Navigation

Inhaltsbereich

Dumonda Perl concernent il scumond da batlegiar

Sessiun: 19.10.2016

Il mais passà ha il cussegl grond dal chantun Vad decidì d'introducir in scumond da batlegiar. Il chantun Grischun enconuscha gia dapi l'onn 2004 in tal scumond. En vista a la proxima revisiun parziala da la lescha da polizia èsi inditgà d'examinar l'effect da l'artitgel correspundent. Las sutsegnadras ed ils sutsegnaders supplitgeschan perquai la regenza da respunder las suandantas dumondas:

 

1. Quantas multas èn vegnidas pronunziadas per onn sin plaun chantunal pervia dal batlegiar dapi l'introducziun dal scumond?

 

2. Quantas da questas multas han pudì vegnir incassadas, e quantas èn stadas nunincassablas?

 

La formulaziun exacta dal scumond da batlegiar en l'art. 36j da la lescha da polizia è:

 

"Tgi che va a batlegiar sco mitschafadias u per negligientscha ubain intimescha uffants u persunas en sia dependenza dad ir a batlegiar, vegn chastià cun multa."

 

Las noziuns tudestgas "Arbeitsscheu" e "Liederlichkeit" èn vegnidas duvradas en l'istorgia dal dretg svizzer en spezial en connex cun mesiras repressivas per motivs da provediment. Uschia per exempel per motivar la collocaziun en chasas da lavur.

 

Da quai resulta in'ulteriura dumonda:

 

3. Co giuditgescha la regenza las noziuns "Arbeitsscheu" e "Liederlichkeit" en il context istoric?

 

Cuira, ils 19 d'october 2016

 

Perl, Pult, Locher Benguerel, Atanes, Baselgia-Brunner, Bucher-Brini, Cahenzli-Philipp, Caviezel (Cuira), Deplazes, Dermont, Dosch, Gartmann-Albin, Jaag, Monigatti, Niederer, Thöny, von Ballmoos, Cantieni, Degiacomi, Horrer, Ruckstuhl, Vassella

Resposta da la regenza

Gia en la lescha davart l'introducziun dal cudesch penal svizzer e davart la procedura penala en il chantun Grischun dals 2 da mars 1941 è il batlegiar vegnì chastià. En il rom da las differentas revisiuns è la disposiziun vegnida adattada. Fin ils 31 da december 2010 figurava la disposiziun davart il scumond da batlegiar en la lescha chantunala davart la procedura penala sut las disposiziuns chantunalas dal dretg penal da surpassament (art. 35). Cun l'entrada en vigur dal cudesch da procedura penala svizzer (CPP; CS 312.0) e tras sia realisaziun en il chantun Grischun (M 2009-2010, p. 795 ss.; deliberà dal cussegl grond ils 16 da zercladur 2010; en vigur dapi il 1. da schaner 2011) è scadida la lescha chantunala davart la procedura penala. Las disposiziuns chantunalas dal dretg penal da surpassament èn vegnidas transferidas per gronda part senza midadas en la lescha da polizia dal chantun Grischun (art. 36a ss. LPol; DG 613.000). Tranter quellas er la disposiziun davart il batlegiar (art. 36j LPol).

Tar las singulas dumondas:

1. Dapi l'onn 2011 ha la procura publica dal Grischun pronunzià 33 mandats penals pervia dal batlegiar, 5 da quels ha relaschà la procura per giuvenils. Per onn hai dà tras quai 5 fin 6 cas che han manà ad ina sentenzia sin plaun chantunal. Quantas multas che las vischnancas han pronunzià, na po – per mancanza d'ina statistica correspundenta – betg vegnir ditg.

2. En 14 dals 33 cas menziunads è la multa stada nunincassabla. Quests cas ha la procura publica transferì a l'uffizi per l'execuziun giudiziala per exequir il chasti da detenziun subsidiar.

3. En il rom da la revisiun parziala currenta da la lescha da polizia èsi gia previs da stritgar las noziuns "Arbeitsscheu" e "Liederlichkeit" en l'art. 36j LPol. La regenza è dentant da l'avis ch'ina disposiziun che chastiescha il batlegiar saja anc adina necessaria, uschia che l'art. 36j LPol duai sulettamain vegnir adattà linguisticamain. L'elavuraziun istorica da las noziuns tudestgas "Arbeitsscheu" e "Liederlichkeit" en connex cun l'uschenumnà plazzament administrativ e sut il titel da l'urden poveril da l'onn 1857 fa part dal project "Elavuraziun istorica da basas en connex cun las mesiras repressivas per motivs da provediment che han existì fin l'onn 1981 en il chantun Grischun". La regenza ha permess ils 23 da december 2014 per quest intent ina incarica da perscrutaziun ed engaschà ina gruppa da project interna. Igl è da far quint cun il rapport en il decurs da l'emprima mesadad da l'onn 2017.

13 da schaner 2017