Navigation

Inhaltsbereich

Dumonda Perl concernent l'access a l'internet en centers per l'emprima registraziun ed en centers da transit

Sessiun: 15.06.2016

Questa stad vegn avert a Trimmis il "Bahnhöfli" sco nov alloschi collectiv chantunal per requirentas e requirents d'asil. Sco en auters lieus ha il chantun – tenor rapports en las gasettas – tschertgà ordavant il discurs cun la vischnanca da staziunament, neutralisà resalvas, prendì encunter giavischs e sustegnì l'installaziun d'ina gruppa accumpagnanta. Quai è ina pratica ludaivla ch'è impurtanta per l'acceptanza dals centers e da lur abitantas ed abitants. Ina pratica che identifitgescha e che schlia a temp eventuals problems.

 

Uschia è per exempel vegnì fatg attent a Trimmis che bleras requirentas e requirents d'asil passentan lur dis en il spazi public, perquai ch'ellas ed els han là – tut tenor il lieu – access a WLAN. Ina situaziun che po irritar tant las abitantas ed ils abitants en quest lieu sco er las requirentas ed ils requirents d'asil.

 

- Constatti ch'il chantun equipescha – sin giavisch da la vischnanca – il center "Bahnhöfli" cun WLAN?

 

- Vegni er garantì en auters alloschis collectivs dal chantun in access a l'internet per las abitantas ed ils abitants che han notabene in fitg grond basegn d'infurmaziuns?

 

- Sche betg, co motivescha il chantun che questa midada da la pratica raschunaivla e moderada che reducescha conflicts en il spazi public, resta limitada ad in center?

 

Cuira, ils 15 da zercladur 2016

 

Perl, von Ballmoos, Atanes, Baselgia-Brunner, Blumenthal, Bucher-Brini, Caduff, Cahenzli-Philipp, Caluori (Cuira), Casty, Casutt-Derungs, Caviezel (Cuira), Clalüna, Dosch, Epp, Felix (Scuol), Gartmann-Albin, Geisseler, Heiz, Holzinger-Loretz, Jenny, Joos, Kappeler, Kasper, Koch (Tumein), Kollegger, Kunfermann, Kunz (Cuira), Locher Benguerel, Marti, Monigatti, Noi-Togni, Peyer, Pfenninger, Pult, Schneider, Stiffler (Cuira), Thomann-Frank, Thöny, Troncana-Sauer, Widmer-Spreiter, Bossi, Caluori (Zizers), Degiacomi, Gugelmann, Hartmann-Conrad (Schiers), Schmid

Resposta da la regenza

En tut ils alloschis collectivs manads dal chantun en il sectur d'asil vegni tegnì quint dal basegn d'infurmaziun da las abitantas e dals abitants. Correspundentamain vegni mess a disposiziun a quellas ed a quels ubain la recepziun d'in dumber adequat da chanals da televisiun (internaziunals) ubain l'access a l'internet via WLAN. Schebain in center dispona d'in attatg da televisiun ubain da WLAN dependa, co che l'immobiglia era equipada avant la midada d'utilisaziun en in center collectiv. Sche l'immobiglia aveva gia in attatg da televisiun en las singulas chombras, vegn purschì quel per cuvrir il basegn d'infurmaziun. Access a WLAN n'han las abitantas ed ils abitants en quest cas betg. WLAN vegn mess a disposiziun en centers collectivs mo, sche quels disponan da chombras senza in attatg da televisiun. En quels cas vegn però mess a disposiziun in apparat da televisiun en il local da segiurn cuminaivel.

Concernent l'access a l'internet stoi dal rest vegnir rendì attent, ch'igl existan en sin-gulas vischnancas da staziunament purschidas supplementaras d'uniuns u d'organisaziuns ecclesiasticas che mettan a disposiziun computers ed internet. Tals inscunters da café dattan a requirentas ed a requirents d'asil sco er a persunas admessas provisoricamain er la pussaivladad d'entrar en contact cun la populaziun, quai che po avair in effect positiv en vista a l'integraziun futura.

Resposta a las dumondas

1. La decisiun d'equipar il center da transit "Bahnhöfli" a Trimmis cun WLAN è resultada da la circumstanza che las singulas chombras na disponan betg d'in attatg da televisiun; talas chombras na vegnan da princip betg cumplettadas cun in attatg da televisiun. Correspundentamain survegnan las abitantas ed ils abitants access a l'internet via WLAN.

2. Ultra dal center da transit a Trimmis ha mo quel a Litzirüti in access a WLAN. Sco a Trimmis n'ha er questa immobiglia nagins attatgs da televisiun en las chombras.

3. Cun metter a disposiziun WLAN a las abitantas ed als abitants dals dus centers da transit a Trimmis ed a Litzirüti n'ha il chantun betg midà sia pratica. Effectivamain è la decisiun da porscher WLAN – confurm a la pratica usitada – vegnida prendida sulettamain perquai che las singulas chombras da l'immobiglia n'eran er betg equipadas cun attatgs da televisiun avant la midada d'utilisaziun. Ils ulteriurs centers collectivs ch'èn vegnids endrizzads l'ultim temp (a Laax, a Mustér) han percunter – sco anteriurs hotels – gia attatgs da televisiun en mintga chombra, e pervia da quai na vegn purschì nagin access a WLAN. Questa pratica n'ha chaschunà nagins problems pli gronds fin ussa. Sche quai avess da sa midar, resta resalvà in nov giudicament da la situaziun.

24 d'avust 2016