'ina cunvegna da prestaziun.
En vista a la Surselva/Grischun ed al martgà en mira che dumbra ina gronda populaziun e che sa chatta en ils stadis ed en las citads dasper il Rain tschentan las sutsegnadras ed ils sutsegnaders las suandantas dumondas:
1. Co pensa GRV d'elavurar il martgà en mira il pli impurtant che sa chatta per lung dal Rain cun ils meds finanzials ch'il parlament ha mess a disposiziun?
2. Tge criteris valan resp. tge pussaivladads datti per ch'ils purschiders da prestaziuns turisticas ch'èn orientads a la valurisaziun possian profitar en moda orientada al project dals daners per promover il turissem?
3. Quals orizonts da planisaziun e da decisiun valan per dumandar daners da promoziun per projects cun ina irradiaziun sin il turissem e sin l'economia publica?
4. En tge dimensiun stattan tals daners a disposiziun per onn resp. quant dal budget da GRV è mintgamai gia lià ad intents specifics?
5. Tge cundiziuns generalas creescha la regenza e tge chapescha ella concretamain sco talas, per ch'i possian resultar projects individuals?
Cuira, ils 21 d'avrigl 2015
Tomaschett-Berther (Trun), Jeker, Alig, Albertin, Blumenthal, Brandenburger, Buchli-Mannhart, Burkhardt, Caluori, Casutt-Derungs, Caviezel (Tavau Clavadel), Danuser, Darms-Landolt, Dosch, Epp, Fasani, Giacomelli, Heiz, Joos, Kunfermann, Kunz (Fläsch), Lorez-Meuli, Märchy-Caduff, Müller, Nay, Niederer, Niggli (Samedan), Niggli-Mathis (Grüsch), Noi-Togni, Papa, Pedrini, Rosa, Salis, Sax, Steck-Rauch, Tenchio, Tomaschett (Breil), Troncana-Sauer, Waidacher, Zanetti, Cajacob, Erhard, Heini, Panzer
Resposta da la regenza
Per ils onns 2014 fin 2021 stattan a disposiziun 21 milliuns francs per promover l'innovaziun e la cooperaziun en il turissem grischun. Ils meds finanzials vegnan concedids en il rom da la nova politica regiunala da la confederaziun (NPR) e pajads mintgamai per la mesadad da la confederaziun e dal chantun.
A l'uniun Grischun vacanzas (GRV) vegnan pajads mintga onn 6,37 milliuns francs per ademplir las incumbensas tenor la cunvegna da prestaziun cun il chantun. Ulteriurs 1,2 milliuns francs stattan a disposiziun a GRV en connex cun la gestiun da la marca "graubünden" e cun la campagna dals capricorns "Enavant Grischun".
Tar la dumonda 1: La strategia da plirs onns 2014–2018 da GRV prevesa da realisar activitads da marketing tranter auter sin ils martgads da la Germania e dals stadis BeNeLux (martgads en mira per lung dal Rain). Sa basond sin la strategia da plirs onns deliberescha la suprastanza da GRV mintga onn plans da marketing. ll model da fatschenta da GRV sa basa sin in concept da cumpetenza e da partenadi. Tut las furnituras ed ils furniturs da prestaziuns turisticas sco er las organisaziuns turisticas èn libras da sa participar a las activitads da GRV. Il chantun na prenda nagina influenza directa sin la realisaziun operativa da la strategia da GRV, mabain definescha en ina cunvegna da prestaziun las finamiras ed ils effects che duain vegnir cuntanschids.
Tar la dumonda 2: La basa per promover il turissem en il chantun Grischun èn la lescha per il svilup economic (LSE) e l'ordinaziun per il svilup economic (OSE). Sa basond sin l'OSE regla il departament ils detagls per conceder prestaziuns da promoziun en directivas correspundentas. Tut las directivas da promoziun, er quellas davart la realisaziun dal program da turissem GR 2014–2021, èn disponiblas publicamain ed èn enconuschentas suffizientamain en ils circuls turistics (http://www.gr.ch/DE/institutionen/verwaltung/dvs/awt/dokumentation/Seiten/
Tourismusentwicklung.aspx).
Tar la dumonda 3: Dumondas da promoziun ston vegnir inoltradas stringentamain avant che cumenzar cun las lavurs u cun la construcziun. Cas cuntrari scroda la concessiun da contribuziuns (art. 45 da la lescha da finanzas). Dumondas inoltradas vegnan elavuradas immediatamain dal post da servetsch cumpetent. En cas da projects pli gronds sto l'instituziun ch'è responsabla per il project calcular avunda temp per elavurar la basa dals projects, en spezial sch'i ston vegnir integrads ulteriurs secturs politics.
Tar la dumonda 4: Per il program da turissem GR 2014–2021 ha il cussegl grond concedì in credit d'impegn net da 10,5 milliuns francs. Ensemen cun ils meds finanzials da la confederaziun stattan a disposiziun totalmain 21 milliuns francs. Per l'onn 2015 èn budgetads 2,6 milliuns francs, 1,3 milliuns francs da quels vegnan finanziads da la confederaziun. Pussaivlas èn expensas supplementaras da fin a 20 pertschient d'in credit d'impegn per onn, senza ch'i stoppia vegnir dumandà in credit posteriur.
La planisaziun da l'onn da GRV è mintgamai terminada cun l'approvaziun dal preventiv da GRV tras la suprastanza da GRV. Suenter ha lieu la realisaziun operativa. Il spazi d'agir per mesiras spezialas a curta vista è limità.
Tar la dumonda 5: En il rapport "Svilup economic en il chantun Grischun" (missiva 5/2014–2015) mussa la regenza differentas direcziuns per stgaffir cundiziuns generalas adattadas. La LSE furma la basa per promover l'economia en il senn pli stretg. La finamira centrala resta la promoziun da projects d'infrastructura e da cooperaziun sco er d'occurrenzas. Da quai duain profitar interpresas sco er instituziuns activas ed innovativas ch'èn responsablas per ils projects.
28 da matg 2015