Navigation

Inhaltsbereich

Dumonda Bettinaglio concernent la stimaziun uffiziala d'implants da transport

Sessiun: 30.08.2019

Las stimaziuns uffizialas d'implants da transport vegnan duvradas principalmain per intents da l'assicuranza d'edifizis e per fixar las taglias sin immobiglias. Las valurs fiscalas d'implants da transport èn stimadas sin in nivel fitg aut en la pratica. Las taglias sin immobiglias ch'ils gestiunaris d'implants da transport ston pajar èn perquai er fitg autas.

La lescha davart las valitaziuns uffizialas d'immobiglias (LVI) regla la realisaziun da las valitaziuns uffizialas d'immobiglias. L'ordinaziun respectiva davart las valitaziuns uffizialas d'immobiglias (OVI) cuntegna las disposiziuns detagliadas davart las valitaziuns uffizialas d'immobiglias. Per valitar implants da transport èn relevants cunzunt l'art. 15 e l'art. 31 OVI. L'art. 15 OVI regla la determinaziun dal pertschient da chapitalisaziun e l'art. 31 OVI tranter auter la metoda per calcular la valur da rendita.

Il pertschient da chapitalisaziun en las stimaziuns uffizialas d'implants da transport vegn fixà savens sut 6 %. Questa procentuala è memia bassa en vista a las ristgas. Las pli grondas ristgas da la branscha èn savens l'aura, l'economia e la valuta monetara. La procentuala è fitg bassa er en cumparegliaziun cun autras branschas. En la gastronomia ed en l'hotellaria vegnan per exempel applitgads pertschients da chapitalisaziun da passa 6 %. Tenor l'experientscha pratica è commensurà per implants da transport in pertschient da chapitalisaziun da 9 % fin 11 %.

La calculaziun da la valur da rendita resulta da l'art. 31 al. 3 OVI. La valur da rendita vegn calculada da la chapitalisaziun dal gudogn net. Tenor l'art. 31 al. 3 OVI vegn il gudogn net ultra da quai rectifitgà ordavant. En quest connex èsi central da resguardar las amortisaziuns calculatoricas. Sistematicamain n'èsi betg correct, sch'i na vegnan betg pli resguardadas – en la rectificaziun dal gudogn net – amortisaziuns calculatoricas per implants amortisads cumplettamain. Sch'ins prenda in gudogn net persistent e permanent sco basa da valitaziun, tutgan er amortisaziuns calculatoricas vitiers e na pon betg simplamain vegnir laschadas davent a partir d'in tschert mument.

Il gudogn net calculatoric è pia memia aut e per consequenza èn er la valur da rendita respectivamain las valurs stimadas uffizialas d'implants da transport memia autas.

En vista a quests fatgs tschentan las sutsegnadras ed ils sutsegnaders las suandantas dumondas a la regenza:

1.     Co vegn deducì detagliadamain il pertschient da chapitalisaziun d'implants da transport? Tge vegn supponì cun determinar il pertschient da chapitalisaziun d'implants da transport?

2.     Ha la regenza l'intenziun d'eliminar il sbagl sistematic en la calculaziun dal gudogn net ch'è decisiv per la valitaziun, e d'adattar correspundentamain las stimaziuns uffizialas?

Cuira, ils 30 d'avust 2019

Bettinaglio, Engler (Tavau Vitg), Tomaschett (Breil), Aebli, Buchli-Mannhart, Casty, Danuser, Ellemunter, Felix, Gugelmann, Hardegger, Hefti, Hohl, Kasper, Loi, Michael (Donat), Mittner, Niggli-Mathis (Grüsch), Papa, Widmer-Spreiter (Cuira), Zanetti (Sent), Costa, Niederreiter

Resposta da la regenza

Las valitaziuns uffizialas d'implants da transport furman tranter auter la basa per fixar las taglias sin immobiglias. Per l'uffizi per la valitaziun d'immobiglias stattan valurs chapaivlas en il center, però betg la grevezza fiscala che resulta da quellas. La valitaziun tras l'uffizi per la valitaziun d'immobiglias vegn fatga en duas parts. D'ina vart vegnan eruidas las basas da valitaziun (datas) tar il gestiunari respectiv dals implants da transport. Da l'autra vart valitescha l'uffizi ils implants sin basa da las premissas legalas, ils implants da transport cunzunt sin basa da l'art. 31 da l'ordinaziun davart las valitaziuns uffizialas d'immobiglias (OVI; DG 850.110).

Tar la dumonda 1: Il pertschient da chapitalisaziun po vegnir preschentà sco tariffa da tschains net u sco tariffa da tschains brut tar valitaziuns d'immobiglias. La tariffa da tschains net correspunda a la tariffa da tschains da chapital, ella represchenta ils custs e las ristgas da chapital. Per quest intent vegnan resguardadas las qualitads generalas ch'èn tipicas per las immobiglias e specificas per l'utilisaziun. Las ristgas spezialas che stattan en connex cun ils implants da transport, vegnan per exempel indemnisadas cun in supplement da circa 1,5 pertschient. En cifras importa la tariffa da tschains da chapital actualmain 3,25 pertschient per immobiglias d'abitar, 3,75 pertschient per immobiglias normalas da fatschenta e da mastergn e circa 5,25 pertschient per implants da transport. En las valitaziuns d'immobiglias vegnan plinavant cumprovads ils custs da gestiun. Els cumpiglian ils custs da manaschi, ils custs da mantegniment, ils custs d'administraziun, ils custs per perditas da tschains da locaziun sco er las amortisaziuns. Els pon ubain esser cuntegnids en il pertschient da chapitalisaziun ubain vegnir tratgs giu da la vart dals retgavs. Sch'ins resguarda ils custs da gestiun en il pertschient da chapitalisaziun, resulta la tariffa da tschains brut tras la summa da la tariffa da tschains net e tras la part dals custs da gestiun.

Sch'i vegnan ussa cumparegliads ils pertschients da chapitalisaziun da differentas valitaziuns in cun l'auter, stoi vegnir resguardà che las tariffas vegnian consideradas sin il medem plaun. En cas da valitaziuns da la gastronomia e da la hotellaria vegn applitgada la tariffa da tschains brut per las valitaziuns uffizialas (tut ils custs da gestiun èn integrads en il pertschient da chapitalisaziun). En cas d'implants da transport ha percunter lieu la chapitalisaziun netta, perquai ch'ils custs da gestiun effectivs vegnan gia tratgs giu en il retgav. Metodicamain na pon quests custs betg vegnir cumprovads anc ina giada en il pertschient da chapitalisaziun. Tras quai èsi garantì ch'ils implants da transport (netto circa 5,25 pertschient) vegnan chapitalisads cleramain pli aut che las immobiglias da gastronomia e da hotellaria (netto circa 3,75 pertschient). Uschia resultan valurs da rendita pli bassas. Las premissas dal manaschi dals implants da transport èn pia represchentadas commensuradamain en ina valitaziun.

Tar la dumonda 2: En las valitaziuns uffizialas vegnan amortisads ils implants da transport en moda lineara. La durada da vita totala ch'è vegnida applitgada, è dependenta dal tip d'implant. Cun ina durada da vita stimada da per exempel 25 onns, vegni amortisà 4 pertschient per onn. Igl è evident ch'ina part dals implants restan en funcziun pli ditg che la durada da vita stimada. Sch'in implant ha cuntanschì u surpassà la durada da vita totala, che furma la basa, na dastgi betg pli vegnir amortisà calculatoricamain. Cas cuntrari vegniss l'implant amortisà a sut nulla. Quai na fiss betg commensurà. La pratica vertenta è er necessaria, perquai che la durada da vita d'implants na po betg vegnir determinada posteriuramain. Per questas ponderaziuns na pon ins pia betg discurrer d'in sbagl sistematic, sche las amortisaziuns calculatoricas na vegnan betg pli resguardadas. Tar gestiunaris che han ina part decisiva d'implants gia amortisads, pon dentant vegnir cumprovads gudogns nets effectivs, che chaschunan valurs da rendita (memia) autas pervia da la chapitalisaziun permanenta.

La regenza vegn ad incumbensar l'uffizi per la valitaziun d'immobiglias da resguardar adequatamain questa tematica en il futur cun valitar implants pertutgads (p.ex. laschar davent amortisaziuns mo temporarmain fin ch'i vegnan fatgas novas investiziuns).

18 d'october 2019