En l'ambient economic actual è l'abilitad d'innovaziun da la Svizra, en spezial er dal chantun Grischun, in factur central en la concurrenza naziunala ed internaziunala tranter ils lieus. Cun ils instituts da perscrutaziun e cun las organisaziuns da transfer, ch'èn domiciliadas en il chantun e respectadas sin l'entir mund, ha il chantun Grischun in fundament fitg empermettent per realisar en il futur il transfer da savida e da tecnologia tranter la perscrutaziun e l'economia. L'impurtanza economica sa mussa tranter auter er cleramain en il rapport davart il svilup economic en il chantun Grischun ed en las strategias regiunalas per il svilup da l'economia locala. Regiuns respectivas, oravant tut il lieu da perscrutaziun Tavau, han fatg patratgs davart l'ulteriur svilup ed han accelerà en vastas gruppas da lavur il process per fixar temas centrals.
Il dossier da candidatura ch'il chantun ha inoltrà ils 27 da mars 2014 a la conferenza dals directurs chantunals da l'economia publica (CDE) per l'installaziun d'in lieu da rait dal parc d'innovaziun naziunal en il Grischun, è vegnì evaluà da la CDE. En il concept da realisaziun che la CDE ha deliberà per mauns dal departament federal d'economia, furmaziun e retschertga (DEFR) e ch'è vegnì valità dal cussegl federal, èn mo dus da totalmain otg lieus da rait vegnids integrads en la configuraziun da partenza a partir da l'onn 2016. Entant che la confederaziun ha resguardà ils lieus da rait dal chantun Argovia e da la Svizra dal nordvest, èn las persunas responsablas per il project en il Grischun vegnidas supplitgadas da repassar il concept e d'inoltrar fin ils 31 da mars 2015 ina nova candidatura en il rom da la procedura posteriura. En il fratemp ha il cussegl federal confermà Bienna sco ulteriur lieu da rait dal parc d'innovaziun naziunal.
Da la pressa èn ins vegnì a savair ch'il chantun Grischun saja sa decidì da desister da repassar la candidatura per la configuraziun da partenza e ch'el emprovia pir pli tard da s'associar al parc d'innovaziun. Tenor la missiva dal cussegl federal dals 6 da mars 2015 davart la concepziun ed il sustegn dal parc svizzer d'innovaziun «èsi impurtant per l'abilitad da svilup dal parc d'innovaziun che lieus pon s'associar er pli tard a la fundaziun Swiss Innovation Park (...). La pussaivladad d'agiuntar ulteriurs lieus a la fundaziun è garantida da tut temp.» (missiva dal cussegl federal dals 6 da mars 2015 davart la concepziun ed il sustegn dal parc svizzer d'innovaziun, cifra 2.4.3, p. 26).
En vista als rapports da las medias ed a las explicaziuns da l'uffizi per economia e turissem dal Grischun vegn la regenza supplitgada da respunder las suandantas dumondas:
1. Per tge motivs n'è il concept dal lieu da rait en il Grischun betg vegnì resguardà per la configuraziun da partenza dal parc d'innovaziun naziunal?
2. Datti posiziuns uffizialas da la confederaziun davart la motivaziun da desister (provisoricamain) d'in lieu da rait en il Grischun? Pon ins prender invista da talas?
3. Per tge motivs èsi vegnì desistì d'inoltrar in dossier repassà en il rom da la procedura posteriura?
4. Co quinta la regenza da colliar en moda empermettenta in lieu da rait en il Grischun cun la fundaziun Swiss Innovation Park suenter la procedura posteriura?
5. È la strategia cun dus sublieus a Tavau ed en la Val dal Rain grischuna previsa er en il concept repassà? Tge schanzas e tge ristgas cuntegna questa strategia? Sut tge premissas pudess la regenza sa decider per in concept cun in lieu?
6. En tge reguard vegnan integradas en il nov concept cooperaziuns cun la scola politecnica federala Turitg, cun autras scolas autas ed eventualmain cun ils lieus centrals e cun ils lieus da rait?
7. Tge activitads ha il chantun fatg fin oz per betg perder investiders, ch'i dat senza dubi per tals projects?
8. Tge cundiziuns generalas stgaffescha la regenza, per ch'ina associaziun al parc d'innovaziun naziunal daventia uschè empermettenta sco pussaivel?
9. Co sa preschenta l'urari per realisar en moda empermettenta l'associaziun al parc d'innovaziun naziunal?
Arosa, ils 17 da zercladur 2015
Caviezel (Tavau Clavadel), Stiffler (Tavau Plaz), Alig, Baselgia-Brunner, Brandenburger, Buchli-Mannhart, Burkhardt, Caduff, Cavegn, Clavadetscher, Danuser, Deplazes, Engler, Felix (Scuol), Giacomelli, Grass, Gunzinger, Hardegger, Heiz, Hitz-Rusch, Holzinger-Loretz, Jeker, Jenny, Kappeler, Kasper, Koch (Igis), Kunz (Cuira), Kuoni, Mani-Heldstab, Mathis, Michael (Donat), Müller, Niggli (Samedan), Niggli-Mathis (Grüsch), Papa, Pedrini, Peyer, Pfäffli, Pfenninger, Pult, Salis, Sax, Schneider, Schutz, Steiger, Stiffler (Cuira), Thomann-Frank, Toutsch, Troncana-Sauer, Valär, von Ballmoos, Waidacher, Weber, Weidmann, Wieland, Berther (Segnas), Bossi, Gujan-Dönier
Resposta da la regenza
Tar la dumonda 1: Tenor il giudicament dal gremi d'experts èn – per resumar – ils suandants motivs principals stads decisivs ch'il Grischun n'è betg vegnì resguardà per la configuraziun da partenza: la grondezza critica sco lieu per in parc d'innovaziun n'è betg dada; ils partenaris scientifics han profils fitg eterogens; tranter ils partenaris scientifics sezs sco er tranter ils partenaris scientifics ed ina basa industriala n'èn las cumpetenzas betg colliadas ina cun l'autra en ils lieus; a Tavau ed a Landquart èn avant maun differentas finamiras; il dossier n'è betg madir avunda en quai che reguarda la planisaziun dal territori; ina domiciliaziun da la partiziun da perscrutaziun e svilup (P+S) d'ina firma pli gronda è pauc probabla.
Tar la dumonda 2: La candidatura dal Grischun sco lieu da rait è vegnida giuditgada d'in gremi d'experts nominà da la conferenza dals directurs chantunals da l'economia publica (CDE) per incumbensa da la confederaziun. La confederaziun sa basa sin quest giudicament. Da quest giudicament na poi betg vegnir prendì invista publicamain.
Tar la dumonda 3: En il rom da la procedura posteriura èsi sa mussà che la correctura substanziala na po betg vegnir cuntanschida entaifer il termin fixà, quai en spezial areguard la grondezza critica, areguard il fatg che las cumpetenzas n'èn betg colliadas ina cun l'autra tranter ils partenaris scientifics sezs sco er tranter ils partenaris scientifics e l'industria, e la finala areguard il fatg che las interpresas industrialas n'èn betg prontas d'investir en il lieu.
Tar la dumonda 4: Actualmain vegnan examinadas l'opziun da meglierar il dossier e d'integrar quel pli tard sco lieu da rait independent sco er l'opziun da colliar il Grischun cun in lieu da rait da la configuraziun da partenza u cun in lieu central. Schanzas realisticas han tuttas duas opziuns mo, sch'i reussescha d'obtegnair interpresas da renum per in engaschament en il Grischun sco lieu da rait.
Tar la dumonda 5: Tant il lieu da perscrutaziun Tavau sco er il lieu da perscrutaziun e d'industria Val dal Rain grischuna vegnan integrads er vinavant en las ponderaziuns. Auter na dastgassi betg esser pussaivel d'ademplir ils criteris, en spezial betg quel da la grondezza critica. Decisiva è perquai la meglra colliaziun pussaivla tranter ils instituts da perscrutaziun sezs sco er tranter la perscrutaziun e l'industria.
Tar la dumonda 6: En il rom dals scleriments currents vegnan evaluadas gist talas pussaivladads da cooperaziun. Tranter auter vegn examinada la colliaziun dal lieu da perscrutaziun Grischun cun l'universitad da Turitg, cun la scola politecnica federala Turitg e cun partiziuns da perscrutaziun e da svilup d'interpresas industrialas. A medem temp vegni er sclerì, sch'i fiss pussaivel e raschunaivel da collavurar cun il lieu central Turitg/Dübendorf u cun auters lieus da rait existents u potenzials.
Tar la dumonda 7: En il rom da l'inoltraziun dal concept dal Grischun sco lieu da rait ha il chantun contactà, en stretga collavuraziun cun ils instituts da perscrutaziun a Tavau, las pli differentas interpresas cun la finamira d'obtegnair quellas – cun agid da decleraziuns d'intenziun – per ina cooperaziun al Grischun sco lieu da rait. Diversas firmas ch'èn activas sin plaun internaziunal han mussà interess ed han examinà l'extensiun da cooperaziuns. La prontezza da far investiziuns en l'infrastructura è plitgunsch pitschna, perquai che clers effects da niz n'han betg (anc) pudì vegnir preschentads. Sut la premissa ch'il cussegl grond approveschia la revisiun totala da la lescha per il svilup economic e – collià cun quai – ch'el concedia il credit d'impegn per investiziuns relevantas per il sistem, pudess il chantun prestar ina contribuziun per endrizzar l'infrastructura necessaria, en cas ch'igl è avant maun ina strategia da svilup regiunala che cumpiglia er la perscrutaziun.
Tar la dumonda 8: Suenter ch'il giudicament da la procedura posteriura è stada avant maun, ha il chantun Grischun nominà in team da project. Quel examinescha, sch'i para anc adina pussaivel da realisar in lieu da rait independent sco er sche ed
– en cas d'ina resposta positiva – tge pussaivladads da colliaziun che fissan raschunaivlas. Ina impurtanza centrala ha la dumonda, sch'i reussescha als instituts da perscrutaziun a Tavau da sa colliar in cun l'auter e d'obtegnair interpresas da renum per ina investiziun al lieu ed uschia er per ina cooperaziun al parc d'innovaziun naziunal.
Tar la dumonda 9: Il concept existent vegn sviluppà vinavant ensemen cun ils instituts da perscrutaziun fin l'emprim quartal da l'onn 2016. Sin basa da tal duai vegnir decidì, tgenina ch'è la colliaziun la pli empermettenta cun il parc d'innovaziun naziunal.
27 d'avust 2015