Navigation

Inhaltsbereich

Incumbensa Bigliel concernent la liberaziun da taglia per vehichels electrics durant in temp limità en il rom dal «green deal» ch'il Cussegl grond ha concludì per cuntanscher las valurs da CO2 visadas e pretendidas da la Confederaziun per vehichels novs

Sessiun: 04.12.2019

Cumbain ch'il traffic motorisà è – cun 32% – responsabel per la gronda part da las emissiuns svizras da CO2 e cumbain ch'igl exista in basegn d'agir urgent, na propona la Regenza naginas mesiras concretas en la missiva tar la revisiun parziala da la Lescha chantunala d'energia (LEG) per reducir las emissiuns da CO2 ch'èn d'attribuir al traffic.

Actualmain sa reducescha la dumonda per vehichels da diesel, uschia che la populaziun cumpra puspè dapli vehichels cun motor da benzin. Perquai che vehichels cun motor da benzin emettan per regla dapli CO2 che vehichels cumparegliabels da diesel, creschan las emissiuns da CO2 pervia da quest svilup. L'Uffizi federal d'energia UFE constatescha en ses ultim rapport davart la registraziun e l'evaluaziun annuala dal consum d'energia: «Il consum da carburant e las emissiuns da CO2 d'autos da persunas novs èn s'augmentads cleramain l'onn 2018.»

Ultra da l'augment general d'emissiuns da CO2 ch'èn d'attribuir al traffic, mussan las cifras actualas da l'Uffizi federal d'energia UFE ch'ils vehichels immatriculads da nov en il chantun Grischun han en media in'emissiun da 149 grams CO2/km. Uschia na manchenta il Grischun betg mo cleramain la valur da 130 grams CO2/km pretendida da la Confede­raziun, mabain cuntanscha er la segund ultima plazza en la cumparegliaziun interchantunala.

Tras quai che vehichels novs cun motor da benzin èn en funcziun plirs onns, contribueschan els nunnecessariamain a la contami­naziun cun CO2 ch'è gia gronda, ed engrevgeschan uschia la finamira da la politica dal clima dal Cussegl federal da reducir las emissiuns a netto nulla. En il traffic stradal, che chaschuna las pli bleras emissiuns da gas cun effect da serra, vul il Cussegl federal perquai reducir las emissiuns cun electrifitgar pass per pass il traffic stradal.

Per cuntanscher questa finamira desistan en il fratemp adina dapli chantuns d'imponer taglia sin vehichels cun tracziun puramain electrica. Otg chantuns han gia deliberà dal tuttafatg ils vehichels electrics da la taglia chantunala da traffic. En ils chantuns SO e ZH vala la liberaziun da taglia durant in temp illimità. En ils chantuns FR, GE, GL, SG, NW ed OW vala la liberaziun da taglia durant in temp limità, tut tenor il mument da l'emprima immatriculaziun (48 mais a SG ed OW, 32 mais en tut ils auters chantuns). A quai s'oppona la tenuta da la Regenza grischuna. Quella è s'exprimida pliras giadas cunter ina liberaziun da taglia per vehichels electrics ed ha anc ina giada confermà questa tenuta pir dacurt en la sessiun da zercladur 2019 en la resposta a mia dumonda.

Cun liberar cumplainamain vehichels electrics da la taglia durant in temp limità na fiss il chantun betg in cas singul, mabain sustegness las finamiras dal Cussegl federal ed il «green deal» ch'è vegnì concludì dal Cussegl grond. Quai en spezial er en vista a la realisaziun da l'Accord da Paris ed a la revisiun totala planisada da la Lescha federala davart il CO2 per il temp suenter l'onn 2020.

Las sutsegnadras ed ils sutsegnaders incumbenseschan la Regenza d'adattar la taglia sin il traffic stradal uschia, che vehichels cun tracziun puramain electrica vegnan deliberads cumplainamain da la taglia da traffic (bonus da 100 pertschient). Per cun­tan­scher in effect d'impuls uschè grond sco pussaivel, ma er per garantir che las entradas sajan calculablas a lunga vista, duai la liberaziun da taglia valair durant in temp limità. Quai po per exempel vegnir realisà en dependenza da l'emprima immatriculaziun (model dals chantuns FR, GE, GL, SG, NW ed OW) u tras ina limitaziun temporala («sunset clause»), nua che la liberaziun da taglia vala, fin ch'in tschert termin da scadenza è cuntanschì (p.ex. onn 2030). Questa ultima varianta fiss da preferir, perquai che pli svelt che las burgaisas ed ils burgais cumpran in vehichel electric, e pli grond che l'effect da spargn fiss per ellas ed els. Uschia pudess il chantun Grischun cuntanscher il pli svelt pussaivel la valur da CO2 visada e pretendida da la Confederaziun per vehichels immatriculads da nov, damai che questa valur vegn reducida a partir da l'onn 2020 da 130 a 95 grams CO2/km en media.

Cuira, ils 4 da december 2019

Bigliel, Kappeler, Cantieni, Atanes, Baselgia-Brunner, Berther, Berweger, Cahenzli-Philipp, Degiacomi, Engler, Epp, Fasani, Florin-Caluori, Föhn, Gasser, Hardegger, Hartmann-Conrad, Hitz-Rusch, Hofmann, Horrer, Kasper, Kunfermann, Mittner, Müller (Favugn), Perl, Preisig, Rettich, Rüegg, Rutishauser, Schmid, Stiffler, Thomann-Frank, Thür-Suter, von Ballmoos, Waidacher, Weidmann, Widmer (Favugn), Wilhelm, Pajic, Spadarotto

Resposta da la regenza

En il chantun Grischun survegn in vehichel electric actualmain in rabat dad 80 per­tschient sin la taglia da traffic, quai che correspunda – tut tenor il model – ad ina gre­vezza annuala da 90 fin 110 francs. La Regenza è da l'avis che mesiras d'impuls duessan da princip vegnir realisadas mo lura, sch'ellas chaschunan er tals effects. Sco gia explitgà differentas giadas (cf. p.ex. resposta da la Regenza a la dumonda da Thomas Bigliel en l'ura da dumondas da la sessiun da zercladur 2019, PCG 5/2018-2019, p. 894; resposta da la Regenza a l'incumbensa Kappeler concernent la quota da vehichels electrics dals vehichels novs, conclus da la Regenza dals 16 d'avrigl 2019 [prot. nr. 259], PCG 1/2019-2020, p. 165 s.), na stgaffiss la libe­raziun da taglia per vehichels electrics nagins impuls da cumprar in tal vehichel. Questa constataziun è vegnida cumprovada tras in studi dals 22 da favrer 2013 ch'è vegnì realisà per incumbensa da l'Uffizi per la natira e l'ambient. Tenor quest studi n'ha la reducziun da la taglia sin ils vehichels a motor en il Grischun betg pudì in­fluenzar la cumpra d'autos da persunas ch'emettan pauc CO2. I sto vegnir resguardà che quest studi sa basava sin imports da francs ch'eran pliras giadas pli auts ch'ils imports ac­tuals. Ch'ina tala mesira fiss inefficazia er tenor las enconuschientschas actualas, mussa gist er la remartga da l'incumbensa qua avant maun, che las emis­siuns da CO2 dals vehichels immatriculads da nov l'onn 2018 en il chantun Grischun sa chat­tan sur la media. Uschia stoi vegnir fatg endament ch'il Grischun ha – en cum­pa­re­gliaziun cun l'ulteriura Svizra – in dals sistems da rabat ils pli generus per vehichels che chaschunan paucas emissiuns, perquai che la reducziun da la taglia da traffic n'ha betg ina durada limitada.

Plinavant è la Regenza da l'avis ch'ina liberaziun da taglia per vehichels electrics saja inadattada, perquai ch'er il princip dal chaschunader pleda cunter ina tala regu­laziun. Enconuschentamain èn las entradas nettas da las taglias da traffic liadas a l'intent e ston vegnir duvradas per construir e per mantegnair las vias, e vehichels electrics na strapatschan il corpus da la via betg main che vehichels cun motors convenziunals.

Sa basond sin questas explicaziuns propona la Regenza al Cussegl grond da refusar questa incumbensa.

6 da mars 2020