Navigation

Inhaltsbereich

Dumonda Bondolfi concernent la scolaziun e las persunas occupadas en il sectur da tgira

Sessiun: 22.10.2019

Las discussiuns avant la debatta parlamentara davart l'incumbensa Holzinger-Loretz concernent la scolaziun SSS-tgira han mussà che la basa d'infurmaziun è manglusa resp. n'è betg avant maun. Per pudair prender decisiuns sin basa da datas segira­das e controllablas supplitgain nus la regenza da respunder las suandantas dumondas. Las respostas pon vegnir dadas en furma tabellarica.

1.     Quantas persunas èn resp. eran en scolaziun ils onns 2017, 2018 e 2019 en il chantun Grischun sco spezialistas e spezialists da sanadad u sco tgirunzas e tgirunzs diplomads SSS ed SAS, e quai en ils secturs:

-     tgira da persunas attempadas
-     acut
-     psichiatria
-     e spitex?

Quantas da questas persunas n'eran resp. n'èn betg en scolaziun en il center da furmaziun per la sanadad ed ils fatgs socials (CSS), ed en tge manaschis en il chantun absolvan questas persunas lur scolaziun pratica en ils secturs numnads?

2.     Quant ditg restan las spezialistas ed ils spezialists da sanadad sco er las tgirunzas ed ils tgirunzs diplomads SSS ed SAS en la medema professiun en il Grischun?

3.     Quantas spezialistas e quants spezialists da sanadad sco er quantas tgirunzas e quants tgirunzs diplomads SSS ed SAS vegnan a vegnir pensiunads ils proxims 10 onns en il Grischun?

4.     Quantas plazzas da spezialistas e spezialists da sanadad sco er da tgirunzas e tgirunzs diplomads SSS ed SAS n'èn betg occupadas en il chantun Grischun?

5.     Quant gronda è la rata da fluctuaziun annuala en media ils ultims 5 onns en ils secturs:

-     tgira da persunas attempadas
-     acut
-     psichiatria
-     e spitex?

6.     Quant grond è il basegn da spezialistas e spezialists da sanadad sco er da tgirunzas e tgirunzs diplomads SSS ed SAS per ils onns 2020 fin 2025 en ils secturs:

-     tgira da persunas attempadas
-     acut
-     psichiatria
-     e spitex?

Cuira, ils 22 d'october 2019

Bondolfi, Caluori, Atanes, Baselgia-Brunner, Cahenzli-Philipp, Cantieni, Casutt-Derungs, Cavegn, Caviezel (Cuira), Censi, Crameri, Degiacomi, Della Cà, Deplazes (Rabius), Derungs, Dürler, Epp, Florin-Caluori, Föhn, Gartmann-Albin, Gasser (Cuira), Hofmann, Horrer, Kohler, Kunfermann, Loepfe, Maissen, Märchy-Caduff, Michael (Castasegna), Müller (Favugn), Niggli-Mathis (Grüsch), Noi-Togni, Papa, Paterlini, Perl, Preisig, Rettich, Ruckstuhl, Rutishauser, Sax, Schmid, Schneider, Schwärzel, Tomaschett (Breil), Tomaschett-Berther (Trun), Ulber, von Ballmoos, Wellig, Widmer (Favugn), Wilhelm, Zanetti (Landquart), Bürgi-Büchel, Pajic, Spadarotto

Resposta da la regenza

Perquai che las revisiuns realisadas en ils manaschis sa refereschan al passà, ha l'uffizi da sanadad a disposiziun mo las cifras eruidas per ils onns precedents. Cun excepziun da las cifras da scolaziun revedidas per ils onns 2017 e 2018 han perquai tut las indicaziuns stuì vegnir procuradas a curta vista en ils manaschis. Pervia da las prescripziuns da temp e pervia dal fatg che las datas da l'onn 2019 vegnan revedidas pir l'onn proxim, n'ha l'uffizi da sanadad betg pudì plausibilisar las indicaziuns per l'onn current 2019 resp. per ils onns suandants. Questas indicaziuns ston perquai vegnir chapidas sco autodecleraziuns dals manaschis. 

Tar la dumonda 1: Dumber da persunas en scolaziun

-Las persunas che na fan betg ina scolaziun da spezialista u spezialist da sanadad al center da furmaziun per la sanadad ed ils fatgs socials (CSS) èn principalmain per­sunas da lingua taliana che frequentan ina scola en il chantun Tessin. Tar la scola­ziun SSS èn quai persunas che visitan autras scolas spezialisadas superiuras da la Svizra orientala.

Tar la dumonda 2: Temp ch'il persunal da tgira resta en questa professiun

Questa dumonda na po betg vegnir respundida. Per quest intent stuessan vegnir dumandadas las persunas che han bandunà la professiun. Questas persunas n'èn dentant betg pli cuntegnidas en las statisticas inoltradas.

Tenor ina lavur da master a l'universitad da Berna da l'onn 2018 en il rom dal studi supplementar al diplom "management en il sectur da sanadad", che tracta il "temp che tgirunzas e tgirunzs diplomads restan en questa professiun en il chantun Berna ed analisa dals facturs d'influenza relevants", èsi sa mussà che tgirunzas e tgirunzs diplomads restan en media circa 22 onns fidaivels a lur professiun.

Tar la dumonda 3: Pensiunaments entaifer ils proxims 10 onns

-
Il pitschen dumber da pensiunaments vegnints tar las spezialistas ed ils spezialists da sanadad è d'attribuir al fatg che questa scolaziun vegn purschida pir dapi paucs onns.

Tar la dumonda 4: Pertschients da plazzas betg occupads per il mument

-
Il grond dumber da plazzas betg occupadas tar il persunal da tgira-SSS è d'attribuir al fatg che la recrutaziun da quest persunal è dapi onns pli difficila che la recrutaziun da spezialistas e spezialists da sanadad.

Tar la dumonda 5: Ratas da fluctuaziun annualas en media tenor las indicaziuns dals manaschis

-
Tar la dumonda 6: Basegn futur da persunal en pertschients da plazzas tenor las stimaziuns dals manaschis
-
8 da schaner 2020