La regenza è conscienta da l'impurtanza da la via sursilvana H19 per l'avertura da la Surselva – en spezial per las vischnancas da la regiun Sursassiala – sco er dals pass da l'Alpsu e dal Lucmagn. Il traject da via e da viafier critic pervia dal privel da lavinas cumenza a la sortida dal vitg da Sumvitg e finescha a l'entrada dal vitg da Mustér. Dapi l'onn 2013 è quest traject da la via chantunala stà serrà tut en tut per 45 uras. Entaifer quest traject na pericliteschan betg mo las lavinas da la Val Lumpegna e da la Val S. Placi las infrastructura dal traffic, mabain anc ulteriurs laviners ed autras vallatschas. Ultra da la via chantunala e da la lingia da viafier sa chattan er edifizis, vias communalas sco er sendas da viandar l'enviern e loipas en l'intschess dals laviners correspundents.

En ina brev al chantun han las vischnancas da Tujetsch, da Mustér, da Medel/Luc­magn, da Trun e da Sumvitg sustegnì explicitamain las mesiras architectonicas menziunadas en l'incumbensa. En quest connex po la regenza prender posiziun sco suonda:

Tar punct a): En la Val Lumpegna è gia oz installà in indriz d'alarm cunter lavinas (cun clappas). La via chantunala e la lingia da viafier han amplas che serran auto­maticamain il traject en cas d'in eveniment. Tut las autras vias e tut ils auters secturs ston vegnir serrads a maun. I sto vegnir sclerì detagliadamain (p.ex. eventualas lavinas secundaras, grondezza da las lavinas chaschunadas artifizialmain e lur potenzial per periclitar objects da protecziun, lavurs necessarias da segirada e da mantegniment), sch'i po vegnir profità d'in indriz fix per siglientar lavinas en la Val Lumpegna. La regenza è pronta da far quests scleriments.

Tar punct b): Er per la surveglianza pussaivla e per la serrada automatica da la via en cas da lavinas or da la Val S. Placi ston vegnir fatgs scleriments detagliads con­cernent il niz e concernent la realisabladad. La regenza è pronta da far quels scleri­ments en moda coordinada cun ils scleriments per la Val Lumpegna.

Tar ils puncts c) e d): En quai che concerna la pretensiun d'in sviament per il vitg da Mustér stoi vegnir constatà ch'i dat en il chantun Grischun numerus basegns are­guard projects gronds per distgargiar il territori d'abitadi dal traffic da transit. Cun ils meds finanzials che stattan a disposiziun sto l'uffizi da construcziun bassa garantir – sco emprima prioritad – il mantegniment manaschial da las vias (p.ex. servetsch d'enviern), suandà da las mesiras per mantegnair la substanza architectonica (mantegniment architectonic da l'infrastructura existenta da las vias). Terza prioritad ha l'adattaziun da l'infrastructura existenta al standard da norma che vala oz, p.ex. areguard la segirezza dal traffic ed areguard la capacitad. Correspundentamain èn pervia da quai vegnids adattads ils ultims onns ils dus trajects da la via sursilvana H19 tranter Rabius e Sumvitg (punt Mulinaun) sco er tranter la punt Lumpegna e Mustér. Per ils trajects "Cuas fin punt Lumpegna" sco er "colliaziun Andiast fin Tavanasa" vegnan actualmain elavurads projects.

Cun ils meds finanzials che restan suenter che questas incumbensas èn liquidadas po la finala vegnir prendida per mauns la realisaziun da projects gronds sco p.ex. sviaments da lieus. Tenor las directivas da la regenza duai en quest connex vegnir realisà mo in project per ina construcziun nova il medem mument. Sco projects suc­cessurs dal sviament da Silvaplauna ch'è vegnì avert la stad 2018 vegnan giuditgads sco prioritars en spezial ils sviaments La Punt, Sta. Maria V.M. sco er Susch. Ultra da quai èn ulteriurs projects d'adattaziun gronds en elavuraziun. En il rom dals meds finanzials disponibels pon – ord vista da la regenza – ulteriurs sviaments da vitgs vegnir projectads e realisads ils proxims onns, uschespert ch'i resultan libertads d'agir grazia als progress d'elavuraziun tar ils projects gronds ch'èn gia vegnids prendids per mauns.

Sin basa da questas explicaziuns propona la regenza al cussegl grond d'approvar l'incumbensa qua avant maun concernent ils puncts a) e b) e da la refusar concernent ils puncts c) e d).

25 d'avrigl 2019