Navigation

Inhaltsbereich

Incumbensa Maissen concernent la cumpatibilitad da la professiun cun la famiglia / vita privata en l'administraziun chantunala

Sessiun: 29.08.2019

Er per l'administraziun chantunala è la mancanza da persunas spezialisadas ina sfida pli e pli gronda. Sco patruna stat ella numnadamain en concurrenza cun l'economia privata. Uschia crescha l'impurtanza da cundiziuns d'engaschament e da lavur progressivas per la recrutaziun da collavuraturas e collavuraturs. En vista a la midada da la structura da vegliadetgna, en vista a la diminuziun dal dumber da naschientschas sco er en vista al fatg che dunnas ed umens da la generaziun giuvna, che han bunas scolaziuns, vulan u ston cumbinar adina pli savens la professiun cun la famiglia, vegn la concurrenza per forzas da lavur numnadamain decidida pli e pli savens sur bunas cundiziuns, cunzunt areguard la cumpatibilitad da la professiun cun la fami­glia / vita privata. Ina buna cumpatibilitad da la professiun cun la famiglia / vita privata n'è dentant betg mo in factur central en la concurrenza per forzas spezialisadas, mabain er in factur da success per la qualitad, per l'effizienza e per l'efficacitad da la prestaziun d'administraziun sco tala.

Per registrar la situaziun actuala areguard la cumpatibilitad da la professiun cun la famiglia / vita privata en l'administraziun chantunala e per eruir soluziuns da meglieraziun fatgas sin mesira, existan differents instruments etablids. Uschia ha la Pro familia Svizra sviluppà in family score che examinescha quant favuraivlas che las structuras dals patruns èn per famiglias e che cumpareglia quai ch'è cun quai che duess esser. Qua tras survegnan las organisaziuns infurmaziuns utilas per augmentar lur attractivitad sco patrunas. Las mesiras pussaivlas en chaussa cumpiglian temas sco uras da lavur flexiblas, lavur a temp par­zial, organisaziun da lavur adattada, clima da lavur, svilup dal persunal, sustegn tar la tgira d'uffants u lieu da lavur fle­xibel.

In instrument sumegliant porscha il center UND sut il predicat «Familie UND Beruf». En il Grischun accumpogna il center UND – en collavuraziun cun il post da stab chantunal per l'egualitad da las schanzas – il program d'acziun per interpresas pitschnas e mesaunas (IPM) grischunas «Structuras favuraivlas per famiglias sco factur da success». A quest program, ch'exi­sta dapi l'onn 2010, èn sa participadas gia duas dunsainas interpresas. Er l'administraziun chantunala duess sa fatschentar cun quest tema impurtant.

Las sutsegnadras ed ils sutsegnaders incumbenseschan perquai la regenza d'examinar – cun agid d'in instrument d'analisa eta­blì – las cundiziuns d'engaschament e da lavur actualas areguard la cumpatibilitad da la professiun cun la famiglia / vita pri­va­ta en l'administraziun chantunala sco er da realisar las recumandaziuns resultantas per augmentar l'attractivitad e per obtegnair in sigil da qualitad. En il process ston vegnir integrads er las collavuraturas ed ils collavuraturs, per che las mesiras vegnian concepidas en moda efficazia e confurm als basegns.

Cuira, ils 29 d'avust 2019

Maissen, Hardegger, Schwärzel, Atanes, Baselgia-Brunner, Berther, Brunold, Cahenzli-Philipp, Caluori, Cantieni, Casutt-Derungs, Cavegn, Caviezel (Cuira), Degiacomi, Deplazes (Cuira), Deplazes (Rabius), Derungs, Epp, Fasani, Florin-Caluori, Föhn, Geisseler, Hitz-Rusch, Hofmann, Holzinger-Loretz, Horrer, Kohler, Kunfermann, Locher Benguerel, Loepfe, Märchy-Caduff, Müller (Favugn), Noi-Togni, Paterlini, Perl, Preisig, Rettich, Ruckstuhl, Rutishauser, Sax, Schmid, Schneider, Stiffler, Thomann-Frank, Thöny, Tomaschett-Berther (Trun), Ulber, Wilhelm, Zanetti (Landquart), Engler (Surava)

Resposta da la regenza

La regenza è conscienta dal fatg che l'administraziun chantunala sto restar ina patru­na attractiva en la concurrenza cun l'economia privata e cun autras administraziuns, sch'ella vul tegnair u recrutar er en l'avegnir las persunas dal fatg ch'ella dovra. En quest senn intenziunescha la regenza d'integrar in punct central da svilup "patrun attractiv" en il program da la regenza 2021-2024. Er la regenza è da l'avis da las sut­segnadras e dals sutsegnaders che l'administraziun chantunala stoppia tegnair quint dals basegns da la generaziun giuvna. Latiers tutga er la realisaziun da mesiras per meglierar la cumpatibilitad da la professiun cun la famiglia / vita privata. La direcziun generala, en la quala l'administraziun chantunala sto sa sviluppar sco patruna, da­stgass correspundentamain esser incontestada. Tar la realisaziun da mesiras corre­spundentas stoi però esser garantì ord vista da la regenza che quellas vegnian con­cepidas uschia, ch'ellas tegnan quint da las pretensiuns manaschialas ed organisa­to­ricas. En quest connex vali adina da resguardar che l'administraziun ha en emprima lingia d'ademplir ina incumbensa e da furnir ils servetschs ils megliers pussaivels en­vers las burgaisas ed ils burgais.

Las sutsegnadras ed ils sutsegnaders pretendan che las cundiziuns d'engaschament e da lavur en l'administraziun chantunala vegnian examinadas areguard la cumpatibi­litad da la professiun cun la famiglia / vita privata cun agid d'in instrument d'analisa etablì e che las recumandaziuns resultantas vegnian realisadas cun mesiras effica­zias e confurmas als basegns – integrond las collavuraturas ed ils collavuraturs – per augmentar l'attractivitad e per obtegnair in sigil da qualitad.

La regenza tegna quint en moda adequata da la cumpatibilitad da la professiun cun la famiglia / vita privata, resguardond las relaziuns ed ils basegns manaschials ed organisatorics. Gia dapi onns ha ella adina puspè prendì mesiras concretas areguard temas sco uras da lavur flexiblas u lavur a temp parzial. Uschia ha l'introducziun da novs models da temp da lavur pussibilità che var 60 pertschient da las collavuraturas e dals collavuraturs han oz in temp da lavur per onn e na ston pia resguardar nagi­nas uras da bloc. E l'avust 2019 ha la regenza communitgà – en connex cun la re­sposta a l'incumbensa Schwärzel concernent plazzas parzialas sin tut ils stgalims dal cader – che las plazzas a temp cumplain da l'administraziun chantunala vegnian publitga­das da qua envi, sche pussaivel, sco pensums dad 80 fin 100 pertschient. En quest connex ha la regenza er menziunà ch'ella vegnia a pussibilitar en cas singuls ed adina pli savens la "lavur mobila" e ch'ella vegnia ad examinar mesiras per flexibilisar la lavur, sco en spezial las pussaivladads da lavurar a chasa, en il rom da la proxima revisiun da la lescha dal persunal. En il senn da l'incumbensa qua avant maun èsi previs d'examinar en il rom da la revisiun menziunada differentas ulteriuras mesiras che permettan da meglierar en spezial la cumpatibilitad da la professiun cun la fami­glia / vita privata e d'augmentar tut en tut l'attractivitad dal chantun sco patrun. En tge furma che las basas necessarias vegnan eruidas e quant enavant ch'ins duai trair a niz il sustegn d'in post extern per quest intent, na vuless la regenza anc betg fixar per il mument. Quai succeda en spezial er, perquai ch'i vegn – per differents temas – pre­visiblamain ad esser necessari da procurar valurs da referenza tar auters chan­tuns resp. patruns sco er enconuschientschas spezialisadas externas.

Sa basond sin questas consideraziuns propona la regenza al cussegl grond da midar questa incumbensa sco suonda: En il rom da la proxima revisiun da la lescha dal persunal vegn la regenza incumbensada d'examinar las cundiziuns d'engaschament e da lavur en l'administraziun chantunala er areguard la cumpatibilitad da la profes­siun cun la famiglia / vita privata e da sviluppar mesiras correspundentas.

18 d'october 2019