Navigation

Inhaltsbereich

Incumbensa Lamprecht concernent la dotaziun dal corp da guardias da cunfin al traject grischun dal cunfin svizzer

Sessiun: 06.12.2016

Sut il punct central da svilup 4/22 «Segirezza publica» dal program annual 2017 preschenta la regenza la suandanta finamira da l'onn: «Cumbatter cunter il turissem criminal e rinforzar il sentiment da segirezza da la populaziun tras quai che la preschientscha da la polizia è pli ferma, pli vesaivla ed activa». Per la realisaziun duai vegnir collavurà optimalmain cun il corp da guardias da cunfin (Cgcf), e quai per cumbatter en spezial en il territori da cunfin cunter il turissem criminal e per pudair dar dumogn als eveniments da migraziun.

Questa mesira premetta – cun il Cgcf – in partenari che dispona cunzunt en il territori da cunfin da capacitads correspundentas. Tras la retratga dal persunal da la Cgcf è la populaziun da las valladas en la vischinanza dal cunfin vegnida confruntada en il passà cun signals cuntraris.

Il chantun Grischun dispona dal pli lung traject dal cunfin svizzer ed ha – cun Müstair, Campocologno e Castasegna – trais passagis da cunfin averts durant l'entir onn ch'èn situads al cunfin sid ch'è spezialmain sensibel. La cuntrada cun ses cumpartiments muntagnards e las grondas distanzas engrevgeschan a las unitads mobilas da la guardia da cunfin d'intervegnir a temp util.

Las sutsegnadras ed ils sutsegnaders incumbenseschan la regenza da pretender activamain da la confederaziun ch'ella prevesia ina dotaziun suffizienta da guardias da cunfin per il traject grischun dal cunfin svizzer. La lunghezza dal traject grischun dal cunfin svizzer e la surveglianza pretensiusa dal territori intermediar ston vegnir fatgas valair tar la confederaziun sco criteris equivalents per la dotaziun dal Cgcf cumpareglià cun las frequenzas pli grondas dals chantuns da cunfin da la Bassa.

Cuira, ils 6 da december 2016

Lamprecht, Della Vedova, Michael (Castasegna), Alig, Bleiker, Bondolfi, Brandenburger, Buchli-Mannhart, Burkhardt, Casanova (Glion), Casty, Cavegn, Caviezel (Tavau Clavadel), Clalüna, Clavadetscher, Crameri, Danuser, Davaz, Dosch, Dudli, Engler, Epp, Felix (Haldenstein), Felix (Scuol), Foffa, Geisseler, Giacomelli, Grass, Gunzinger, Hardegger, Hartmann, Heiz, Hitz-Rusch, Holzinger-Loretz, Jeker, Jenny, Koch (Tumein), Komminoth-Elmer, Lorez-Meuli, Mani-Heldstab, Marti, Mathis, Michael (Donat), Müller, Nay, Niederer, Niggli (Samedan), Niggli-Mathis (Grüsch), Noi-Togni, Papa, Salis, Sax, Schneider, Schutz, Steck-Rauch, Steiger, Stiffler (Tavau Plaz), Tenchio, Thomann-Frank, Tomaschett (Breil), Toutsch, Troncana-Sauer, Vetsch (Claustra Vitg), Widmer-Spreiter, Wieland, Cantieni, Erhard, Wellig

Resposta da la regenza

L'ultim temp ha il chantun fatg numerus pass per intensivar la collavuraziun cun il corp da guardias da cunfin (Cgcf) e per uschia cumbatter cunter il turissem criminal e per dar dumogn als eveniments da migraziun. A medem temp ha el pretendì repetidamain da la confederaziun d'augmentar il Cgcf.

Cun il conclus dals 22 da settember 2015 (prot. nr. 827) aveva la regenza approvà la cunvegna administrativa tranter il chantun Grischun e l'administraziun federala da duana (AFD) davart la collavuraziun tranter la polizia chantunala dal Grischun ed il Cgcf resp. la AFD. Qua tras è la collavuraziun da questas autoritads vegnida intensivada e concepida en moda pli effizienta. En la cunvegna èn tranter auter regladas pli detagliadamain las patruglias cuminaivlas sco er la realisaziun d'acziuns cuminaivlas en il territori da cunfin. La collavuraziun tranter il Cgcf e la polizia chantunala porta ina plivalur vicendaivla. Il Cgcf è er integrà en la collavuraziun cun las autoritads polizialas a l'exteriur vischin, p.ex. en la provinza da Sondrio, e sa participescha a scuntradas internaziunalas ensemen cun represchentants dal chantun. Er en l'avegnir vegn il chantun a tgirar in stretg contact cun las persunas che han la responsabladad politica ed operativa per il Cgcf ed ad analisar permanentamain la situaziun confurm a las circumstanzas, per ch'i possia – en cas da basegn – vegnir reagì a temp e senza retard sin ils problems ch'èn da schliar.

En l'incumbensa vegni menziunà che la populaziun da las valladas en la vischinanza dal cunfin saja vegnida confruntada en il passà cun signals cuntraris pervia da la retratga dal persunal dal Cgcf. Probablamain sa referescha questa critica a las reorganisaziuns dal Cgcf, sco p.ex. al project GRISCHA, davart il qual la regenza è s'exprimida en sia resposta dals 11 da mars 2014 a la dumonda Della Vedova. Cun quest project vuleva il Cgcf avair a disposiziun dapli forzas per acziuns mobilas en il Grischun senza midar l'effectiv previs. Quai cun reducir e flexibilisar ils temps da controlla e da servetsch. Las controllas pon uschia vegnir fatgas en moda flexibla areguard il temp, confurm a la situaziun, ma er nunspetgadamain al passagi dal cunfin u en il territori da cunfin. Talas reorganisaziuns servan ad adattar l'organisaziun existenta a las novas ristgas ed èn vegnidas fatgas er tar la polizia chantunala en vista ad ina flexibilitad pli gronda. Il Cgcf ha infurmà la populaziun a chaschun d'occurrenzas d'infurmaziun localas. El è s'exprimì differentas giadas explicitamain a favur dal Grischun ed er da nossas vals dal sid. Sin basa da quai n'ha la regenza nagins motivs da s'opponer a reorganisaziuns, uschè ditg ch'ellas garanteschan u megliereschan effectivamain la segirezza. En il rom da talas reorganisaziuns èn la regenza ed il departament cumpetent mintgamai s'engaschads tar il Cgcf per ils interess dal chantun. En il passà ha il Cgcf adina puspè gì chapientscha per ils interess dal chantun Grischun. Quai è p.ex. sa mussà ultimamain tar la tscherna dal lieu per la centrala d'alarm dal Cgcf ost: cun Cuira è questa tscherna ida a favur dal chantun Grischun. Il svilup vegn accumpagnà er vinavant activamain.

Sco menziunà differentas giadas ils ultims onns en las uras da dumondas davart questa tematica en il cussegl grond (p.ex. dumonda Brigitta Hitz-Rusch en la sessiun da december 2016, dumonda Reto Crameri en la sessiun da zercladur 2016, dumonda Bruno Claus en la sessiun da december 2015), ageschan la regenza ed il departament cumpetent gia en il senn da l'incumbensa qua avant maun e vegnan a s'engaschar er vinavant activamain ed energicamain tar la confederaziun per che l'effectiv dal Cgcf correspundia a las pretensiuns e saja en cas da liquidar las sfidas ch'èn da schliar. A medem temp vegn il chantun a s'engaschar tar la confederaziun per questa finamira sco fin ussa er sur gremis interchantunals, sco la conferenza dals directurs chantunals da giustia e polizia da la Svizra orientala (CDCGP-ost) sut il presidi dal cussegl guvernativ Christian Rathgeb. La regenza è pronta d'acceptar questa incumbensa.

2 da mars 2017