Navigation

Inhaltsbereich

Dumonda Deplazes concernent memia blers disturbis en las zonas da paus per la selvaschina

Sessiun: 19.04.2017

Zonas da paus ed asils per la selvaschina protegian quests animals selvadis da disturbis exagerads tras las activitads da temp liber dals umans. Mo gia il fatg che sportists d'enviern cumparan nunspetgadamain, po esser problematic per la selvaschina durant l'enviern: Ina fugia consumescha blera energia, che manca lura per surviver. Per zonas da paus per la selvaschina vala perquai durant l'enviern in scumond d'access u in access mo sin rutas prescrittas.

Cun l'augment da differentas activitads da temp liber sa trategnan adina dapli umans en il spazi da viver da la selvaschina, ed ils disturbis s'augmentan. Ultra da mesiras prendidas sin basa voluntara ed en atgna responsabladad gidan leschas ed ordinaziuns a cuntanscher las finamiras constituziunalas da protecziun.

En differents territoris da skis, dentant er en territoris betg da skis, cuntrafan blers skiunzs e bleras persunas che van cun skis sper las pistas, che fan turas, che van cun aissa e che van cun gianellas als scumonds marcads e sa movan tras las zonas da paus per la selvaschina.

Mias dumondas a la regenza:

1. Co vegnan fatgas valair las zonas da paus per la selvaschina e quant savens vegnan ellas controlladas tras la surveglianza da chatscha?

2. Tge zonas da paus per la selvaschina èn vegnidas controlladas ils ultims 3 onns?

3. Tgi po tut chastiar ils surpassaments dals sportists d'enviern?

4. Quantas denunzias e multas èn vegnidas pronunziadas ils ultims 4 onns?

5. Bastan las signalisaziuns existentas, e vegnan quellas er controlladas periodicamain?

6. Fissi pussaivel da confiscar las cartas dal di, da l'emna u da l'onn da persunas che vegnan nà dals territoris da skis e ch'entran repetidamain en las zonas da paus?

Cuira, ils 19 d'avrigl 2017

Deplazes, Jenny, Buchli-Mannhart, Atanes, Baselgia-Brunner, Bucher-Brini, Burkhardt, Casanova-Maron (Domat), Caviezel (Cuira), Danuser, Dermont, Dosch, Felix (Haldenstein), Foffa, Giacomelli, Hug, Jaag, Kappeler, Kasper, Komminoth-Elmer, Kunfermann, Locher Benguerel, Monigatti, Noi-Togni, Perl, Peyer, Pult, Salis, Thöny, von Ballmoos, Cantieni, Costa, Gugelmann, Hartmann-Conrad (Schiers), Pfister

Resposta da la regenza

Zonas da paus per la selvaschina protegian la selvaschina dad activitads da temp liber exageradas. Asils da selvaschina percunter èn instruments per la planisaziun da la chatscha. Sin basa da scumonds da chatscha parzials u totals protegian els la selvaschina d'in squitsch da chatscha memia grond e procuran uschia che la selvaschina è repartida en il spazi da viver confurm a la spezia. Las zonas da paus per la selvaschina vegnan designadas tras las vischnancas e betg tras il chantun. Perquai n'èsi betg pussaivel da far ina statistica dals surpassaments e da las proceduras penalas. Vegnir mussà po dentant l'effect da las zonas da paus per la selvaschina.

Tar las dumondas 1 e 3
Surpassaments areguard las zonas da paus per la selvaschina vegnan chastiads da las vischnancas. Per regla vegn surdada questa incumbensa a la polizia communala u a persunas che han ina scolaziun correspundenta. Ils organs da surveglianza da chatscha cusseglian las vischnancas e fan er las denunzias a las vischnancas.

Tar las dumondas 2 e 4
En tut èn determinadas en il chantun Grischun 292 zonas da paus per la selvaschina cun ina surfatscha totala dad 865 km², numnadamain 243 territoris cun scumonds e cumonds liants, 26 territoris sin basa voluntara, 16 territoris cun regulaziuns voluntaras da sursgular, sis asils federals da selvaschina cun l'obligaziun da star sin ina tscherta ruta durant l'enviern sco er il parc naziunal svizzer cun in scumond d'access en cas da relaziuns d'enviern. En questas zonas da paus per la selvaschina vegnan observadas las reglas fixadas sco suonda: 12% fitg bain, 60% bain, 14% suffizientamain, 8% nunsuffizientamain, 2% mal e 4% fitg mal. Tranter las 12 zonas da paus per la selvaschina che vegnan observadas fitg mal (4%) èn 10 dals 42 territoris determinads voluntarmain. Zonas da paus voluntaras sa basan sin cunvegnas tranter l'uffizi da chatscha e pestga e gruppas d'interess (p.ex. corridors da sgol per pilots da delta). Cun 86% giudicaments suffizients fin fitg buns resulta tut en tut in maletg positiv pertutgant la realisaziun e l'execuziun da questas mesiras che duain proteger la selvaschina da disturbis. Ils giudicaments sa basan sin valurs d'experientscha dals organs locals da surveglianza da chatscha.

Tar la dumonda 5
L'uffizi da chatscha e pestga recumonda a las vischnancas da signalisar las zonas da paus per la selvaschina en moda uschè unitara sco pussaivel. Questa recumandaziun è sa cumprovada. La signalisaziun vegn per regla controllada mintga onn, ed en cas da basegn vegnan las zonas da paus signalisadas l'atun da nov cun tavlas. Per segirar la signalisaziun prestan las chatschadras ed ils chatschaders ina gronda e preziusa contribuziun en il rom da l'activitad da tgira.

Tar la dumonda 6
Cartas che permettan da duvrar pistas da skis dastgan vegnir confiscadas mo da las telefericas correspundentas. Las vischnancas ed ils organs da surveglianza da chatscha n'han naginas cumpetenzas en quest reguard.

Per resumar poi vegnir menziunà ch'il chantun turistic Grischun ha fixà tar la protecziun da selvaschina durant l'enviern in standard ch'è respectà er ordaifer ils cunfins chantunals. Quest standard duai vegnir mantegnì e sche pussaivel anc meglierà vinavant.

22 da zercladur 2017