La tuberculosa bovina è ina malsogna infectusa bacteriala e cronica dals arments. Animals ed umans pon survegnir questa malsogna. Sco zoonosa po l'agent patogen vegnir transmess da l'animal a l'uman. En blers pajais industrials ha la tuberculosa (tb) pudì vegnir reducida tar animals da niz, e quai tras programs da cumbat intensivs. Ils ultims onns èn puspè vegnids constatads dapli cas da tuberculosa tar arments ed er tar animals selvadis en l'Europa.

La populaziun dals tschiervs en il Vorarlberg è per part infectada fermamain cun tuberculosa. Malgrà il squitsch da chatscha n'è il center dals cas da tuberculosa en la regiun centrala betg sa midà considerablamain ils onns 2013 fin 2015. I vegn supponì che la transmissiun tranter tschiervs ed arments haja lieu là, nua che arments sauns vegnan en stretg contact cun tschiervs ch'èn malsauns da tuberculosa. Quai è il cas p.ex. durant l'enviern en manaschis da chasa sco er durant la stad e l'atun sin plazzas da salina, sin plazzas da pavlar, sin alps e sin aclas. Cunquai ch'ils animals selvadis n'enconuschan nagins cunfins, stoi vegnir fatg quint che la malsogna sa derasia vinavant en direcziun dal Grischun. Pervia da la migraziun dals tschiervs tranter il Vorarlberg ed ils territoris al nord dal chantun Grischun datti in grond potenzial che la selvaschina po s'infectar cun tuberculosa er en il Grischun e che l'epidemia po sa derasar tras infecziuns entaifer l'effectiv da selvaschina e la finala er infectar il muvel da niz. Sche la tuberculosa vegn importada en ina populaziun d'animals selvadis sauna, sto questa epidemia d'animals vegnir identifitgada svelt. Pli baud che cas da tuberculosa vegnan identifitgads e pli svelt ch'i pon vegnir prendidas mesiras efficazias per impedir che la tuberculosa sa derasia vinavant en la populaziun d'animals selvadis e per prevegnir che ulteriuras spezias d'animals s'infecteschian (cunzunt arments). I dat in interess public considerabel per mesiras per impedir l'import da tuberculosa en effectivs da selvaschina indigens ed en il muvel da niz indigen. Perquai vegn la situaziun da tuberculosa survegliada gia dapi l'onn 2014 en l'effectiv d'animals selvadis.

Dumonda 1: Dapi l'onn 2013 è vegnì etablì in program da surveglianza per identifitgar a temp la tuberculosa. Durant la chatscha ed en spezial durant la chatscha posteriura vegnan prendidas emprovas da controlla da tschiervs sauns. Emprovas sin basa da la ristga vegnan prendidas durant l'entir onn sin la chatscha da tgira e tar la selvaschina disgraziada. Fin oz n'è vegnì constatà nagin cas da tuberculosa. Il settember 2016 ha il veterinari chantunal disponì in scumond da pavlar selvaschina d'ungla en las vischnancas dal Signuradi, dal Partenz e da l'Engiadina bassa. Cun il Vorarlberg exista ina collavuraziun ed i dat in barat regular sin plaun spezialisà. Il Vorarlberg persequitescha però in'autra strategia per pavlar selvaschina.

Dumonda 2: Intervenziuns directas per cumbatter l'epidemia en l'Austria n'èn betg pussaivlas. La surveglianza per identifitgar a temp il cumenzament da l'epidemia sco er mesiras per impedir che l'agent patogen vegnia transmess da la populaziun d'animals selvadis sin animals da niz u sin l'uman èn actualmain ils meds adequats.

Dumonda 3: Ils 23 da mars 2017 ha gì lieu ina scuntrada tranter las regenzas dal Grischun e dal Vorarlberg. A questa chaschun è vegnida exprimida la gronda tema ch'è colliada cun la situaziun actuala, la quala preschenta ina smanatscha permanenta per ils animals indigens e la finala er per ils umans. En il rom da sias pussaivladads vuless il chantun intensivar la collavuraziun sin il champ e sustegnair mesiras cuminaivlas. El pretenda sco mesira immediata l'installaziun d'ina plattafurma cuminaivla sin plaun spezialisà da chatscha e da servetsch veterinar per barattar a temp infurmaziuns areguard l'epidemia. Mo uschia po vegnir stgaffida ina basa per cumbatter l'epidemia cun success ed en moda transcunfinala.

Dumonda 4: La derasaziun da l'agent patogen duai vegnir impedida cun mesiras adattadas da la polizia d'epidemias e da la chatscha, quai èn p.ex.:
- mesiras da la chatscha per cumbatter e per extirpar l'epidemia
- intensivar il program da surveglianza en il territori da ristga
- controllas da charn uffizialas da tut ils animals sajettads incl. da tut ils organs interns en il territori da ristga

Dumonda 5: Sch'i vegn constatada la tuberculosa en effectivs d'animals da niz, ordinescha il veterinari chantunal tut las mesiras necessarias tenor la legislaziun federala davart epidemias d'animals (bloccada da l'effectiv, separaziun e meztga/mazzament d'animals suspectus/malsauns, nettegiament/dischinfecziun da las stallas, ulteriura surveglianza/controllas e.u.v.).

20 d'october 2017