Navigation

Inhaltsbereich

Dumonda Ulber concernent ils custs da la IT per la scola populara pervia da l'introducziun dal PI 21

Sessiun: 04.12.2018

Tenor il conclus da la regenza nr. 246 dals 15 da mars 2016 è il Plan d'instrucziun 21 GR vegnì realisà cun agid da differentas mesiras. En il rapport Realisaziun dal Plan d'instrucziun 21 Grischun dal departament d'educaziun, cultura e protecziun da l'ambient (DECA) vegni explitgà che las lecziuns dal rom medias ed informatica vegnian amplifitgadas cun l'entrada en vigur dal nov Plan d'instrucziun 21 GR per l'onn da scola 2018/19 e ch'ellas vegnian extendidas sin il 2. ciclus, pia sin il stgalim primar.

Sco consequenza concreta da quai resultan gronds custs supplementars per ils purtaders da scola e per las vischnancas. L'infrastructura sto per part vegnir remplazzada u cumplettada. Per exempel ston vegnir cumprads computers e moniturs, avunda laptops u auters apparats electronics sco iPads, per che l'instrucziun saja irreproschabla e correspundia al Plan d'instrucziun 21 GR.

Tenor las calculaziuns da differentas vischnancas da scola dal stgalim primar e dal stgalim superiur importan ils custs supple­mentars tranter 600 e 900 francs per uffant u schizunt dapli. In quint integral dals custs per l'entira instrucziun dad IT mussa fin 900 francs per onn per scolara u scolar dal stgalim superiur.

Las sutsegnadras ed ils sutsegnaders fan las suandantas dumondas en chaussa:

1.     Existan cifras expressivas davart ils custs supplementars che l'introducziun dal PI 21 ha chaschunà als purtaders da scola en il rom medias ed informatica?

2.     Èsi pussaivel da pajar als purtaders da scola contribuziuns a favur dals custs unics da la IT sco er a favur dals custs perio­dics annuals enorms, e quai or dal credit d'impegn da 40 milliuns francs ch'è vegnì concludì l'avust 2018 e ch'è destinà a la digitalisaziun?

3.     Vesa la regenza ina pussaivladad da pajar als purtaders da scola ina contribuziun periodica per il support da las installa­ziuns dad IT?

4.     Vesa la regenza ina pussaivladad da sustegnair ils purtaders da scola en moda activa, explicita e cumplessiva en la pedago­gia da medias cun curs installads che vegnan organisads periodicamain u cun contribuziuns finanzialas?

Cuira, ils 4 da december 2018

Ulber, Hitz-Rusch, Gugelmann, Berther, Berweger, Bigliel, Brunold, Caluori, Casutt-Derungs, Cavegn, Crameri, Danuser, Deplazes (Rabius), Derungs, Ellemunter, Engler, Epp, Florin-Caluori, Flütsch, Föhn, Gasser, Giacomelli, Hartmann-Conrad, Jochum, Kasper, Kienz, Kohler, Kunfermann, Lamprecht, Locher Benguerel, Loepfe, Maissen, Märchy-Caduff, Marti, Michael (Donat), Mittner, Natter, Niggli-Mathis (Grüsch), Noi-Togni, Papa, Paterlini, Rettich, Rüegg, Sax, Schmid, Schneider, Schutz, Tanner, Thomann-Frank, Thür-Suter, Tomaschett (Breil), Tomaschett-Berther (Trun), Waidacher, Widmer (Favugn), Widmer-Spreiter (Cuira), Zanetti (Sent), Zanetti (Landquart), Brändli Capaul, Bürgi-Büchel, Decurtins-Jermann, Gujan-Dönier

Resposta da la regenza

Tar la dumonda 1: Independentamain da l'introducziun dal Plan d'instrucziun 21 GR (PI21 GR) pretendan ils svilups socials en il sectur da medias e d'informatica che las scolas fetschian adattaziuns en quest sectur.

Dapi il settember 2018 è avant maun en tut las trais linguas chantunalas il manual "Medias ed informatica" ch'il departament d'educaziun, cultura e protecziun da l'am­bient (DECA) ha relaschà per incumbensa da la cumissiun per furmaziun e cultura (CFC) (cf. incumbensa da la CFC concernent in concept dad ICT per la scola populara dal chantun Grischun). Quest manual ademplescha quatter funcziuns principalas:

–   Per mauns da las scolas sclerescha el la dumonda, co che medias ed informatica pon promover sco er facilitar l'emprender, ed el definescha las prescripziuns gene­ralas per concepir l'instrucziun da medias e d'informatica tenor il PI21 GR.

–   El furma la basa concepziunala per las furmaziuns supplementaras obligatoricas en il rom da la realisaziun dal PI21 GR, cun las qualas l'uffizi per la scola populara ed il sport (USS) ha incumbensà la scola auta da pedagogia dal Grischun.

–   El descriva las premissas che las scolas ston ademplir per pudair realisar il plan d'in­strucziun dal modul "medias ed informatica" dal PI21 GR e serva pia als purta­ders da scola sco basa per elavurar in agen concept da medias e d'informatica.

–   El cuntegna las recumandaziuns dal DECA als purtaders da scola areguard l'equi­pament dad ICT en las scolas. Quellas èn divididas en dus terms: avust 2018, cur ch'il PI21 GR daventa liant, ed avust 2021, cur che la realisaziun dal PI21 GR vegn terminada.

Las recumandaziuns areguard l'equipament resguardan ina inventarisaziun da l'equi­pament dad ICT en las scolas popularas grischunas ch'il USS ha realisà dus onns avant l'introducziun dal PI21 GR (2016). Questa inventarisaziun ha revelà grondas differenzas tranter ils purtaders da scola en quest reguard. Il basegn d'acquisiziun è perquai medemamain fitg different. Plinavant fan intgins purtaders da scola investi­ziuns che surpassan ils standards minimals recumandads dal chantun. Ina cumpa­regliaziun dals custs tranter ils purtaders da scola na fiss perquai betg expressiva, uschia ch'il chantun na registrescha naginas cifras correspundentas.

Tar la dumonda 2: Actualmain na poi betg anc vegnir ditg, tge che po vegnir finanzià sur il credit d'impegn da 40 milliuns francs per in stausch da digitalisaziun en il chantun Grischun. Il credit n'è betg anc disponibel; per quest intent ston esser avant maun l'emprim las basas per crear e per utilisar il credit. Il chantun elavura actualmain ils documents da consultaziun correspundents.

Tar la dumonda 3: Per contribuziuns unicas e periodicas al support da las installaziuns dad IT mancan las disposiziuns legalas correspundentas en la lescha da scola. Quel­las stuessan l'emprim vegnir stgaffidas. Plinavant vegni renvià a la resposta da la du­monda 2.

Tar la dumonda 4: En il rom da la realisaziun dal PI21 GR survegnan ils purtaders da scolas grischunas – dapi il cumenzament da l'onn 2017 – il sustegn dal chantun en furma da furmaziuns supplementaras obligatoricas en "medias ed informatica" per tut las persunas d'instrucziun pertutgadas

Persunas d'instrucziun da la scolina e da la scola primara che n'instrueschan betg il rom "medias ed informatica", frequentan ina furmaziun supplementara d'in mez di en "medias ed informatica". Quai èn circa 750 persunas d'instrucziun. Per las circa 250 persunas d'instrucziun da la scola primara ch'instrueschan il rom "medias ed in­for­matica", dura la furmaziun supplementara trais dis. Var 350 persunas d'instrucziun dal stgalim secundar I ch'instrueschan il rom "medias ed informatica", frequentan ina fur­maziun supplementara d'in di.

Quai vul dir ch'il chantun finanziescha occurrenzas obligatoricas da furmaziun supple­mentara en la dimensiun da var 155 000 francs en il sectur da medias e d'informatica durant la fasa da realisaziun dal PI21 GR (2016–2021). En quest sectur pon ils purta­ders da scola ultra da quai frequentar ina furmaziun supplementara d'in di entaifer la scola sin custs dal chantun.

13 da favrer 2019