Svilups tecnologics han adina influenzà e midà noss mintgadi, e quai vala er per las midadas tecnicas che vegnan designadas cun la noziun generala «digitalisaziun». Singuls commembers da la societad arrivan mintgamai fitg svelt da trair a niz ils avantatgs dals svilups tecnologics novs, entant che auters han fadia da chattar il contact cun quests novs svilups. Il maun public sto procurar che las consequenzas negativas da las novas tecnologias na donnegeschian betg il singul e la societad e che lur avantatgs possian vegnir sche pussaivel tratgs a niz da tuts. En spezial sa tracti d'infrastructuras adequatas sco er da la scolaziun da la populaziun en l'utilisaziun pussaivla da tecnologias novas. L'offensiva da digitalisaziun pretendida cun l'incumbensa qua avant maun duai sa concentrar oravant tut sin il sectur da furmaziun e formular eventualas pretensiuns envers l'infrastructura.

En il text da motivaziun da l'incumbensa vegni renvià a l'offensiva da furmaziun dal chantun Son Gagl. En quella èn formuladas directivas strategicas che concernan la preparaziun sin il mund digital en l'instrucziun da la scola populara e dal stgalim secundar II, il basegn da l'economia d'ina furmaziun professiunala fatga sin mesira, la scolaziun, orientada a la dumonda, da forzas spezialas a las scolas autas spezialisadas, la scolaziun da caders extraordinaris en il manaschament tecnic sco er en general ina scolaziun che tegna quint da la tecnica e da l'economia.

La «digitalisaziun» influenzescha noss mintgadi en ina dimensiun adina pli gronda. Perquai èn vegnidas instradadas er en il Grischun gia differentas mesiras che pertutgan la scolaziun. Cun il cumenzament da l'onn da scola 2018/19 (introducziun dal Plan d'instrucziun 21) cumenza l'instrucziun «medias ed informatica» a la scola populara. Al gimnasi èsi previs d'introducir l'informatica sco rom d'instrucziun obligatoric fin il pli tard al cumenzament da l'onn da scola 2022/23. En quest connex stoi vegnir resguardà ch'il rom cumplementar «informatica» vegn purschì gia oz al gimnasi e che medias digitalas vegnan duvradas adina pli savens en l'instrucziun. En quai che concerna la furmaziun professiunala sviluppan las organisaziuns dal mund da lavur (OdML) ensemen cun ils partenaris mintgamai vinavant las professiuns respectivas. Per mintga professiun exista in'ordinaziun da furmaziun sco er in plan da furmaziun. La consideraziun correspundenta da la «digitalisaziun» è pia en emprima lingia chaussa da las OdML. En il rom da l'instrucziun a las scolas professiunalas spezialisadas vegnan duvrads gia oz medias d'emprender digitalas, meds d'instrucziun digitals e l'informatica. La scola auta da tecnica ed economia (SATE Cuira) ha introducì da nov il studi «fotonics» e la direcziun d'approfundaziun «digital business management» e porscha ina scolaziun supplementara en scienzas d'infurmaziun. La strategia chantunala da scola auta e da perscrutaziun numna sco sisavel champ da profil «computational science» ed ha dumandà ina professura speziala en cooperaziun cun l'institut svizzer da retschertgas davart allergias ed asma en il sectur «data analytics, visualization and simulation». Ultra da quai ha la ibW scola spezialisada superiura da la Svizra sidorientala gia ina vasta purschida da scolaziun e da furmaziun supplementara en il sectur informatica. Activitads da las interpresas concernent la scolaziun e la furmaziun supplementara da las collavuraturas e dals collavuraturs davart la «digitalisaziun» cumpletteschan la purschida da furmaziun da scola.

Resumond poi vegnir constatà ch'i vegnan realisadas gia oz differentas mesiras en il sectur da furmaziun. Quellas correspundan er a parts da l'offensiva da furmaziun planisada en il chantun Son Gagl en il sectur da la «digitalisaziun». Stgaffir novas basas legalas n'è betg necessari. Resguardond las purschidas da scolaziun menziunadas qua survart ch'existan en il chantun è la regenza però pronta d'examinar l'integraziun d'in punct central da svilup «digitalisaziun en il sectur da la furmaziun» en il program da la regenza 2021–2024.

Sa basond sin questas consideraziuns propona la regenza al cussegl grond da refusar questa incumbensa da fracziun.

27 da zercladur 2018