Navigation

Inhaltsbereich

Dumonda Favre Accola concernent dapli protecziun per uffants e giuvenils cunter abus sexuals

Sessiun: 14.06.2019

Tenor il rapport da polizia 2018 èn vegnids elavurads en il Grischun 19 cuntravenziuns cunter l'art. 187 CP (acts sexuals cun uffants) e 78 delicts da pornografia (cuntravenziuns en il senn da l'art. 197 CP). Tar quest ultim cas sa tracti principalmain da pornografia cun uffants. Ils cas registrads èn s'augmentads en la cumparegliaziun a media vista (da 2015 – 2018 quasi ina duplicaziun). Er la societad svizra da pediatria ha annunzià in cler augment (+10 %) da cas registrads da maltractaments d'uffants. Las perscrutaziuns da las cifras inuffizialas dals onns passads supponan che per exempel mintga 7. fin 8. persuna haja subì violenza durant sia uffanza e giuventetgna en Germania. L'organisaziun mundiala da la sanadad (WHO) presuma che circa 18 milliuns persunas minorennas èn pertutgadas da violenza sexuala en Europa.

Sch'ins considerescha quests fatgs, dastgass la cifra inuffiziala esser bainquant pli auta che las cuntravenziuns registradas er en il Grischun. Ils pedosexuals sentenziads correspundentamain han – cun 50 – 80 % – ina recidiva fitg auta e cumpiglian 40 – 50 % dals delinquents sexuals.

Il barat cun la polizia criminala dal Grischun, cun il post da cussegliaziun per persunas violentas, cun la procura publica dal Grischun, cun l'agid a victimas, cun FORIO e cun ils mainascolas dal Grischun ha mussà ch'i vegn bain renconuschì in basegn d'agir preventiv, ma che nagin sa senta cumpetent per quel.

Fin oz na posseda il chantun Grischun p.ex. nagin post da cussegliaziun per delinquents sexuals e per persunas cun disturbis pedofils, quai schebain che – tenor spezialistas e spezialists –  i fiss efficazi ed avess effects preventivs da metter a disposiziun en tut il chantun posts spezialisads. Savend ch'ils pedosexuals èn delinquents per disa, fissi enorm impurtant da curar quests disturbis, gist per motivs da prevenziun sco er per proteger ils uffants. Actualmain dumondan 70 persunas pertutgadas tractaments dal post da cussegliaziun FORIO, dapi l'onn 2006 èn gia vegnids terminads 140 tractaments.

En sia resposta dals 11-05-2016 al postulat Natalie Rickli "Pedofilia, project da prevenziun 'Betg daventar in delinquent' en Svizra", ha la confederaziun renvià al fatg ch'ella sustegnia finanzialmain purschidas correspundentas.

Sa basond sin questas infurmaziuns dumondan las sutsegnadras ed ils sutsegnaders la regenza:

1.     È la regenza pronta d'elavurar prescripziuns e da relaschar talas per las scolas dal Grischun? Las prescripziuns duain prevair in proceder standardisà en connex cun recrutar persunal (p.ex. pretender in extract dal register penal ed in extract specific per persunas privatas) sco er en connex cun violaziuns da cunfin en il context da scola.

2.     È la regenza grischuna pronta da declerar per lianta e da finanziar ina campagna da prevenziun correspundenta en tut las scolas popularas dal Grischun, quai cun l'intent da rinforzar la persunalitad da l'uffant e da promover il scleriment sexual?

3.     È la regenza pronta da surdar l'incumbensa d'elavurar e d'introducir in standard grischun simplifitgà per uniuns (da sport e da musica), che sa basa sin il material e sin ils concepts da Swiss olympic ch'èn gia avant maun?

4.     È la regenza pronta d'examinar resp. da surdar ina incarica da prestaziun correspundenta a favur d'in post da cussegliaziun spezialisà per delinquents sexuals, per pedofils e per persunas pertutgadas en il Grischun?

5.     È la regenza pronta d'examinar da lantschar campagnas da sensibilisaziun sco "Guardar empè da guardar davent" ubain "Betg daventar in delinquent", eventualmain er en coordinaziun cun auters posts da cussegliaziun e cun auters chantuns (p.ex. Prevenziun svizra da la criminalitad)?

6.     Sustegna la regenza grischuna – en il barat cun ils cussegliers dals chantuns e cun ils cussegliers naziunals dal Grischun – in augment dals chastis per delicts cunter l'integritad sexuala (introducziun da chastis minimals) en il rom da l'armonisaziun currenta dal rom penal en il cudesch penal?

Puntraschigna, ils 14 da zercladur 2019

Favre Accola, Kasper, Gugelmann, Atanes, Berther, Berweger, Bettinaglio, Bigliel, Brandenburger, Buchli-Mannhart, Cantieni, Cavegn, Caviezel (Tavau Clavadel), Danuser, Della Cà, Deplazes (Rabius), Dürler, Ellemunter, Flütsch, Föhn, Gasser, Gort, Hardegger, Hartmann-Conrad, Hofmann, Hohl, Hug, Jochum, Kappeler, Kienz, Koch, Lamprecht, Locher Benguerel, Loepfe, Maissen, Märchy-Caduff, Müller (Susch), Natter, Niggli-Mathis (Grüsch), Noi-Togni, Papa, Perl, Preisig, Rettich, Ruckstuhl, Rüegg, Rutishauser, Salis, Sax, Schwärzel, Stiffler, Tanner, Thomann-Frank, Thür-Suter, Ulber, Valär, von Ballmoos, Weber, Wellig, Widmer (Favugn), Widmer-Spreiter (Cuira), Zanetti (Sent), Zanetti (Landquart), Renkel

Resposta da la regenza

Ord vista da la regenza èsi da tegnair vastamain quint da la protecziun e dal bain dals uffants e dals giuvenils en lur process da svilup natiral. Spezialmain sustegna in bun ambient famigliar e privat sco er da scola il progress ed il svilup persunals da noss uffants e giuvenils, ed è d'ina valur enorma.

Tar la dumonda 1: Disposiziuns legalas chantunalas surdattan la cumpetenza d'engaschar persunas d'instrucziun a las instituziuns responsablas per la scola, e quai en il rom da lur reglamentaziuns. Sche talas mancan, pon vegnir applitgadas subsidiarmain las disposiziuns dal dretg da persunal chantunal. En il rom da sias activitads recumonda la surveglianza chantunala da scola en tschertas situaziuns a las instituziuns responsablas per la scola da pretender en il process d'elecziun in extract dal register penal ed in extract privat spezial.

Tar la dumonda 2: Cun l'uniun adebar, post grischun da cussegliaziun per planisàziun da famiglia, sexualitad, gravidanza e partenadi dal Grischun, ha il chantun ina incarica da prestaziun. La cunvegna cuntegna la purschida "pedagogia sexuala en las scolas dal chantun Grischun". La finamira da la purschida è quella da sclerir sexualmain, resguardond lur vegliadetgna, tut ils uffants en il chantun Grischun. L'accent vegn mess sin la prevenziun duraivla cunter l'abus sexual. Davart il diever da la purschida decidan las scolas e las vischnancas. La dumonda crescha. Il chantun ha perquai augmentà ses sustegn finanzial per la purschida en l'incarica da prestaziun 2019-2022.

Tar la dumonda 3: Il material ed ils concepts da Swiss olympic, ch'existan gia, èn in bun instrument per proteger meglier ils uffants ed ils giuvenils cunter abus sexuals. Ultra da quai sa basan els sin experientschas ch'èn vegnidas fatgas en l'entira Svizra, ed els vegnan sviluppads vinavant permanentamain cun agid d'organisaziuns partenarias. Il chantun Grischun tematisescha mesiras preventivas tras l'ambassadur chantunal da "cool and clean" e tras curs da perfecziunament che vegnan organisads dal chantun per manadras e manaders. A la regenza pari che la multiplicaziun da programs naziunals sco er che la collavuraziun cun organisaziuns partenarias saja pli effizienta e pli effectiva che l'elavuraziun d'agens standards chantunals.

Tar la dumonda 4: Ils pedofils u lur confamigliars pon sa drizzar als servetschs psichiatrics dal Grischun ubain a psichiatras e psichiaters privats. Plinavant porscha l'institut autonom forio ina cussegliaziun sco er terapias per umens cun tendenzas pedofilas. La constataziun tempriva da maltractaments d'uffants e violenza sexuala èn ils champs d'acziun principals da la fundaziun svizra per la protecziun da l'uffant. L'uniun Lilli dat ina cussegliaziun online anonima ed infurmaziuns cun la finamira da prevegnir a la violenza e da promover la sanadad sexuala. Ils posts chantunals da cussegliaziun per l'agid a victimas cusseglian e gidan las victimas d'abus sexual. Sin fundament da las purschidas ch'existan gia na vesa la regenza nagin motiv direct per examinar respectivamain per surdar ina incarica da prestaziun correspundenta per realisar in post da cussegliaziun spezialisà en il chantun Grischun.

Tar la dumonda 5: Pertutgant la tematica da la protecziun da l'uffant sa restrenscha la polizia a sia incumbensa centrala sco l'inquisiziun en collavuraziun cun la procura publica e cun l'agid a victimas. Ina incumbensa essenziala en connex cun la prevenziun ha er la scola. En il nov Plan d'instrucziun 21 GR vegn dada l'attenziun duida a quest aspect, e quai a partir dal stgalim da la scolina.

Tar la dumonda 6: La regenza sustegna il giavisch principal da la revisiun planisada dal cudesch penal svizzer. Delinquentas e delinquents che commettan abus cunter uffants e giuvenils, ageschan zunt condemnablamain. Quai sto vegnir sancziunà correspundentamain. Sco instrument adattà resguarda la regenza però l'augment dal chasti maximal empè da l'introducziun da chastis minimals.

29 d'avust 2019