Navigation

Inhaltsbereich

Incumbensa Tenchio concernent il mantegniment da champs da classa, d'emnas da project e d'excursiuns en las scolas obligatoricas dal chantun Grischun

Sessiun: 13.02.2018

L'art. 19 da la constituziun federala garantescha il dretg d'ina instrucziun suffizienta e gratuita da scola fundamentala. Sin basa da l'art. 19 da la constituziun federala po mintga uffant e mintga giuvenil fin e cun il stgalim secundar I far valair in dretg d'ina instrucziun gratuita da scola fundamentala, quai che signifitga a medem temp in dretg d'ina prestaziun statala positiva en il sectur da furmaziun. Quest dretg cumpiglia tut ils meds necessaris che servan directamain a l'intent da l'instrucziun, cunzunt er ils meds d'instrucziun correspundents ed il material da scola respectiv. Tenor la giurisdicziun dal tribunal federal dastgan contribuziuns als custs d'alimentaziun sco er da transport e d'alloschi en champs da classa e sin excursiuns vegnir incassadas dals geniturs mo, sche «talas occurrenzas tutgan tar l'instrucziun da scola fundamentala necessaria», che sto en quest cas dentant succeder gratuitamain tenor la norma numnada. Sch'ins parta dal fatg che tut ils meds necessaris che servan directamain a l'intent da l'instrucziun ston vegnir mess a disposiziun gratuitamain, cumpiglia quai er expensas per excursiuns e per champs, sche la participaziun è obligatorica.

En sia sentenzia dals 7 da december 2017 (2C_206/2016) ha il tribunal federal decidì ussa che «mo quels custs [dastgian] vegnir mess a quint per quest intent als geniturs, ch'els spargnan tras l'absenza da lur uffants. Els sa restrenschan a l'alimentaziun dals uffants […]. L'import maximal admissibel dastgass importar tranter 10.– fr. e 16.– fr. per di, tut tenor la vegliadetgna da l'uffant […].» (consideraziun 3.1.3.). Sut l'aspect da questas explicaziuns ha il tribunal federal abolì en la sentenzia numnada ina norma legala dal chantun Turgovia, tenor la quala «contribuziuns pon vegnir incassadas per viadis da classas, per excursiuns e per champs sco er per autras occurrenzas obligatoricas […].»

Tenor l'art. 15 lit. d da la lescha da scola dal chantun Grischun pon vegnir incassadas «contribuziuns adequatas» «da las scolaras e dals scolars respectivamain da las persunas cun la pussanza dals geniturs», en spezial per «viadis da scola, excursiuns sco er champs da classa».

Tras la sentenzia numnada dastgan las scolas incassar a partir d'immediat maximalmain 16.– fr. per uffant resp. per giuvenil e per di per viadis da scola, per excursiuns sco er per champs da classa obligatorics. Sut quest aspect na poi betg pli vegnir quintà cun la libra voluntad da tut ils geniturs d'ina classa da pajar dapli, perquai ch'il dretg d'ina instrucziun gratuita da scola fundamentala vegniss uschiglio violà. En cas ch'il sustegn statal per talas occurrenzas na vegn betg garantì autramain, exista plinavant il privel real che las scolas vegnian a stritgar en l'avegnir pli e pli savens talas occurrenzas, ch'èn impurtantas per il svilup da cumpetenzas culturalas e socialas, ma er per il spiert da classa.

Sut quest aspect incumbenseschan las sutsegnadras ed ils sutsegnaders la regenza da suttametter al cussegl grond entaifer maximalmain dus onns suenter l'acceptaziun da questa incumbensa in rapport ed ina proposta davart las mesiras (eventualmain er legislativas) che la regenza resp. il cussegl grond ha l'intenziun da prender per garantir che viadis da scola, excursiuns sco er champs da classa ed emnas da project obligatorics vegnian cuntinuads en l'avegnir sco en lur furmas d'enfin ussa, senza ch'i stoppian vegnir incassadas dals geniturs contribuziuns che surpassan las contribuziuns da la sentenzia dal tribunal federal numnada.

Cuira, ils 13 da favrer 2018

Tenchio, Locher Benguerel, Pedrini, Albertin, Atanes, Baselgia-Brunner, Berther (Mustér), Blumenthal, Bondolfi, Brandenburger, Bucher-Brini, Burkhardt, Caduff, Cahenzli-Philipp, Caluori, Casanova (Glion), Casutt-Derungs, Cavegn, Caviezel (Cuira), Caviezel (Tavau Clavadel), Crameri, Danuser, Darms-Landolt, Della Vedova, Deplazes, Dermont, Dosch, Fasani, Felix (Scuol), Florin-Caluori, Foffa, Holzinger-Loretz, Jaag, Jeker, Joos, Kollegger, Kunfermann, Mani-Heldstab, Märchy-Caduff, Michael (Donat), Monigatti, Nay, Niederer, Niggli-Mathis (Grüsch), Noi-Togni, Papa, Perl, Peyer, Pfenninger, Pult, Salis, Sax, Schneider, Steiger, Thomann-Frank, Thöny, Tomaschett (Breil), Tomaschett-Berther (Trun), Vetsch (Pragg-Jenaz), von Ballmoos, Widmer-Spreiter, Zanetti, Berther (Segnas), Gugelmann, Lombardi, Stäbler

Resposta da la regenza

La sentenzia dal tribunal federal dals 7 da december 2017 concernent la participaziun da las persunas responsablas per l'educaziun als custs da champs da classa, d'emnas da project e d'excursiuns (2C_206/2016) ha procurà per gronda irritaziun en tut la Svizra e chaschunà malsegirezzas areguard la pratica vertenta en ils chantuns. Tenor la sentenzia dastgan vegnir mess a quint als geniturs, per occurrenzas da scola obligatoricas, mo custs ch'els spargnan tras l'absenza da lur uffants. Quests custs dastgian importar – tenor la decisiun giudiziala – tranter 10 e 16 francs per di, tut tenor la vegliadetgna da l'uffant. En quest connex sa basa il tribunal p.ex. sin la pratica dal chantun Turitg.

Tenor l'art. 15 da la lescha davart las scolas popularas dal chantun Grischun dals 21 da mars 2012 (lescha da scola; DG 421.000) pon vegnir incassadas da las scolaras e dals scolars resp. da las persunas responsablas per l'educaziun contribuziuns adequatas per viadis da scola, per excursiuns sco er per champs da classa. Disposiziuns executivas n'existan naginas en chaussa. Ils purtaders da scola fixeschan perquai autonomamain, tge contribuziun adequata che po vegnir incassada dals geniturs per questas activitads da scola, uschenavant che la contribuziun na stat betg en cuntradicziun cun disposiziuns giuridicas. Las consequenzas da la sentenzia dal tribunal federal na sa laschan per il mument betg giuditgar definitivamain. Per survegnir dapli clerezza en quest reguard e per persequitar in proceder interchantunal coordinà ha il secretariat general da la conferenza svizra dals directurs chantunals da l'educaziun publica (CDEP) survegnì l'incumbensa da la suprastanza d'analisar las consequenzas da la sentenzia dal tribunal federal e da tractandar quest punct a la radunanza plenara da la CDEP dals 21 da zercladur 2018.

Ils purtaders da scola pon declerar er vinavant che las occurrenzas enumeradas sajan obligatoricas. Tenor l'art. 72 da la lescha da scola survegnan las vischnancas contribuziuns per l'instrucziun obligatorica da la scola populara (pauschala per la scola regulara). Latiers tutgan er las activitads enumeradas. Ultra da quai sustegna il chantun champs dal sport da scola voluntar cun contribuziuns tenor l'ordinaziun davart la promoziun dal sport e dal moviment dals 7 da fanadur 2015 (ordinaziun da promoziun dal sport; DG 470.010). Medemamain survegnan las scolas contribuziuns da la promoziun da la cultura dal Grischun per visitas culturalas e per projects culturals. Sch'ils purtaders da scola avessan pretendì dals geniturs en l'ultim passà contribuziuns memia autas per champs, per emnas da project e per excursiuns, stuessan els resguardar quai en l'avegnir cun budgetar il manaschi e l'organisaziun da la scola.

Las basas giuridicas existentas sco er las contribuziuns chantunalas menziunadas suttastritgan la gronda impurtanza da champs da scola, d'excursiuns, d'emnas da project e da viadis da scola per la scola grischuna. La regenza è da l'avis che questas activitads correspundian ad in basegn pedagogic fundamental. L'impurtanza per rinforzar il svilup social entaifer il temp da scola obligatoric è gronda. Sche las scolaras ed ils scolars duain percepir e chapir ils umans en lur puncts cuminaivels, èn emnas da project u champs da scola adattads particularmain per quest intent. Er autras cumpetenzas socialas, sco p.ex. l'applicaziun da l'abilitad da cooperar, da l'abilitad da schliar conflicts e dal savair ir enturn cun diversitad, sa laschan sviluppar vinavant – tenor l'avis da la regenza – excellentamain en il context d'in champ da classa.

En il rom d'ina proxima revisiun da la lescha da scola duai perquai vegnir examinà, sch'i duain vegnir surpigliadas per il stgalim primar e per il stgalim secundar I prescripziuns minimalas areguard la realisaziun da singulas emnas da project e da champ per rinforzar las cumpetenzas socialas.

Sa basond sin questas consideraziuns propona la regenza al cussegl grond d'acceptar questa incumbensa.

13 d'avrigl 2018