Navigation

Inhaltsbereich

Dumonda Bucher-Brini concernent la qualitad dal "agid cumplementar per educar" e da las purschidas da l'agid per uffants e giuvenils en il chantun Grischun

Sessiun: 06.12.2017

Las enconuschientschas ch'èn vegnidas fatgas cun elavurar il chapitel da las "mesiras repressivas" mussan eveniments commovents sco er gravants ch'ils uffants ed ils giuvenils pertutgads han stuì supportar quella giada. Varsaquantas persunas pertutgadas sa chattan er oz anc en l'uschenumnà process d'elavuraziun. Ina finamira impurtanta è perquai quella che talas "mesiras repressivas" (sco da quella giada) na sa repetian betg e che las autoritads e las instituziuns respectivas reageschian e decidian a temp ed a favur dal bainstar da l'uffant. Oz sco er quella giada èn ils motivs per in sustegn famigliar fin ad ina collocaziun en ina instituziun quasi identics. Er oz datti eveniments che furman in context da sforz per motivs da la protecziun e dal bainstar da l'uffant.

En quest connex tschentan las sutsegnadras ed ils sutsegnaders las suandantas dumondas a la regenza:

1. Co vegni garantì ch'ils uffants ed ils giuvenils sco er lur famiglias survegnan il dretg mument la mesira correcta?

2. Vegnan las mesiras scleridas en moda differenziada e stattan a disposiziun avunda resursas per far quai?

3. Stattan a disposiziun avunda resursas per accumpagnar questas mesiras?

4. Co vegn garantida la qualitad en il sectur simpel ed en il sectur pretensius (ambulant e staziunar) da l'agid per uffants e giuvenils?

5. Tge tenuta ha la regenza envers ina lescha davart l'agid per uffants e giuvenils (sco per exempel quella dal chantun Turitg) che fixescha las cundiziuns generalas per tut il "agid cumplementar per educar"?

Cuira, ils 6 da december 2017

Bucher-Brini, Locher Benguerel, Casty, Atanes, Baselgia-Brunner, Brandenburger, Cahenzli-Philipp, Caviezel (Cuira), Clalüna, Deplazes, Dermont, Felix (Scuol), Geisseler, Gunzinger, Hitz-Rusch, Holzinger-Loretz, Jaag, Joos, Märchy-Caduff, Marti, Monigatti, Niederer, Niggli-Mathis (Grüsch), Noi-Togni, Perl, Peyer, Pfenninger, Pult, Stiffler (Cuira), Thomann-Frank, Thöny, Tomaschett-Berther (Trun), von Ballmoos, Widmer-Spreiter, Antognini, Engler (Surava), Pfister, Wellig

Resposta da la regenza

Tar la dumonda 1: Sch'il bainstar da l'uffant è periclità e sch'ils geniturs na procuran betg suffizientamain per remedura, po mintga persuna sa drizzar a l'autoritad per la protecziun d'uffants e da creschids (APUC). L'interdisciplinaritad da la APUC garantescha che la situaziun da periclitaziun vegn analisada e giuditgada da differentas opticas. Per quest intent ha la APUC in barat regular cun autras autoritads spezialisadas. La APUC metta gronda paisa d'orientar e d'explitgar en moda cumplessiva las mesiras ch'ella dispona (p.ex. communicaziun a bucca da las decisiuns). Il success d'ina mesira dependa bain essenzialmain da la prontezza dals geniturs e dals uffants sco er dals giuvenils da cooperar.

Tar la dumonda 2: Grazia a la APUC interdisciplinara ch'è en uffizi dapi il cumenzament da l'onn 2013 e ses stretg contact cun ils servetschs da scleriment vegn adina fatg in scleriment differenzià. En quest connex è la APUC obligada d'observar il princip d'inquisiziun. Pli cumplexa che la situaziun da periclitaziun è e dapli lavur da scleriment ch'i dat per regla. Sch'i manca dal tuttafatg la prontezza da cooperar tar ils geniturs pertutgads e tar l'uffant u giuvenil pertutgà, vegn la lavur da la APUC engrevgiada supplementarmain.
Da princip stattan a disposiziun a la APUC avunda resursas da persunal per far ses scleriments. Scleriments cumplessivs per la protecziun d'uffants pon chaschunar in augment andetg dal basegn da resursas per in tschert temp. Pervia da quai poi dar temporarmain stretgas da persunal.

Tar la dumonda 3: En quels cas, nua che la procedura da scleriment è terminada ed ina mesira è vegnida disponida, pon la controlla periodica ed eventualmain l'examinaziun, sch'ina mesira sto vegnir adattada, vegnir fatgas cun las resursas da la APUC ch'èn avant maun. Per exequir la mesira èn alura savens dumandadas las procuraturas ed ils procuraturs. En cas da plirs mandats cumplexs da la protecziun d'uffants crescha lur basegn da resursas. Qua èn dumandadas las instituziuns regiunalas ch'èn responsablas ed obligadas da metter a disposiziun las resursas necessarias correspundentas.

Tar la dumonda 4: Per pudair garantir la qualitad exista in'obligaziun da dumandar ina permissiun per chasas d'uffants e da giuvenils, per famiglias da tgira, per organisaziuns per il plazzament d'uffants en famiglias e per purschidas da la tgira d'uffants cumplementara a la famiglia. Supplementarmain vegn fatga almain mintga 2 onns ina visita da surveglianza tar questas instituziuns.
En cas da mesiras da la protecziun d'uffants tenor il dretg civil èn ils posts involvids (p.ex. procuraturas e procuraturs, instituziuns) obligads da far periodicamain e – sche las relaziuns sa midan – immediatamain in rapport a la APUC. En situaziuns pretensiusas èn ultra da quai savens involvidas pliras persunas spezialisadas che tgiran in barat vicendaivel. Grazia a questas differentas pussaivladads da controlla po la APUC s'infurmar bain davart l'andament da las mesiras sco er davart la qualitad da la purschida respectiva ed intervegnir, sch'i fa basegn.

Tar la dumonda 5: La regenza è da l'avis ch'i na saja betg necessari da relaschar ina lescha davart l'agid per uffants e giuvenils, damai che la regulaziun dal chantun Turitg ch'è menziunada en la dumonda è gia cuntegnida en las leschas respectivas (en spezial en la lescha introductiva tar il cudesch civil svizzer [LItCCS; DG 210.100], en la lescha davart ils uffants confidads [DG 219.050] ed en la lescha da scola [DG 421.000]). Per ademplir l'incumbensa ch'il chantun ha survegnì tenor l'art. 317 CCS, ha la regenza relaschà ils 15 d'avust 2006 l'ordinaziun davart la collavuraziun e davart la coordinaziun en l'agid per la giuventetgna (DG 219.210). Tenor quella sto il chantun garantir cun prescripziuns adattadas la collavuraziun adequata da las autoritads e dals posts en il sectur da la protecziun d'uffants tenor il dretg civil, dal dretg penal per giuvenils e da l'ulteriur agid per la giuventetgna. Tenor questa ordinaziun elegia il departament d'economia publica e fatgs socials ina cumissiun spezialisada che cusseglia la regenza areguard ils basegns e las purschidas actualas sco er areguard las meglieraziuns ch'èn necessarias en la protecziun d'uffants. Plinavant promova la cumissiun la collavuraziun interdisciplinara da las instituziuns fusiunadas en la "rait per la protecziun d'uffants dal Grischun".

7 da mars 2018