Navigation

Inhaltsbereich

Dumonda Cavegn concernent il basegn supplementar da persunal per cumbatter cunter la cybercriminalitad

Sessiun: 01.09.2017

La regenza ha proclamà en ses rapport davart il program da la regenza ed il plan da finanzas per ils onns 2017 – 2020 (missiva carnet nr. 12 / 2015 – 2016) en il champ d'acziun 6 la garanzia da la segirezza publica e sociala e fixà en l'intenziun strategica che la polizia chantunala saja pronta per cumbatter cunter la cybercriminalitad e per las pretensiuns pli grondas envers ina registraziun ed evaluaziun da las cumprovas cumplessiva tenor la lescha davart la procedura penala. En il punct central da svilup 4¦22 che concretisescha quai, èsi vegnì fixà ch'ils servetschs per la tecnica criminala, la tecnologia d'infurmaziun (TI) e l'investigaziun digitala stoppian vegnir adattads a las pretensiuns pertutgant la cybercriminalitad.

Perquai che adina dapli delicts hajan ina relaziun cun ils meds da communicaziun moderns (sextorsiun, engion online, extorsiun via e-mail, enguladitsch da datas, phishing e.u.v.), ha la polizia chantunala dal Grischun communitgà la primavaira 2017 ch'ella veglia augmentar las resursas materialas e persunalas en il sectur da la forensica digitala, da la cyberinvestigaziun e da la cyberanalisa, e che questa amplificaziun possia vegnir terminada anc durant l'onn 2017.

L'amplificaziun dal cumbat cunter la cybercriminalitad vegn beneventada. Ma segiramain è ella fitg intensiva areguard il persunal. Per l'autra pretendan er las pretensiuns pli grondas envers la polizia chantunala custs da persunal pli auts. Uschia èsi vegnì fixà en il preventiv 2015 e concludì dal cussegl grond ch'il corp da la polizia chantunala vegnia augmentà per mintgamai 5 plazzas (missiva tar il preventiv 2015, p. 129) per furmar truppas d'acziun mobilas per cumbatter cunter la criminalitad sco er per rinforzar acziuns sistematicas da la polizia criminala e da la polizia da segirezza durant ils onns 2015 e 2016.

L'effectiv reglamentar da la polizia chantunala dal Grischun è vegnì augmentà – tenor l'infurmaziun da la regenza en l'ura da dumondas da la sessiun da favrer 2017 – da 469,4 plazzas l'onn 2015 sin 477,4 plazzas l'onn 2017 (PCG 2016/17, p. 771). Quai correspunda a las pretensiuns pli grondas envers las commembras ed ils commembers dal corp ed a las incumbensas pli e pli intensivas inditgadas gia en il rapport da polizia 2010. In'amplificaziun da las resursas persunalas en connex cun il cumbat cunter la cybercriminalitad senza augmentar l'effectiv reglamentar da fin ussa da la polizia chantunala cuntrafaschess als conclus dal cussegl grond da l'onn 2015 e mettess ulteriuramain sut pressiun las commembras ed ils commembers dal corp ch'èn gia oz chargiads fitg ferm.

Las sutsegnadras ed ils sutsegnaders dumondan perquai:

1. Cura è terminada l'amplificaziun en il sectur da la forensica digitala, da la cyberinvestigaziun e da la cyberanalisa?

2. Quant aut è il basegn da persunal supplementar da la polizia chantunala dal Grischun en quests secturs?

3. Vegn il cumbat cunter la cybercriminalitad amplifitgà sin donn e cust da l'effectiv da persunal vertent (q.v.d. medem effectiv reglamentar) u vegni proponì en il preventiv 2018 d'augmentar correspundentamain l'effectiv reglamentar da la polizia chantunala dal Grischun?

Cuira, il 1. da settember 2017

Cavegn, Dosch, Michael (Donat), Albertin, Atanes, Bleiker, Blumenthal, Brandenburger, Buchli-Mannhart, Caduff, Caluori, Casanova (Glion), Casutt-Derungs, Caviezel (Tavau Clavadel), Crameri, Darms-Landolt, Deplazes, Dermont, Dudli, Engler, Epp, Fasani, Felix (Haldenstein), Florin-Caluori, Hitz-Rusch, Holzinger-Loretz, Jeker, Joos, Kunfermann, Lamprecht, Mani-Heldstab, Märchy-Caduff, Noi-Togni, Papa, Pedrini, Perl, Peyer, Pfenninger, Pult, Sax, Schneider, Stiffler (Tavau Plaz), Tenchio, Tomaschett (Breil), Troncana-Sauer, Vetsch (Pragg-Jenaz), von Ballmoos, Weber, Zanetti, Berther (Segnas), Cajacob, Costa, Föhn, Geisseler, Rodigari, Schmid, Sigron

Resposta da la regenza

L'infrastructura digitala che stat a disposiziun en l'internet pussibilitescha a delinquents potenzials novs models da malfatgs cun in potenzial da donns enorm per la societad e per l'economia. Il temp ed il spazi survegnan ina nova impurtanza. Noziuns giuridicas classicas sco il lieu dal malfatg, il temp dal malfatg e las cumpetenzas localas medemamain. La cybercriminalitad surmunta cunfins territorials e quai en in process fitg dinamic cun curts ciclus d'intervenziun. Pli ferma che la colliaziun en ina rait digitala e pli grond ch'il privel daventa che cybereveniments che cumenzan atgnamain en il mund virtual, effectueschan lur donn en il mund real.

Sut l'aspect da quest svilup privlus èsi urgentamain inditgà da tschertgar novas propostas da soluziuns er en la persecuziun penala. Ins sto meglierar l'interoperabilitad e la reacziun entaifer il chantun, en l'entira Svizra ed en collavuraziun cun partenaris internaziunals sco er accordar effectivamain ina cun l'autra las cumpetenzas spezialas, tecnicas e persunalas.

Per quest intent elavura la conferenza dals cumandants da las polizias chantunalas da la Svizra (CCPCS) actualmain il dispositiv naziunal "Cybercrime e forensica digitala". Là vegnan schliadas las dumondas organisatoricas ed infrastructuralas en lur totalitad. La persecuziun penala en general ed en spezial quella en ils chantuns sto vegnir drizzada tenor ils aspects impurtants sco las cyberinvestigaziuns, la forensica digitala e la cyberanalisa. Per quest intent è necessaria ina stretga collavuraziun cun las procuras publicas responsablas.

1. Il servetsch chantunal da cybercrime è affilià a la partiziun da la polizia criminala da la polizia chantunala dal Grischun e cumpiglia ils secturs forensica digitala, cyberinvestigaziun e cyberanalisa. Fin mez 2018 vegn il servetsch chantunal da cybercrime ad esser constituì uschia ch'el po ademplir la funcziun directiva per cybereveniments entaifer la polizia chantunala. Ma cun quai n'è betg terminada sia constituziun, perquai che la creaziun dal kowhow necessari e da l'infrastructura necessaria per cumbatter effectivamain cunter la cybercriminalitad vegn a durar onns, cunzunt pervia da la gronda lavur da scolaziun.

2. Per la persecuziun penala da la cybercriminalitad ston las cumpetenzas spezialas, tecnicas e persunalas vegnir accordadas ina cun l'autra. I sa tracta d'ina incumbensa communabla che la polizia chantunala sto ademplir ensemen cun la procura publica. Resursas persunalas supplementaras resultan principalmain per ils secturs da la forensica e da la scolaziun e medemamain tar la procura publica. Ils proxims dus onns vegnan duvradas – tenor la planisaziun actuala – tut en tut tschintg plazzas a temp cumplain per il servetsch da cybercrime. Gia oz lavuran trais polizists cun in pensum cumplain en quest sectur. Questas plazzas èn vegnidas spustadas – pervia da l'urgenza temporara – fin ussa da las polizias da regiuns en il servetsch chantunal da cybercrime. Questas plazzas ston puspè vegnir occupadas, per garantir l'adempliment da las incumbensas en las regiuns. Pia basegna la polizia chantunala ils proxims onns tut en tut tschintg plazzas a temp cumplain per il sectur da la cybercriminalitad.

3. Il computer e l'internet permettan novs champs d'acziun a delinquents potenzials. Malfatgs sco enguladitsch ed engion na vegnan betg pli commess mo en il mund analog, mabain er en quel digital. Perquai ch'i manca als investigaders quasi tut quai che gida a sclerir in malfatg analog, sco p.ex. la descripziun dal delinquent, il lieu dal malfatg, las improntas, ils fastizs da DNA, è l'identificaziun dal delinquent cumbinada cun fitg gronda lavur. Las autoritads da persecuziun penala ston pia s'adattar a questa realitad. Schebain che – en connex cun la persecuziun da quests malfatgs – i na sa tracta betg d'ina nova incumbensa da la polizia, ma d'ina tala ch'è dependenta da spezialists che han ina scolaziun particulara, na duain la constituziun sco er l'engrondiment dal servetsch chantunal da cybercrime betg avair lieu sin donn e cust dal dumber da persunal da fin ussa da la polizia chantunala. Las plazzas che vegnan duvradas per quest sectur èn vegnidas dumandadas.

25 d’october 2017