Navigation

Inhaltsbereich

Dumonda Pfäffli concernent la garanzia da la protecziun da la populaziun e da las infrastructuras criticas dal chantun Grischun en cas d'ina situaziun extraordinaria en Svizra

Sessiun: 12.02.2019

En il chantun Grischun datti uschenumnadas «infrastructuras criticas» d'impurtanza naziunala e regiunala (p.ex. las transversalas da las Alps sin via e da la viafier, stabiliments per producir e per transmetter energia electrica, indrizs da communicaziun, manaschis industrials pli gronds, stabiliments militars, accumulaziuns considerablas da persunas, centers da regulaziun e da direcziun e.u.v.). En il cas normal èn las forzas chantunalas prontas da tut temp da garantir la segirezza. En cas d'ina situaziun extraordinaria en Svizra, sco moviments da migraziun pli gronds e nunspetgads, activitads terroristicas u in conflict armà en l'Europa, na pon las forzas betg bastar. D'utilisar contingents dals chantuns da concordat fiss illusoric en quest cas, e l'armada svizra ch'è vegnida smesada e restructurada danovamain dapi il 1. da schaner 2018 pudess dar sustegn mo en ina dimensiun fitg restrenschida. Il quità crescha che la segirezza publica na pudess betg vegnir garantida en cas che la situaziun en Svizra sa pegiurass considerablamain.

En quest connex vegn la regenza supplitgada da respunder las suandantas dumondas:

1.     Disponan las autoritads grischunas d'in inventari actual da las «infrastructuras criticas» da tut las categorias ed ha il chantun ina survista davart las analisas da las ristgas ch'ils gestiunaris han fatg per las «infrastructuras criticas» sco er davart las mesiras deducidas da quellas per la segirezza er per la gestiun dals stabiliments en cas d'ina situaziun extraordinaria en Svizra?

2.     Quants dals objects ch'èn classifitgads sco «degns da vegnir protegids» pudessan vegnir protegids er durant in temp pli lung d'almain in'emna efficaziamain cunter donns, cunter sabotascha u cunter destrucziun?

3.     È la regenza pronta da pretender da la confederaziun da furnir las prestaziuns previsas che l'armada sto ademplir tenor la constituziun a favur dal chantun Grischun e da persequitar l'uschenumnà ulteriur svilup da l'armada en moda critica or da questa perspectiva?

Cuira, ils 12 da favrer 2019

Pfäffli, Crameri, Salis, Aebli, Alig, Berweger, Bigliel, Bondolfi, Brunold, Caluori, Cavegn, Caviezel (Cuira), Caviezel (Tavau Clavadel), Claus, Della Cà, Derungs, Dürler, Ellemunter, Engler, Fasani, Felix, Flütsch, Föhn, Gasser, Geisseler, Giacomelli, Hartmann-Conrad, Hefti, Hitz-Rusch, Hohl, Holzinger-Loretz, Jenny, Kasper, Kienz, Kohler, Kunz (Fläsch), Kunz (Cuira), Kuoni, Lamprecht, Marti, Michael (Donat), Michael (Castasegna), Mittner, Müller (Susch), Niggli (Samedan), Noi-Togni, Rüegg, Schneider, Schutz, Stiffler, Tanner, Thomann-Frank, Thür-Suter, von Ballmoos, Waidacher, Weidmann, Wellig, Widmer-Spreiter (Cuira), Wieland, Zanetti (Sent), Collenberg, Holliger, Lunghi, Ulber Daniel

Resposta da la regenza

Tar la dumonda 1: Gea, las autoritads grischunas disponan d'in inventari actual per proteger las infrastructuras criticas (PIC). Quest inventari cuntegna var 100 objects che cumpiglian ils secturs energia, communicaziun, traffic sco er ils partenaris da la protecziun da la populaziun. El è confidenzial.

L'inventari sa basa sin la strategia naziunala per proteger las infrastructuras criticas durant la perioda dals onns 2018 fin 2022, ch'il cussegl federal ha deliberà ils 8 da december 2017, ed è vegnì elavurà tenor las prescripziuns da l'uffizi federal da pro­tecziun da la populaziun (metoda per far l'inventari da las infrastructuras criticas [inventari PIC]). Ultra da la glista dals objects che ston vegnir protegids cumpiglia la protecziun da las infrastructuras criticas er strategias e mesiras che impedeschan sche pussaivel perditas gravantas e che reduceschan ils donns chaschunads en cas d'in eveniment.

L'inventari è vegnì examinà en il rom da la realisaziun da l'analisa da las periclita­ziuns ed en il rom da l'elavuraziun d'ina planisaziun da mesiras sin basa da las ristgas en il sectur da catastrofas e da situaziuns d'urgenza per il chantun Grischun. El è vegnì adattà l'onn passà. I manca anc l'examinaziun tras l'uffizi da militar e da protecziun civila, sch'ils singuls gestiunaris d'infrastructuras criticas han fatg las ana­lisas da las ristgas pretendidas e sch'els han prendì las mesiras che resultan da las analisas per la segirezza e per il manaschi dals stabiliments en cas d'ina situaziun naziunala extraordinaria.

Tar la dumonda 2: Da princip èn ils gestiunaris sezs responsabels per la protecziun da lur infrastructura. La polizia chantunala po garantir la protecziun dals objects chantunals durant in'emna. Sch'ellas stessan a disposiziun, vegnissan clamadas en agid er forzas da segirezza privatas. Il privel d'attatgas virtualas giuditgescha la poli­zia chantunala percunter sco bler pli grond. 

Tar la dumonda 3: La regenza vegn a pretender da la confederaziun da procurar che las incumbensas ch'èn vegnidas surdadas a l'armada tenor la constituziun federala vegnian ademplidas a favur dals chantuns. Ultra da quai vegn la regenza a persequi­tar l'ulteriur svilup da l'armada ord questa perspectiva. En quest connex stoi dentant vegnir rendì attent ch'i na dat – tenor il giudicament da la confederaziun – naginas infrastructuras criticas d'impurtanza naziunala en il Grischun. Correspundentamain stoi vegnir fatg quint ch'eventualas dumondas dal chantun Grischun na vegnan betg permessas cun emprima prioritad.

1. da matg 2019