Navigation

Inhaltsbereich

Incumbensa Nay concernent las premissas fundamentalas per las instituziuns responsablas per la scola per metter a disposiziun structuras dal di

Sessiun: 09.12.2015

Il basegn che crescha ad in crescher da rablar la professiun e la famiglia sut in tetg pretenda che las structuras dal di vegnian extendidas permanentamain. Perquai ch'il basegn d'annunziar ils uffants tras ils geniturs u tras las persunas che han l'obligaziun da mantegniment è gia cumprovà e perquai che las vischnancas che survegnan almain otg annunzias èn obligadas da metter a disposiziun questas structuras, stoi vegnir fatg quint che las investiziuns creschian fermamain en l'avegnir en il sectur dals centers dal di per uffants.

 

Lescha davart las scolas popularas dal chantun Grischun (lescha da scola)
Art. 27 Structuras dal di
1 En cas da basegn porschan las instituziuns ch'èn responsablas per la scola structuras dal di supplementaras.
2 Las persunas cun la pussanza dals geniturs èn libras da profitar da las structuras dal di per lur uffants.

 

Perquai che l'activitad professiunala n'è betg ina premissa per metter a disposiziun ina plazza da tgira sa mida forsa l'idea raschunaivla da "famiglia e professiun" en "famiglia e dapli temp liber senza uffants".

 

Ordinaziun davart ulteriuras structuras dal di (ordinaziun davart structuras dal di)
Art. 6 Obligaziun da purschida
2 In basegn è avant maun, sche las persunas cun la pussanza dals geniturs d'almain otg scolaras e scolars d'in lieu da scola s'obligheschan da profitar d'ina tscherta unitad d'assistenza per il proxim onn da scola.

 

Las sutsegnadras ed ils sutsegnaders incumbenseschan la regenza:
da midar la lescha da scola uschia ch'ina activitad professiunala è ina premissa centrala per ina instituziun ch'è responsabla per la scola da metter a disposiziun structuras dal di e ch'il pensum da tgira ha da correspunder al pensum da lavur.

 

Precisaziun dal dretg

- En cas da persunas ch'educheschan sulettas: p.ex. in pensum da lavur da 40 pertschient dat il dretg da 2 dis da tgira.

- En cas da famiglias cun duas pajas è decisiv il pensum da lavur cumulà minus 100 pertschient: p.ex. partenari X lavura 80 pertschient, partenaria Y 60 pertschient, uschia ch'i resulta il dretg d'in pensum da tgira da 40 pertschient, pia da 2 dis da tgira.

 

Cuira, ils 9 da december 2015

 

Nay, Widmer-Spreiter, Bleiker, Brandenburger, Casanova (Glion), Crameri, Danuser, Davaz, Epp, Felix (Scuol), Foffa, Grass, Heinz, Hug, Jenny, Joos, Koch (Tumein), Koch (Igis), Mathis, Müller, Niederer, Paterlini, Salis, Schutz, Stiffler (Tavau Plaz), Toutsch, Weber

Resposta da la regenza

Per purschidas renconuschidas en il sectur d'ulteriuras structuras dal di èsi vegnì fatg diever durant l'onn da scola 2013/14 da totalmain 233 107 unitads d'assistenza en 44 instituziuns responsablas per la scola e durant l'onn da scola 2014/15 da totalmain 225 971 unitads d'assistenza en 54 instituziuns responsablas per la scola. Malgrà ch'il dumber d'instituziuns responsablas per la scola cun purschidas renconuschidas è creschì, è il dumber d'unitads d'assistenza duvradas en il chantun Grischun sa reducì il segund onn da cumparegliaziun suenter l'entrada en vigur da la lescha davart las scolas popularas dal chantun Grischun dals 21 da mars 2012 (lescha da scola; DG 421.000) e da l'ordinaziun davart ulteriuras structuras dal di dals 19 da mars 2013 (lescha davart structuras dal di; DG 421.030).

Tenor l'ordinaziun pon ulteriuras structuras dal di cumpigliar purschidas da la tgira d'avantmezdi, da la tgira da mezdi e da la tgira da suentermezdi. 52 da las 54 instituziuns ch'èn responsablas per la scola cun ulteriuras structuras dal di renconuschidas porschan ina tgira da mezdi (130 417 unitads l'onn 2014/15). La gronda part da las instituziuns responsablas per la scola porschan sulettamain la tgira da mezdi e mo en 23 savens plitost grondas instituziuns responsablas per la scola exista ultra da quai in basegn per la tgira da suentermezdi. La tgira d'avantmezdi vegn purschida mo en quatter instituziuns responsablas per la scola.

Las scolaras ed il scolars da la gronda part da las instituziuns responsablas per la scola na fan betg diever facultativamain da la purschida da la tgira da mezdi, mabain per motivs geografics. Saja quai perquai che bleras vischnancas dal chantun na pon betg pli manar in'atgna scola pervia da la diminuziun da las naschientschas u perquai che differentas vischnancas cumpiglian fracziuns ch'èn per part situadas en moda fitg sparpagliada. Las scolaras ed ils scolars pertutgads van pervia da quai a scola – normalmain cun meds da transport publics – en in lieu central en la val u en la regiun e na pon perquai betg turnar a chasa sur mezdi pervia dal lung viadi da scola u pervia da colliaziuns da traffic disfavuraivlas. Plinavant na lavuran bleras persunas cun la pussanza dals geniturs betg en lur lieu da domicil e na pon perquai betg esser a chasa sur mezdi. Spezialmain persunas che lavuran a temp parzial e che lavuran resp. che ston lavurar mintga di e ch'èn perquai er mintga di dependentas da purschidas d'assistenza, na pudessan dentant betg pli far diever da quellas sin basa da la regulaziun proponida en l'incumbensa Nay.

Per scolaras e scolars da lingua estra gidan las purschidas da las ulteriuras structuras dal di – independentamain dal pensum da lavur da las persunas cun la pussanza dals geniturs – ultra da quai d'emprender la lingua e pia da s'integrar en la societad.

Tenor l'art. 13 da l'ordinaziun paja il chantun contribuziuns da 2 francs per unitad d'assistenza da la tgira d'avantmezdi e da la tgira da suentermezdi e da 3 francs per la tgira da mezdi als custs da las purschidas d'assistenza da las instituziuns ch'èn responsablas per la scola. Las instituziuns ch'èn responsablas per la scola ston pajar tenor l'art. 9 da l'ordinaziun ina contribuziun als custs d'almain la medema dimensiun sco il chantun. L'autezza dals custs da las instituziuns ch'èn responsablas per la scola per las purschidas d'assistenza dependa dal cuntegn da la purschida e variescha perquai fermamain. I po dentant vegnir supponì che tar la gronda part da las instituziuns ch'èn responsablas per la scola vegn la part essenziala dals custs surpigliada da las persunas cun la pussanza dals geniturs.

La regenza na po betg excluder che singulas persunas cun la pussanza dals geniturs che lavuran mo parzialmain u che na lavuran betg, laschan far diever lur uffants da questas purschidas d'assistenza e procuran uschia per dapli "temp liber senza uffants" per ellas sezzas. Sin fundament da la situaziun geografica menziunada en grondas parts da noss chantun e sin basa da la repartiziun dals custs tranter las persunas cun la pussanza dals geniturs, las instituziuns responsablas per la scola ed il chantun poi dentant vegnir fatg quint ch'i sa tracta qua mo da paucs cas singuls en singulas instituziuns ch'èn responsablas per la scola.

Betg d'emblidar è er la lavur administrativa supplementara considerabla che la realisaziun da la regulaziun proponida en l'incumbensa chaschunass per las instituziuns ch'èn responsablas per la scola e per il chantun. Ils pensums da lavur actuals da las persunas cun la pussanza dals geniturs stuessan vegnir registrads regularmain. La controlla da las indicaziuns po – sche insumma – vegnir garantida mo investind bler temp e lavur. En differentas professiuns, branschas e furmas d'engaschament (plazzas a temp parzial, substituziuns, pichet e.u.v.) po il pensum sa midar pliras giadas er entaifer in onn.

Per ils motivs menziunads refusa la regenza l'incumbensa.

24 da favrer 2016