Navigation

Inhaltsbereich

Dumonda Bigliel concernent la protecziun dal stabiliment giudizial Cazas Tignez e d'autras infrastructuras sensiblas cunter attatgas da dronas cun adattar l'Ordinaziun chantunala davart l'aviatica (DG 875.100)

Sessiun: 28.08.2020

Avant 1 onn ha il deputà Thomas Bigliel dumandà la Regenza da preschentar, co ch'il stabiliment giudizial Cazas Tignez ed auters lieus sensibels vegnian protegids cunter registraziuns or da l'aria e da satellits. Cun sia dumonda dals 21 d'avust 2019 è la Regenza er vegnida confruntada cun la dumonda, sche sursgols da dronas possian vegnir impedids cun in scumond d'entrar en il spazi d'aria.

En sia resposta dals 22 d'avust 2019 ha la Regenza communitgà ch'i saja chaussa da la Confederaziun da decretar in scumond d'entrar en il spazi d'aria sur il stabiliment giudizial Cazas Tignez; en quest connex stoppia er la vischnanca pertutgada dar ses consentiment.

Cuntrari a la resposta da la Regenza ha l'Uffizi federal d'aviatica civila (UFAC) communitgà sin dumonda, che la Confederaziun na saja betg cumpetenta da relaschar tals scumonds da sgol. Anzi, ils chantuns possian decretar scumonds da sursgol per eromobils nunequipads d'in pais total da main che 30 kg cun l'intent da proteger persunas e chaussas per terra (art. 51 al. 3 da la Lescha federala davart l'aviatica, art. 2a da l'Ordinaziun davart l'aviatica, art. 17, art. 18 ed art. 19 da l'Ordinaziun dal DATEC davart eromobils da categorias spezialas).

Sin basa da questa infurmaziun giuridica ha il Departament da giustia, segirezza e sanadad (DGSS) dumandà il november 2019 l'anteriur Departament da construcziun, traffic e selvicultura (ussa Departament d'infrastructura, energia e mobilitad, DIEM) d'examinar, sche las regulaziuns ch'èn necessarias per in scumond chantunal da sursgol, possian vegnir integradas en l'Ordina­ziun chantunala davart l'aviatica (DG 875.100).

Perquai vegnan fatgas las suandantas dumondas a la Regenza:

  1. Entaifer tge perioda poi vegnir fatg quint cun ina meglieraziun da la protecziun dal stabiliment giudizial Cazas Tignez cun formular scumonds d'entrar en il spazi d'aria e cun surpigliar tals en l'Ordinaziun chantunala davart l'aviatica (DG 875.100)?
  2. Ha la Regenza evaluà cun agid dals departaments cumpetents autras infrastructuras grischunas criticas che pudessan er profitar d'in tal effect da protecziun?
  3. L'onn passà ha la Regenza communitgà en sia resposta a la dumonda dal deputà Thomas Bigliel ch'il stabiliment giudizial Cazas Tignez vegnia ad installar – ultra dal scumond da sursgol pretendì – in sistem da detecziun per localisar dronas. In implant cumparegliabel è vegnì prendì en servetsch regular dal chantun Argovia resp. dal stabiliment giudizial Lenzburg la fin da l'onn 2017. Quant enavant èn qua ils scleriments en chaussa? Questa dumonda sto vegnir vesida en spezial sut l'aspect ch'i dat en il chantun Grischun interpresas ch'èn gia sa fatschentadas intensivamain cun questa tematica e che porschan servetschs da cusse­gliaziun correspundents sco er sistems da defensiun. Tenor l'avis da las sutsegnadras e dals sutsegnaders sto vegnir consultada l'expertisa da talas interpresas per rinforzar il Grischun sco lieu economic e d'innovaziun.

Cuira, ils 28 d'avust 2020

Bigliel, Dürler, Gartmann-Albin, Brandenburger, Della Cà, Felix, Hartmann-Conrad, Hitz-Rusch, Holzinger-Loretz, Kasper, Kienz, Mittner, Müller (Susch), Natter, Perl, Rettich, Thomann-Frank, Thür-Suter, Ulber, Sigron

Resposta da la regenza

La surpigliada da la regulaziun da la UE concernent eromobils nunequipads ha cha­schunà ina revisiun totala da l'Ordinaziun dal DATEC davart eromobils da categorias spezialas (OECS; CS 748.941). Tenor la Confederaziun duai quella vegnir messa en vigur en il decurs da l'onn 2021. Las adattaziuns da la OECS pertutgan mo ils sec­turs che vegnan reglads da nov tras il dretg da la UE. La surpigliada da la regulaziun da la UE concernent eromobils nunequipads (uschenumnads "unmanned aircraft system", UAS) pretenda novaziuns che van lunsch sur las disposiziuns vertentas ora, che cha­schunan la furmaziun da novas categorias e che reglan en moda bler pli restrictiva il traffic da dronas che fin ussa (tranter auter obligaziuns da registraziun e da scola­ziun). Per eromobils nunequipads pli pitschens cun in pais da main che 30 kilos datti gia oz territoris cun in scumond da sgol, sco plazzas aviaticas militaras, zonas da controlla da sgols activas u fullas da glieud al liber.

En connex cun la revisiun da la OECS planisada ha la Confederaziun communitgà als chantuns en la brev da consultaziun dals 12 da favrer 2020, ch'ella examineschia d'integrar en la legislaziun federala la regulaziun unitara d'ulteriurs territoris naziunals cun restricziuns da sgol sco territoris UAS. Uschia vul la Confederaziun prevegnir ad in'unda da regulaziuns dals chantuns e stgaffir relaziuns unitaras en il senn da la se­girezza giuridica e da l'accessibladad. En la brev da consultaziun han ils chantuns perquai survegnì l'occasiun da communitgar lur giavischs a l'Uffizi federal d'aviatica civila (UFAC).

En sia consultaziun (conclus da la Regenza dals 21 d'avrigl 2020, prot. nr. 325) ha la Regenza beneventà che la Confederaziun planisescha da crear zonas cun restric­ziuns da sgol ch'èn regladas en moda unitara, ed ha perquai supplitgà d'integrar – ultra dals stabiliments giudizials – er auters territoris UAS sco ovras electricas, im­plants polizials, ospitals e clinicas u asils e zonas da paus per la selvaschina. Plina­vant ha ella rendì attent a la necessitad da determinar zonas cun restricziuns da sgol temporaras resp. dinamicas (p.ex. WEF).

Cun la brev d'infurmaziun dals 3 d'avust 2020 ha il UFAC communitgà als chantuns ch'el haja – pervia da las respostas survegnidas – l'intenziun da definir cun la proxi­ma revisiun da la OECS stabiliments giudizials, indrizs nuclears, infrastructuras mili­taras sco er perimeters da plazzas aviaticas sco territoris geografics UAS. La fixaziun d'ulteriurs territoris resguardia el sco betg cunvegnenta. A chaschun da la procedura da consultaziun possian ils chantuns però prender anc ina giada posiziun davart l'ex­tensiun dals territoris cun restricziuns da sgol. Ultra da quai sajan ils chantuns libers da fixar sezs tals territoris cun resguardar las prescripziuns da la legislaziun federala u d'inoltrar lur basegns anc ina giada en il rom da la proxima revisiun da la OECS.

Tar la dumonda 1: Sin fundament da la revisiun da la OECS planisada da la Confe­deraziun pon ins far quint che stabiliments giudizials ed auters stabiliments vegnian designads en il decurs da l'onn 2021 sco territoris cun restricziuns da sgol per UAS. En il rom da las cumpetenzas che al restan la finala vegn il chantun sin quai ad exa­minar da reglar en l'Ordinaziun chantunala davart l'aviatica ulteriurs territoris cun restricziuns da sgol ch'èn necessaris per el.

Tar la dumonda 2: Gea. La primavaira 2020 ha la Regenza evaluà tar ils departa­ments ils basegns da territoris cun restricziuns da sgol ed ha communitgà quels a la Confederaziun en sia posiziun (conclus da la Regenza dals 21 d'avrigl 2020, prot. nr. 325).

Tar la dumonda 3: En il nov stabiliment giudizial serrà Tignez è vegnì installà in indriz per detectar dronas ch'è operativamain en funcziun. Quest indriz è vegnì projectà dals planisaders ch'eran incaricads cun la construcziun dal nov stabiliment giudizial, en spezial dal planisader da segirezza. Avant la submissiun èn vegnids evaluads differents sistems ch'èn en funcziun. Las enconuschientschas fatgas èn vegnidas integradas en la publicaziun per il project specific. Tschertas parts da l'indriz èn vegnidas furnidas d'in purschider indigen.

30 d'october 2020