La Regenza è conscienta da la gronda impurtanza da vias da traffic che funcziunan per la regiun Alvra sco er per las regiuns e per las vals cunfinantas. Tenor il stadi da las enconuschientschas actualas pudess in eveniment chaschunà da la glischnada da Brinzauls – sch'i capitass il mender scenari – pertutgar tant las vias da Brinzauls, da la Landwasser e dal Güglia sco er la lingia da l'Alvra da la Viafier retica (VR) ed interrumper quellas durant in lung temp u schizunt las render nunduvrablas a lunga vista. Sch'i capitass in eveniment correspundent, porscha la vasta rait da vias da traffic dal chantun Grischun gia oz pussaivladads per in'avertura a curta u a media vista da las regiuns che fissan eventualmain pertutgadas. Schebain ch'i pudess alura dar restricziuns e sviaments pli gronds, duess in'avertura da princip restar pussaivla.

Il Stab directiv chantunal (SDC) s'occupa dapi bundant in onn intensivamain da las dumondas che resultan da las enconuschientschas geologicas, per il traffic e per il provediment. En in'organisaziun dal project cun ina vasta basa sviluppa ina "gruppa da lavur Traffic" – cun represchentantas e represchentants dals uffizis chantunals cumpetents sco er da las interpresas da transport involvidas – mesiras specificas per las vias da traffic, sch'i capitassan differents scenaris d'eveniments. Tenor las enconuschientschas actualas pon ins bain salvar la situaziun da las vias da traffic mo cun mesiras concepidas a lunga vista, sch'i capitass in eveniment grond. I vegn ad esser decisiv, sch'ins po ralentar la glischnada en il sectur dal vitg da Brinzauls cun ina gallaria da drenascha d'ina vasta dimensiun. La construcziun d'ina tala gallaria pretenda gronds scleriments geologics e tecnics e sto vegnir coordinada stretgamain cun mesiras a lunga vista per las vias e per la viafier.

Tar la dumonda 1: La Regenza è er conscienta da la situaziun, sch'i capitass svelt in eveniment, ed ha instradà mesiras preventivas correspundentas sur il SDC. La "gruppa da lavur Traffic" sa concentrescha per quest intent sin l'observaziun a curta ed a media vista da las vias da colliaziun dals scolars e dals pendularis. Examinà vegn en spezial er il diever da las vias da guaud u da l'anteriura colliaziun dal Güglia tras Casti. La furniziun a curta ed a media vista da bains dal provediment quotidian po vegnir garantida sur sviaments da gronda dimensiun sur Tavau (u la stad sur ils pass da l'Alvra e dal Flüela).

Tar la dumonda 2: Ils moviments dal terren èn s'accelerads fermamain durant l'ultim onn ed il privel d'ina crudada da grippa è in scenari pussaivel, dentant pauc probabel. La situaziun da privel en il sectur da la via chantunala da Brinzauls vegn observada cun in vast sistem da surveglianza. Sche necessari vegn la via serrada temporarmain cun agid d'ina ampla da traffic. Sch'ils eveniments s'augmentan, stuessi er vegnir prendì en consideraziun da serrar parzialmain la via da Brinzauls. Ils sbassaments da las vias da Brinzauls, dal Güglia e da la Landwasser sco er dal traject da la VR vegnan eliminads dapi onns cun mesiras architectonicas. Quant ditg che quai vegn ad esser pussaivel, dependa tranter auter dal svilup dals moviments dal terren.

L'Uffizi da construcziun bassa dal Grischun e la Viafier retica (VR) s'occupan cuminaivlamain da la problematica e vegnan ad incumbensar in studi da variantas per pussaivlas mesiras a lunga vista. Quai cun la finamira d'examinar in eventual spustàment da las vias da traffic integrond la via dal Güglia.

Tar la dumonda 3: Tenor las enconuschientschas actualas datti in "termin d'avis" pli lung per ils eveniments da la natira ch'èn relevants per la lingia da la VR. La VR è integrada stretgamain en l'organisaziun dal project concernent la glischnada da Brinzauls. Las reparaturas dals binaris da la VR ch'èn necessarias pervia dals moviments dal terren, pon vegnir fatgas – cuntrari als donns d'ina via – tras in'adattaziun relativamain simpla dal fundament da glera. Sco ch'igl è gia vegnì preschentà en connex cun la dumonda 2, èn actualmain en curs las preparativas per in studi che duai elavurar ponderaziuns davart tut las variantas pussaivlas per la via e per la viafier. Igl è previs da determinar la meglra varianta per las mesiras a lunga vista durant il terz quartal da l'onn 2020.

5 da mars 2020