Navigation

Inhaltsbereich

Incumbensa Pfäffli concernent la midada da la lescha da polizia dal chantun Grischun (LPol; DG 613.000) e da l'ordinaziun da polizia (OPol; DG 613.100)

Sessiun: 01.09.2017

La lescha da polizia dal chantun Grischun (DG 613.000) dals 20 d'october 2004 regla tenor l'art. 1 las incumbensas, ils dretgs e las obligaziuns da la polizia chantunala. Las incumbensas da polizia da las vischnancas na vegnan betg tangadas da questa lescha, uschenavant ch'ella na cuntegna naginas disposiziuns divergentas.

Cun l'urbanisaziun creschenta è la situaziun da segirezza en Svizra sa midada fermamain durant ils ultims onns, e questa midada progredescha vinavant. Trais quarts da la populaziun vivan ozendi en las aglomeraziuns grondas. La polizia communala stat en il center da la dinamica da las citads e dals lieus pli gronds. Las chargias da tut ils corps da polizia da la Svizra, ma en spezial er da la polizia da la citad e da la polizia communala èn creschidas cleramain durant ils ultims onns. Vitiers vegn la mancanza da respect e la violenza envers la polizia.

En il rom dal concept general politic-educativ per la polizia e per la giustia penala (CGPE) dals 29 da fanadur 2005 porscha l'Institut svizzer da polizia tar la polizia da Berna ina scolaziun da basa per assistentas ed assistents da segirezza armads, per che quels possian sa dustar per proteger sasezs en il rom dal servetsch da polizia communal ed en l'acziun en cas d'ina defensiun legitima ed en situaziuns da l'agid a la defensiun legitima.

Las candidatas ed ils candidats vegnan elegids dals corps da polizia. Ils criteris da selecziun èn: dretg da burgais svizzer, abilitad da far servetsch militar, diplom professiunal, enconuschientschas linguisticas, permiss da manischar e preschentaziun d'in extract dal register penal. La scolaziun da basa dura 15 emnas per assistentas ed assistents da segirezza armads. La scolaziun cumpiglia differents moduls. Quels èn tranter auter la segirezza persunala e la tactica d'acziun, l'applicaziun dals meds da cumbat polizials (bastun d'acziun guliv, gas lacrimogen, chanvettas) ed il trair cun l'arma da servetsch e cun ina pistola-mitraglia. Mintga modul vegn terminà cun in examen emnil. A la fin da la scolaziun datti in examen final da 2 dis. Uschia èsi garantì che la scolaziun da basa a l'assistenta u a l'assistent da segirezza armà sto vegnir terminada cun success ed ina pregiudicaziun nungiavischada è exclusa correspundentamain. Las incumbensas da la polizia giudiziala restan dentant preservadas a la polizia chantunala.

Talas assistentas ed assistents da segirezza armads fan cun success servetsch gia en plirs chantuns, tranter auter Berna, Turitg e Zug. En il Grischun stessan a disposiziun als corps da polizia communals (polizia da la citad da Cuira, polizia communala da San Murezzan) cun ina structura organisatorica – ultra da polizistas e polizists – er assistentas ed assistents da segirezza scolads bain. Da quai resultass ina clera plivalur tar l'adempliment da las incumbensas da segirezza. Sch'ina assistenta u in assistent da segirezza armà fa servetsch, vegni tegnì quint suffizientamain en spezial er da la segirezza en cas da patruglias dublas maschadadas.

Per l'onn 2018 ha la regenza empermess ina revisiun parziala da la lescha da polizia dal chantun Grischun (LPol) e da l'ordinaziun da polizia (OPol). En quest connex incumbenseschan las sutsegnadras ed ils sutsegnaders la regenza da stgaffir en l'art. 35 al. 2 da l'ordinaziun da polizia las premissas per che assistentas ed assistents da segirezza cun in certificat final tenor CGPE possian far lur servetsch en moda armada.

Cuira, il 1. da settember 2017

Pfäffli, Salis, Della Vedova, Alig, Bleiker, Blumenthal, Bondolfi, Brandenburger, Caduff, Caluori, Casanova (Glion), Casanova-Maron (Domat), Caviezel (Tavau Clavadel), Clalüna, Claus, Crameri, Danuser, Davaz, Dermont, Dosch, Engler, Fasani, Felix (Haldenstein), Felix (Scuol), Giacomelli, Gunzinger, Hardegger, Hartmann, Heiz, Hitz-Rusch, Holzinger-Loretz, Jeker, Jenny, Kappeler, Kasper, Koch (Tumein), Komminoth-Elmer, Kunz (Fläsch), Kunz (Cuira), Kuoni, Lamprecht, Lorez-Meuli, Mani-Heldstab, Marti, Mathis, Michael (Castasegna), Müller, Nay, Niggli (Samedan), Papa, Pedrini, Schneider, Schutz, Steiger, Stiffler (Tavau Plaz), Stiffler (Cuira), Thomann-Frank, Tomaschett (Breil), Troncana-Sauer, Valär, Vetsch (Pragg-Jenaz), Waidacher, Weber, Weidmann, Widmer-Spreiter, Wieland, Costa, Natter, Rodigari, Sigron, Stäbler, Wellig

Resposta da la regenza

En il rom dal concept general d'instrucziun da la polizia (CGIP) planisescha l'institut svizzer da polizia (ISP) d'introducir ina scolaziun per assistentas polizialas ed assistents polizials da segirezza (Ass Se). Questa scolaziun vegn ad avair ina structura modulara ed a porscher probablamain la pussaivladad d'instruir las assistentas ed ils assistents da segirezza vi da l'arma. Questa scolaziun dastgass avair lieu l'emprima giada l'onn 2020. Actualmain n'exista anc nagina scolaziun per assistentas ed assistents da segirezza, cun la quala po vegnir acquistà in certificat final tenor CGIP.

Percunter scolescha la polizia chantunala da Berna gia dapi plirs onns assistentas ed assistents da segirezza. En il modul da scolaziun correspundent pon quellas e quels er emprender a duvrar armas. Pliras persunas che lavuran actualmain en il chantun Grischun per la polizia chantunala dal Grischun e per singulas vischnancas han absolvì questa scolaziun purschida da la polizia chantunala da Berna. Lur engaschament per incumbensas che na pretendan betg ina scolaziun poliziala cumplessiva è sa cumprovà. Ellas ed els vegnan stimads sco collavuraturas e collavuraturs che adempleschan incumbensas polizialas sutordinadas e che sustegnan las forzas polizialas ordinarias en lur lavur. En cas d'acziuns d'assistentas e d'assistents da segirezza sto adina vegnir resguardà ch'ellas ed els n'han betg ina scolaziun ch'è cumparegliabla cun quella da las forzas polizialas e che lur enconuschientschas èn en tut ils secturs pli rudimentaras che quellas da las forzas polizialas ordinarias. Las incumbensas centralas da la polizia, sco en spezial las mesiras repressivas, restan perquai resalvadas a las polizistas scoladas ed als polizists scolads che dastgan far sco unicas ed unics il servetsch armà.

Questa situaziun vuless l'incumbensa qua avant maun midar en quel senn ch'i duai vegnir stgaffida ina basa en l'ordinaziun da polizia (OPol; DG 613.100) per armar assistentas ed assistents da segirezza che han absolvì ina scolaziun sco assistenta resp. assistent da segirezza cun in certificat final tenor CGIP. Ina tala regulaziun avess – sco explitgà qua survart – in effect il pli baud a partir da l'onn 2020, perquai ch'i n'exista mumentanamain nagina scolaziun che correspundess a questas pretensiuns. Abstrahà da quai pudessan assistentas ed assistents da segirezza armads surpigliar acziuns en il chantun Grischun mo en paucs secturs. En chantuns ch'enconuschan assistentas ed assistents da segirezza armads vegnan ellas ed els duvrads primarmain per transports da praschuniers, per controllas d'access sco er per la protecziun d'objects (ambassadas). Tals engaschaments èn rars en il chantun Grischun. En auters secturs mancan per il mument las experientschas cun l'engaschament d'assistentas e d'assistents da segirezza armads. Perquai stoi a l'avis da la regenza vegnir agì qua cun gronda retegnientscha perquai ch'i sa tracta en quest connex d'in sectur fitg sensibel da l'execuziun da la pussanza statala. I sto esser segir ch'i vegnan armadas mo persunas che garanteschan che l'arma vegnia duvrada en moda adequata. Assistentas ed assistents da segirezza absolvan actualmain ina scolaziun che dura mo 11 fin 19 emnas. A l'avis da la regenza na basta quai betg per qualifitgar assistentas ed assistents da segirezza per in servetsch armà che na pudess betg vegnir limità en il chantun Grischun a transports da praschuniers, a controllas d'access sco er a la protecziun d'objects (ambassadas) sco che quai è il cas en ils chantuns cun ina gronda populaziun che han in corps da polizia grond. Schizunt en quests chantuns na datti betg patruglias maschadadas. En ils chantuns dal concordat da polizia da la Svizra orientala (Ostpol) fan las assistentas ed ils assistents da segirezza lur servetsch senza armas. Sin basa da las consideraziuns qua survart refusa la regenza per il mument l'engaschament d'assistentas e d'assistents da segirezza armads.

Sa basond sin las ponderaziuns preschentadas propona la regenza al cussegl grond da betg acceptar questa incumbensa.

25 d'october 2017