Navigation

Inhaltsbereich

Incumbensa Bigliel concernent la digitalisaziun da las proceduras per la permissiun da construcziun

Sessiun: 13.02.2019

Tgi che planisescha ina midada da construcziun, è savens malsegir, sch'el dovra ina permissiun da construcziun. Entant ch'i dovra da princip ina permissiun da construcziun per projects pli gronds che han consequenzas sin l'urden d'utilisaziun tenor l'art. 86 LPTGR, ston per part er projects da construcziun pli pitschens vegnir annunziads a la vischnanca cumpetenta e laschads controllar da tala. Uschia dovra gia la nova pictura da la fatschada d'in edifizi ina permissiun, sch'ella vegn fatga en in'autra colur che quella vertenta. Uschia na dovri ina permissiun da construcziun betg mo en cas da projects da construcziun pli gronds, mabain gia en cas d'ina midada d'utilisaziun. Tuttina chaschunan talas midadas, per part pitschnas, blera lavur per la petenta u il petent d'ina permissiun da construcziun. Pertge che: lavurs betg permessas ston vegnir refatgas en il mender cas, e quai sin donn e cust da la petenta u dal petent. Quai chaschuna tut tenor er lavur da vart da l'administraziun e maina a retards en il process da permissiun.

Cun la digitalisaziun da la procedura per la permissiun da construcziun po l'inoltraziun da novs projects vegnir simplifitgada e rendida transparenta per tut las parts participadas. Plinavant vegnan uschia sbassads a lunga vista ils custs da vart da la petenta u dal petent sco er da l'administraziun e promovida ina inoltraziun pli efficazia da novs projects. Quai na duai betg sco ultim simplifitgar l'activitad da construcziun e reducir ils custs da construcziun sco er da l'administraziun.

Il chantun Berna ha percurschì il basegn da las burgaisas e dals burgais per in sistem che sa basa sin l'internet e planisescha da liquidar permissiuns da construcziun a partir da l'onn 2020 mo pli sin via electronica. Quai è il resultat d'ina moziun ch'è vegnida acceptada unanimamain dal cussegl grond bernais. Tenor la communicaziun da la regenza dals 9 da mars 2018 sa laschan uschia spargnar 3,5 milliuns francs mintga onn. Cun l'introducziun da la procedura electronica per la permissiun da construcziun duain ils process vegnir liquidads en l'avegnir en moda pli svelta, pli economica e pli ecologica. En il chantun Turitg pon ins observar in svilup sumegliant. A partir da l'onn 2019 duai il project chantunal «eBaugesucheZH» simplifitgar la procedura per la permissiun da construcziun e render quella pli cumadaivla per la burgaisa u il burgais. La basa è ina plattafurma electronica centrala che renda accessibels ils programs administrativs da construcziun decentrals da las vischnancas e che baratta las datas da las dumondas da construcziun sur ina interfatscha standardisada (eCH-0211) ch'è vegnida sviluppada aposta or da quest project. Las vischnancas ed il chantun restan uschia autonoms e pon lavurar vinavant cun lur programs administrativs da construcziun.

Questa intervenziun sa metta en retscha cun las stentas da l'incumbensa Casanova-Maron (Domat) concernent in "Grischun digital" che vesa la digitalisaziun sco instrument per concepir process administrativs en moda pli economica sco er pli cumadaivla per las utilisadras ed ils utilisaders.

Las sutsegnadras ed ils sutsegnaders incumbenseschan la regenza d'examinar, co che la procedura per la permissiun da construcziun possia vegnir digitalisada uschè ferm sco pussaivel per reducir la lavur ed ils custs tant per las petentas ed ils petents sco er per l'administraziun – en spezial cun observar las soluziuns che vegnan empruvadas actualmain en ils chantuns Berna e Turitg.

Cuira, ils 13 da favrer 2019

Bigliel, Hohl, Rettich, Alig, Atanes, Baselgia-Brunner, Berweger, Brandenburger, Brunold, Caluori, Cantieni, Caviezel (Cuira), Caviezel (Tavau Clavadel), Claus, Della Cà, Deplazes (Cuira), Derungs, Dürler, Engler, Felix, Flütsch, Gasser, Gort, Hartmann-Conrad, Hitz-Rusch, Holzinger-Loretz, Horrer, Kappeler, Kienz, Koch, Kunfermann, Kunz (Fläsch), Kunz (Cuira), Kuoni, Locher Benguerel, Loepfe, Mittner, Müller (Favugn), Niggli (Samedan), Perl, Pfäffli, Preisig, Rüegg, Rutishauser, Stiffler, Thomann-Frank, Thür-Suter, Tomaschett (Breil), von Ballmoos, Weber, Weidmann, Wieland, Wilhelm, Holliger, Lunghi

Resposta da la regenza

Tenor l'incumbensa duai vegnir examinà co che la procedura per la permissiun da construc­ziun possia vegnir digitalisada uschè ferm sco pussaivel. Uschia duai vegnir reducida la lavur tant per las persunas petentas sco er per l'administraziun. L'incum­bensa sa referescha a soluziuns che vegnan examinadas actualmain en ils chantuns Berna e Turitg.

En il Grischun vegnan inoltradas a las autoritads da construcziun communalas min­tga onn tranter 12 000 e 17 000 dumondas per construcziuns entaifer las zonas da construcziun (EEZ). In pèr da questas dumondas EEZ dovran permissiuns supple­mentaras chantunalas che vegnan concedidas directamain dals posts cumpetents. Tenor la media da blers onns vegnan ultra da quai inoltradas a las autoritads da construcziun communalas var 1200 du­mondas da construcziun per construcziuns ordaifer las zonas da construcziun (EOZ). Que­stas dumondas da construcziun dovran – ultra da la permissiun da construcziun communala – ina permissiun EOZ dal chantun sco er per regla anc permissiuns supplementaras d'auters uffizis chan­tunals che vegnan communitgadas en moda coordinada cun las permissiuns EOZ.

Gia en las uras da dumondas da la sessiun da december 2017 e da la sessiun da favrer 2019 è la regenza s'exprimida davart l'introducziun da la procedura electronica per la permis­siun da construcziun (ePPC) ed ha punctuà en quest connex che la ePPC furmia ina part integrala da la strategia dad e-government da la regenza e vegnia beneventada correspun­dentamain. Ina pussaivladad en questa direcziun po er vegnir deducida da l'art. 92 al. 3bis da la lescha davart la planisaziun dal territori per il chantun Grischun ch'è gist vegnì revedì per part.

Però resulta dals connexs e da las cifras preschentadas qua survart ch'il success dal project ePPC dastgass depender decisivamain da l'acceptanza en las vischnancas. Quai premetta d'ina vart ina tscherta prontezza da las vischnancas da far cumpro­miss, per exempel tar il formular per ina dumonda da construcziun. Da l'autra vart dovri interfatschas che funcziunan bain e che pussibiliteschan da barattar las datas senza problems tranter ils differents sistems dal chantun e da las vischnancas.

Ina gruppa da lavur interna dal chantun ha examinà differentas soluziuns en auters chan­tuns, tranter auter er las soluziuns dals chantuns Turitg e Berna. Turitg lavura cun ina platta­furma da datas centrala che furnescha las communicaziuns e las infur­maziuns als sistems attatgads sur ina interfatscha normada (eCH-0211). Cun la so­luziun CAMAC ha Berna ina plattafurma ePPC cumpletta che mussa il process da la dumonda da construcziun davent da l'inoltraziun sur la procedura da consultaziun fin a la decisiun. Er Berna vegn ad esser sfurzà da metter a disposiziun a las vischnan­cas en il futur ina interfatscha normada ad autras applicaziuns da l'administraziun da construcziun e betg mo a CAMAC. Tuttas duas soluziuns èn uschia avertas per ils programs per l'administraziun da las construcziuns che vegnan duvrads da las visch­nancas. Cun quai correspundan questas soluziuns da princip al giavisch che duai vegnir persequità er en il Grischun.

Las applicaziuns dals chantuns Turitg e Berna vegnan messas online circa a partir da la me­sadad da l'onn 2019. Experientschas praticas en quest connex na datti anc naginas. In ele­ment central per il success vegn ad esser la dumonda, quant bain ch'i po vegnir communitgà sur las interfatschas normadas. Per motivs da l'effizienza e per spargnar custs vul la regenza adattar sche pussaivel soluziuns existentas. Pervia da quai vul ella anc spetgar in zic cun sviluppar e cun publitgar in sistem per il Gri­schun, fin che valurs d'experientscha da Turitg e da Berna èn avant maun. Percunter pon las lavurs preparatoricas necessarias vegnir prendi­das per mauns gia ussa. Sco menziunà en l'ura da dumondas da la sessiun da favrer 2019 existan a Turitg ed a Berna formulars per ina dumonda da construcziun ch'èn ils medems en tut il chantun. In formular unitar simplifitgass er en il Grischun la digitalisaziun da la procedu­ra per la permissiun da construcziun.

Resguardond il svilup e las experientschas dals chantuns Turitg e Berna vegn la gruppa da lavur interna dal chantun alura ad elavurar ina incumbensa da project concreta per mauns da la regenza.

ePPC vegn ad esser in project da plirs onns cun ina summa d'investiziun da passa 1 milliun francs. In tal project d'informatica vegn integrà en il preventiv sur in credit d'investiziun, uschia ch'il cussegl grond vegn la finala a decider cun il conclus davart il preventiv, sche ePPC duai vegnir introducì en il Grischun u betg.

Sa basond sin questas consideraziuns propona la regenza al cussegl grond d'acceptar questa incumbensa.

18 d'avrigl 2019