Navigation

Inhaltsbereich

Dumonda Michael (Castasegna) concernent la reorganisaziun da la polizia chantunala en la subregiun Engiadin'ota / Bregaglia

Sessiun: 12.02.2019

En il decurs dal mais da december 2018 èn las vischnancas da la subregiun Engiadin'ota / Bregaglia vegnidas infurmadas davart la reorganisaziun dal corp da polizia e davart il fatg che quella saja gia realisada.

La reorganisaziun dal corp da polizia cumpiglia la reuniun dals quatter posts da polizia existents en in unic post da polizia, per uschia realisar a lunga vista la finamira d'in unic post a Samedan. La reorganisaziun cumpiglia er las incumbensas polizialas communalas ch'èn vegnidas surpigliadas en enclegientscha cun differentas vischnancas. Actualmain èn las polizistas ed ils polizists repartids sin trais lieus a Silvaplauna, a San Murezzan ed a Samedan.

Questa decisiun, che n'era betg vegnida communitgada e coordinada ordavant, ha chaschunà differentas protestas, ed en in­tgins cas èn schizunt vegnidas desditgas las cunvegnas da prestaziun concernent la surpigliada da las incumbensas polizialas communalas.

In fatg surprendent è ultra da quai ch'il territori da la vischnanca da Bregaglia ha pers il post da la polizia chantunala a Casta­segna. Quel è vegnì remplazzà d'in biro che vegn utilisà mo occasiunalmain u tenor cunvegna, uschia ch'il territori da cunfin n'ha pli naginas polizistas e nagins polizists ch'enconuschan la regiun e sia populaziun. Tras questa decisiun demussa l'admi­nistraziun chantunala – en quest cas la polizia chantunala – ina giada dapli pauca attenziun e sensibilitad per las regiuns peri­fericas, sch'ella stritga plazzas da lavur ed eliminescha substrat social ed economic, cun in niz zunt dubitaivel per la regiun.

En vista a las ponderaziuns qua survart tschentan las sutsegnadras ed ils sutsegnaders las suandantas dumondas a la regenza:

1.     Tgi ha decidì la strategia ed il proceder da la polizia chantunala?

2.     Actualmain han gia duas vischnancas da l'Engiadin'ota desditg la cunvegna da prestaziun cun la polizia chantunala con­cernent la surpigliada da las incumbensas polizialas communalas, ed ulteriuras vischnancas pondereschan eventuals pass en questa direcziun. Tge consequenzas han questas decisiuns per l'organisaziun da la polizia chantunala?

3.     Co intenziunescha la polizia chantunala da garantir la segirezza en questa regiun da cunfin, sch'ella n'è betg pli preschenta en quest territori e n'enconuscha betg ils acturs correspundents?

4.     Co po la polizia chantunala garantir sia preschientscha e la cuvrida da cas d'urgenza en Bregaglia, perquai che la colliaziun stradala è serrada regularmain ed adina pli savens pervia da privels da la natira?

5.     Co intenziunescha la polizia chantunala da garantir che las polizistas ed ils polizists che patruglieschan en Bregaglia èn abels da communitgar en talian cun la populaziun e cun ina part considerabla da las participantas e dals participants dal traffic?

6.     Pervia da la decisiun prendida vegnan er spustadas duas plazzas da lavur da la Bregaglia en Engiadin'ota. Quai cun la consequenza che naginas funcziunarias e nagins funcziunaris da la polizia chantunala vegnan ad abitar en l'avegnir en la vischnanca da Bregaglia e ch'ina regiun periferica daventa danovamain pli povra. Tge mesiras intenziunescha la regenza da prender per cumpensar la perdita da questas duas ulteriuras plazzas da lavur en questa regiun periferica?

Cuira, ils 12 da favrer 2019

Michael (Castasegna), Salis, Lamprecht, Aebli, Atanes, Berweger, Bondolfi, Cavegn, Clalüna, Crameri, Degiacomi, Della Cà, Fasani, Felix, Giacomelli, Hitz-Rusch, Horrer, Kienz, Niggli (Samedan), Noi-Togni, Pfäffli, Preisig, Rettich, Weidmann, Wellig, Locatelli-Iseppi, Lunghi, Spagnolatti

Resposta da la regenza

Cun il rapport davart la strategia d'immobiglias dal chantun Grischun (missiva da la regenza al cussegl grond; carnet nr. 6/2009-2010) ha il cussegl grond prendì enco­nuschientscha da la concentraziun da l'activitad administrativa en nov centers re­giu­nals ferms, ed el ha approvà la strategia da concentraziun dond ses consentiment al project "sinergia" ed a la pussaivladad d'ina etappaziun. En Engiadin'ota duai perquai vegnir construì in center administrativ regiunal, nua ch'er la polizia chantunala vegn alloschada. Tenor la planisaziun da l'uffizi da construcziun auta vegn quest center a star a disposiziun l'onn 2024 a Samedan. En il rapport "Polizia grischuna 2015plus", ch'è vegnì approvà da la regenza, è vegnida refusada l'idea d'introducir ina polizia unitara en il chantun Grischun. Il motiv principal è stà quel che la polizia unitara exi­stiva gia per gronda part en il chantun Grischun, tras quai che la polizia chantunala aveva surpiglià contractualmain las incumbensas da las polizias communalas. Are­guard la structura da posts da la polizia chantunala prevesa il rapport ina regiunali­sa­ziun, per ch'i possia vegnir tegni quint dals cunfins averts e da las pretensiuns en il sectur da la polizia da traffic e da segirezza sco er dal cumbat cunter la criminalitad, e quai cun intervenziuns mobilas flexiblas en il rom d'in manaschi nuninterrut da 24 uras.

Tar la dumonda 1: Realisond la finamira strategica prescritta "Rectificaziun da la pitschna structura da posts" ha il cumandant da polizia fixà la nova structuraziun ter­ritoriala e la cumpetenza locala ensemen cun las persunas responsablas da la regiun Engiadina. Il settember 2018 ha il departament da giustia, segirezza e sanadad ap­provà la creaziun dal post da polizia Engiadin'ota / Bregaglia. Dapi il 1. da december 2018 existan pia en Engiadin'ota / Bregaglia in post da polizia virtual (sin basa da las infrastructuras a Castasegna, Silvaplauna, San Murezzan e Samedan) e mintgamai ina basa da la polizia da traffic ed ina basa da la polizia criminala a Silvaplauna.

Tar la dumonda 2: La vischnanca da Puntraschigna ha desditg il contract da colla­vu­raziun cun la polizia chantunala. La polizia chantunala è anc adina interessada da metter a disposiziun a la vischnanca da Puntraschigna – tras polizistas e polizists sco er tras assistentas ed assistents da segirezza scolads – las prestaziuns ch'ella ha furnì fin qua en il champ d'incumbensas da la polizia da segirezza ed en l'ulteriur champ d'incumbensas da la polizia communala. La desditga da quest contract n'ha naginas consequenzas essenzialas per l'organisaziun da la polizia chantunala.

Tar la dumonda 3: Tras la nova organisaziun vegn la polizia chantunala ad esser pli preschenta er en la regiun da cunfin ed uschia a furnir dapli prestaziuns da segirez­za. La collavuraziun transcunfinala cun ils partenaris da segirezza da l'Italia è ultra da quai vegnida extendida cuntinuadamain ils ultims onns.

Tar la dumonda 4: La superaziun da la catastrofa da la natira a Bondo ha mussà, co che la polizia chantunala furnescha sias prestaziuns er en situaziuns d'urgenza ed en cas da vias serradas. Ella è preparada per tals cas.

Tar la dumonda 5: Saja quai en Bregaglia u en Engiadin'ota: Pervia dals giasts e dals turists internaziunals sco er pervia da la populaziun rumantscha u taliana èn las poli­zistas ed ils polizists er dumandads fermamain en il sectur linguistic. La polizia chan­tunala ha stgaffì avant intgins onns la pussaivladad da vegnir staziunà sco emprim en la regiun d'origin. Mintg'onn cuntanschan duas fin trais absolventas u absolvents da la scola da polizia da la regiun Engiadina il certificat professiunal da polizista u po­lizist. Ellas ed els lavuran e restan lura er en la regiun d'origin.

Tar la dumonda 6: Tras l'installaziun dal post da polizia Engiadin'ota / Bregaglia na vegnan spustadas naginas plazzas da lavur. Il cuntrari: I vegnan stgaffidas plazzas da lavur multifuncziunalas cun ina flexibilitad pli gronda areguard la domiciliaziun ed en general cun cundiziuns da lavur pli attractivas per las collavuraturas ed ils colla­vu­raturs. Quai è decisiv, per che las polizistas ed ils polizists abitian e lavurian da libra voluntad en Engiadin'ota ed en Bregaglia.

18 d'avrigl 2019