Navigation

Inhaltsbereich

Dumonda Crameri concernent l'introducziun dal register funsil federal

Sessiun: 06.12.2016

En il chantun Grischun furma mintga vischnanca in circul da register funsil. Ils fatgs dal register funsil èn suttamess a la surveglianza professiunala ed administrativa dal chantun (art. 137 s. da la lescha introductiva tar il cudesch civil svizzer [LItCCS]). Bleras vischnancas èn s'unidas cun autras vischnancas per manar il register funsil.

Il dretg federal prevesa l'introducziun da l'uschenumnà register funsil federal. En quest connex ha il register funsil federal l'effect cumplain dal register funsil (effect negativ e positiv dal register funsil). L'effect positiv dal register funsil vul dir ch'ina persuna che ha acquistà proprietad u auters dretgs reals, sa basond en buna fai sin ina inscripziun en il register funsil, sto vegnir protegida en quest acquist (art. 973 dal cudesch civil svizzer [CCS]). L'effect negativ dal register funsil vul dir che dretgs reals vi da bains immobigliars na vegnan betg constituids, nun ch'els vegnian inscrits en il register funsil (art. 971 CCS). Quai procura per segirezza giuridica.

Il dretg federal conceda als chantuns in tschert temp transitoric per introducir il register funsil federal. Fin a sia introducziun ston ils registers d'immobiglias e da servituts resp. ils protocols da cumpra e da pegn vegnir cuntinuads (art. 148 al. 1 da la lescha introductiva tar il cudesch civil svizzer [LItCCS]; art. 46 ss. titel final dal CCS). Quai chaschuna per part malsegirezzas giuridicas considerablas, perquai che quests registers resp. protocols n'han betg l'effect cumplain dal register funsil.

Las sutsegnadras ed ils sutsegnaders dumondan perquai la regenza:

a. Tge vischnancas grischunas han introducì il register funsil federal, tge vischnancas lavuran cun il register d'immobiglias e da servituts e tge vischnancas lavuran anc cun ils protocols da cumpra e da pegn?

b. Cun tge orizont da temp fa la regenza quint fin ch'il register funsil federal è introducì en tut il Grischun?

c. Cun tge custs ston las vischnancas far quint per introducir il register funsil federal?

d. Po la regenza s'imaginar da dar impuls (finanzials, operativs u persunals) per introducir il register funsil federal?

e. Co sa preschenta il stadi concernent l'introducziun dal register funsil electronic?

Cuira, ils 6 da december 2016

Crameri, Hitz-Rusch, Casty, Albertin, Alig, Berther (Mustér), Bondolfi, Brandenburger, Bucher-Brini, Buchli-Mannhart, Burkhardt, Caluori, Casanova (Glion), Cavegn, Caviezel (Cuira), Darms-Landolt, Davaz, Deplazes, Dermont, Dosch, Epp, Felix (Scuol), Florin-Caluori, Foffa, Gartmann-Albin, Giacomelli, Hug, Jeker, Jenny, Joos, Kasper, Koch (Tumein), Koch (Igis), Komminoth-Elmer, Kunfermann, Kunz (Fläsch), Kunz (Cuira), Kuoni, Lamprecht, Lorez-Meuli, Märchy-Caduff, Marti, Mathis, Michael (Donat), Müller, Nay, Niggli-Mathis (Grüsch), Noi-Togni, Papa, Paterlini, Peyer, Pfenninger, Pult, Salis, Schneider, Schutz, Steiger, Stiffler (Tavau Plaz), Tenchio, Thomann-Frank, Tomaschett (Breil), Tomaschett-Berther (Trun), Troncana-Sauer, Vetsch (Claustra Vitg), Waidacher, Weber, Weidmann, Widmer-Spreiter, Wieland, Antognini, Berther (Segnas), Cantieni, Derungs, Lombardi, Pfister

Resposta da la regenza

Il cudesch civil svizzer (CCS; CS 210) oblighescha ils chantuns d'introducir il register funsil federal (RFF) Tenor ils art. 147 ss. da la lescha introductiva tar il cudesch civil svizzer (LItCCS; DG 210.100) ston las vischnancas incumbensar l'uffizi dal register funsil cun l'execuziun da las lavurs. Prescripziuns areguard il temp n'èn fixadas ni en il dretg federal ni en il dretg chantunal. Da las 112 vischnancas han 51 introducì il RFF cumplettamain e 38 parzialmain. En las 23 vischnancas restantas existan anc adina exclusivamain instituziuns chantunalas dal register funsil. Actualmain han lieu 14 lavurs d'indriz. En il chantun datti circa 231 000 immobiglias. Per ca. 80 000 immobiglias sto anc vegnir introducì il RFF. Per ca. 32 000 immobiglias ston ultra da quai las datas anc vegnir registradas en ils sistems d'informatica dal register funsil. Questa registraziun da datas per introducir il traffic commerzial electronic cun ils uffizis dal register funsil è vegnida tractada en moda prioritara envers l'introducziun dal RFF, er sche questa ultima sto er vegnir avanzada.

a. Introducì cumplainamain è il RFF en las vischnancas: Andeer, Andiast, Bever, Cuira, Cunter en il Partenz, Domat, Donat, Falera, Farschno, Favugn, Fläsch, Flearda, Flem, Giuvaulta, Haldenstein, Küblis, La Punt-Chamues-ch, Laax, Lumnezia, Madulain, Maiavilla, Maladers, Malans, Masagn, Medel (Lucmagn), Mesauc, Nufenen, Panaduz, Puntraschigna, Razén, Runtgaglia, Sagogn, Samedan, San Murezzan, S-chanf, Schlarigna, Schluein, Segl, Seglias, Silvaplauna, Sufers, Trin, Tschiertschen-Praden, Tumein, Tusaun, Urmagn, Valragn, Vaz sut, Vuorz, Zernez, Zizers.

Per part dal RFF disponan las vischnancas: Alvra, Arosa, Bregaglia, Breil, Brusio, Buseno, Calanca, Cazas, Churwalden, Claustra-Serneus, Farera, Fideris, Filisur, Glion, Jenaz, Jenins, Landquart, Mustér, Puschlav, Rossa, Roveredo, Scharàns, Scuol, Spleia, Sumvitg, Sursaissa Mundaun, Surses, Tavau, Trimmis, Trun, Tujetsch, Tumleastga, Val S. Pieder, Valsot, Val Stussavgia, Vaz, Ziràn-Reschen, Zuoz.

Exclusivamain instituziuns chantunalas dal register funsil (register d'immobiglias e da servituts u protocols da cumpra e da pegn) existan en las vischnancas: Avras, Bravuogn, Cama, Castaneda, Casti-Vargistagn, Furna, Grono, Grüsch, Lantsch, Lon, Lostallo, Luzein, Maton, Mut, Samignun, San Vittore, Schiers, Schmitten, Seewis, Soazza, Sta. Maria i.C., Tschappina, Val Müstair.

b. Tar la gronda part dals circuls da register funsil (CRF) èn las lavurs anc betg liquidadas d'attribuir a resursas persunalas mancantas, ad ina gronda chargia da lavur quotidiana u ad in'organisaziun malfavuraivla, per part ad ina planisaziun ed ad ina liquidaziun pauc efficazia da las lavurs. L'inspecturat dal register funsil e register da commerzi (IRFRC) ha cumenzà avant in pèr onns a fixar prescripziuns individualas ed accordadas cun las relaziuns specificas per liquidar questas lavurs (che resultan sper las lavurs quotidianas ordinarias sco er suenter la finiziun da la registraziun da las datas dal register funsil en il sistems d'informatica dal register funsil). Integrond las exponentas ed ils exponents dals CRF vegnan concludidas soluziuns u mesiras concretas (fin a la reorganisaziun dals CRF). Fin ch'il RFF è introducì en tut il chantun vegnan però tuttina anc a passar in pèr onns. Da princip pon ils cas er vegnir liquidads vinavant senza problems sin basa da las instituziuns chantunalas dal register funsil. En cas singuls poi dentant capitar ch'i dat intschertezzas giuridicas e che registraziuns giuridicas ston vegnir rectifitgadas. Per regla però basti da renviar a la rectificaziun dals dretgs reals che sto anc vegnir fatga, en spezial da las servituts sco er da las remartgas e da las prenotaziuns en il rom da l'introducziun dal register funsil pli tard.

c. Ils custs per introducir il register funsil van a quint dals proprietaris dals bains immobigliars participads e da la vischnanca, e quai mintgamai per la mesadad (art. 147d LItCCS). Per bain immobigliar stoi vegnir fatg quint cun custs tranter ca. 100.– fin 200.– francs.

d. Tenor l'art. 147a LItCCS po il departament d'economia publica e fatgs socials (DES) fixar il cumenzament ed il territori cumpiglià da la procedura d'introducziun ed ordinar en tge successiun e per tge termin che las vischnancas ston endrizzar il CFF. Resguardond l'autonomia communala e perquai che la chaussa n'è betg absolutamain urgenta desista il DES da talas mesiras. Ils onns 1990 ha il cussegl grond approvà 5 plazzas per uschenumnads "funcziunaris da rectificaziun" tar il IRFRC che lavuran exclusivamain ed en moda che cuvra ils custs per l'introducziun dal RFF. Pervia da la mancanza da persunal spezialisà han però pudì vegnir occupadas mo singulas da questas plazzas, e quai er mo per in tschert temp. Actualmain n'ha il IRFRC pli naginas da questas plazzas.
El sustegna ils uffizis dal register funsil tar l'introducziun dal RFF tranter auter tar la planisaziun sco er en cas da dumondas specificas. Per la regenza èsi nunimaginabel da dar impuls finanzials.

e. Tut ils CRF lavuran productivamain cun il register funsil electronic (sistems Capitastra u Terris). Registradas èn var 85 pertschient da las datas dal register funsil. Il IRFRC fa quint che questas lavurs pon vegnir terminadas en il decurs da l'onn 2018.

2 da mars 2017