La "digitalisaziun" transfurma la societad e l'economia svelt ed en moda decisiva. Ils impuls sin la societad d'infurmaziun e da savida han in effect direct per il svilup economic e pon influenzar uschia positivamain la persistenza e la prosperitad. L'infrastructura da communicaziun è in element central per quest svilup.

Ils process da fatschenta innovativs ed adattads a la globalisaziun vegnan ad avair in effect decisiv per il mastergn, per l'industria e per il turissem. Da giuditgar endretg questas midadas è l'incumbensa da mintga singula interpresa e pretenda er in entretschament da las interpresas e dals furniturs da prestaziuns p.ex. a favur dal giast en il sectur dal turissem. Per las interpresas èsi er decisiv ch'i stettia a disposiziun ina infrastructura da rait efficazia, fidada e segira. Grazia a las purschidas da differentas interpresas da telecommunicaziun exista in martgà correspundent e la concurrenza che resulta da quel na duai betg vegnir impedida d'intervenziuns da vart dal stadi.

La digitalisaziun en il senn da la transfurmaziun digitala da process e da models da fatschenta è ina schanza per il Grischun cun ses abitadis decentrals. Ella porscha potenzial per mantegnair e per stgaffir plazzas da lavur novas e per satisfar als basegns dals giasts e da la populaziun indigena. I vala da profitar da questa schanza, perquai che plazzas da lavur vegnan er ad ir a perder pervia da la digitalisaziun. Correspundentamain ston er las purschidas da scolaziun e da furmaziun supplementara tegnair quint dals giavischs midads e da las pretensiuns modifitgadas.

La regenza resta tar sia strategia vertenta ch'ella ha communitgà gia differentas giadas da surlaschar l'amplificaziun e l'extensiun da l'infrastructura, che progredeschan svelt en tut il chantun, al martgà, che sa drizza tenor ils giavischs da la clientella. Tuttina èsi impurtant d'analisar detagliadamain las sfidas actualas e futuras e d'identifitgar ils deficits ch'existan. La regenza è pronta d'elavurar ina strategia sco er in plan da mesiras correspundent, che cuntegna miras, per mussar, co ch'in provediment optimal cun ina infrastructura da rait a bindel fitg lartg pudess vegnir realisà, uschenavant che quai n'è anc betg il cas. En quest connex ston vegnir resguardads ils midaments tecnologics svelts ed il svilup sin plaun federal. La realisaziun è chaussa dals purtaders locals u regiunals. En quest connex duai vegnir prendì en mira in entretschament stretg da tut las parts participadas sco las vischnancas, las regiuns, ma er ils furniturs da prestaziuns sco las destinaziuns ed auters circuls interessads. Per sustegnair la realisaziun pon vegnir messas a disposiziun las basas resp. las instrucziuns d'agir correspundentas. La rolla dal chantun è ina rolla subsidiara. In subvenziunament general tras il chantun ha in effect cuntraproductiv e sto perquai vegnir refusà. La basa legala per quai n'è correspundentamain er betg avant maun.

Ord vista da la regenza è il regress tar il turissem, en spezial l'internaziunalisaziun per attrair novs giasts e l'applicaziun da novas medias digitalas, ch'è colliada cun quai, ina sfida centrala. Qua è la regenza pronta da sviluppar concepts che cumpiglian pliras destinaziuns e che sa fatschentan en spezial da la transfurmaziun da models da fatschenta existents sco er da definir mesiras concretas per quai. La regenza è persvadida che la realisaziun efficazia ed effectiva dals concepts e da las mesiras premettia la collavuraziun activa da las destinaziuns impurtantas e d'ulteriurs furniturs da prestaziuns.

In ulteriur punct central vesa la regenza tar il sectur da furmaziun. Ina purschida da scolaziun e da furmaziun supplementara che tegna quint da las pretensiuns futuras (installaziun ed extensiun da purschidas da scolaziun specificas per il sectur da la transfurmaziun digitala) è ina premissa essenziala per ch'il Grischun possia profitar da las schanzas che la digitalisaziun porscha. Plinavant duai vegnir examinà, co che las cundiziuns generalas per interpresas pon vegnir meglieradas en quai che reguarda la digitalisaziun.

Cun las resursas existentas n'èsi betg pussaivel da giuditgar permanentamain la transfurmaziun digitala resp. la digitalisaziun en l'economia ed en la societad e da giuditgar las consequenzas che resultan da quai per il Grischun. Pervia da la dimensiun dal tema n'è quai – sco mesira individuala d'in chantun – er betg raschunaivel ord vista da la regenza. Ina politica da datas ch'è adattada al svilup da la digitalisàziun e che na cumpiglia betg mo la segirezza da las datas è ina da las finamiras centralas da la strategia federala "Svizra digitala". Eventualas mesiras en il Grischun ston sa basar sin il svilup tar la confederaziun. La strategia ed il plan da mesiras cun sias miras han l'intent d'augmentar l'attractivitad dal lieu, da trair a niz ils potenzials supplementars da valurisaziun e da prestar ina contribuziun al svilup persistent da nossa societad. La regenza è pronta d'acceptar questa incumbensa en il senn da las explicaziuns qua survart.

31 d'avust 2016