Il svilup turistic da vart dal chantun vegn tgirà da l'Uffizi per economia e turissem (UET) sin basa da la Lescha per promover il svilup economic en il chantun Grischun (Lescha davart il svilup economic, LSE; DG 932.100) ch'è en vigur dapi il 1. da schaner 2016. Ils instruments ils pli impurtants dal svilup turistic chantunal tenor la LSE èn la promoziun da l'infrastructura, la promoziun d'occurrenzas, la realisaziun da mesiras federalas (Nova politica regiunala), la promoziun da l'organisaziun turistica da marketing Grischun Vacanzas sco er la marca regiunala graubünden. Cun stgaffir dus credits d'impegn concernent il «program da turissem dal Grischun 2014–2023» e concernent «infrastructuras relevantas per il sistem» ha il Cussegl grond tschentà accents impurtants da la politica chantunala da turissem ils ultims onns. Il svilup turi­stic è er ina part integrala dal program da la regenza 2021–2024: Sut il punct central da svilup 10.2 «Diversificaziun en il turissem» èn vegnidas determinadas differentas mesiras strategicas per ils proxims onns. Sco tar tut il svilup economic vali da diffe­renziar er en la realisaziun operativa dal svilup turistic tranter la promoziun da pro­jects da terzas persunas (contribuziuns) ed atgnas activitads chantunalas (incumben­sas).

Tar ils puncts 1 - 3: Per las activitads da mintga uffizi chantunal valan – areguard las cumpetenzas finanzialas – las prescripziuns tenor la legislaziun da finanzas. En ils fatgs d'incumbensa e da contribuziun valan confurm al senn las finamiras tenor l'Ordinaziun davart la realisaziun da la public corporate governance per il chantun Grischun (DG 710.400). Las finanzas da tut ils uffizis vegnan controlladas periodica­main da la Controlla chantunala da finanzas. Ultra da quai poi vegnir menziunà che las contribuziuns (Grischun Vacanzas, graubündenVIVA SA) e las incumbensas (secretariat da la marca graubünden) menziunadas en l'incumbensa èn vegnidas concedidas resp. surdadas da la Regenza, e quai pervia da lur volumen finanzial. Las activitads correspundentas furneschan ina contribuziun impurtanta per cuntan­scher la finamira en il sectur dal svilup turistic, numnadamain da promover la dumon­da e da gudagnar giasts novs e giasts che returnan adina puspè. Sin basa da que­stas explicaziuns na dovri – ord vista da la Regenza – naginas ulteriuras mesiras per examinar las structuras resp. la corporate governance u ils currents finanzials.

Ina survista concernent la collavuraziun dal UET cun differents partenaris turistics po vegnir consultada sut https://www.gr.ch/DE/institutionen/verwaltung/dvs/awt/ ueberuns/Seiten/Themen.aspx. Ella cumpiglia ils acturs ils pli impurtants resp. las contribuziuns sco er las incumbensas (atgnas activitads) actualmain las pli grondas, ch'il chantun paja resp. surdat en il sectur dal svilup turistic sa basond sin la LSE. La survista mussa er che surdadas (p.ex. secretariat da la marca graubünden ed agen­tura per realisar la campagna da marca Enavant 4.0) èn vegnidas fatgas sin basa da la legislaziun da submissiun. La Regenza è da l'avis che la transparenza areguard las activitads ed areguard ils currents finanzials per Grischun Vacanzas (contribuziun 2019–2022), per il secretariat da la marca graubünden (incumbensa 2020–2023), per la campagna da marca Enavant 4.0 (contribuziun 2019–2023) sco er per il project graubündenVIVA (contribuziun 2019–2020) saja gronda avunda. La Regenza con­trollescha cuntinuadamain la surdada da las incumbensas resp. la concessiun da las contribuziuns sco er las incaricas da prestaziun respectivas als differents acturs. Exempels per quai èn l'ultima adattaziun da la strategia da Grischun Vacanzas, che vegn realisada dapi il cumenzament da l'onn 2020, e l'ulteriur svilup da la marca graubünden. In'examinaziun pli detagliada da la strategia en il sectur dal svilup turistic n'è actualmain betg necessaria ord vista da la Regenza.

Sa basond sin questas explicaziuns propona la Regenza al Cussegl grond da refusar questa incumbensa.

5 da mars 2020