Sa basond sin l'art. 153 al. 3 da la Lescha da taglia per il chantun Grischun (Lescha da taglia, LT; DG 720.000) ston vegnir pajads tschains da retard per pajaments ch'èn vegnids fatgs memia tard. Per mintga onn chalendar vegn el fixà da nov dal Depar­tament da finanzas. Il tschains è dapi onns mintgamai 4 pertschient. In'excepziun è l'onn 2020. Pervia da la derasaziun dal coronavirus aveva il Cussegl federal concludì il mars 2020 differentas mesiras da protecziun ed in lockdown per pliras branschas. A medem temp ha el prendì vastas mesiras da sustegn per l'economia. Ils chantuns da lur vart han cumplettà questas mesiras. Ils 13 da mars 2020 ha la Regenza grischuna declerà la situaziun extraordinaria e concludì sin basa da quai ils 27 da mars 2020 in vast pachet da mesiras per mitigiar las consequenzas economicas da las mesiras da protecziun prendidas cunter il coronavirus. Quest pachet ha er cum­piglià facilitaziuns da pajament per l'economia e per la populaziun, sco en spezial la renunzia a tschains da retard ed a taxas d'admoniziun sin quints dal chantun per taglias, per taxas e per multas da l'onn chalendar 2020. Questas mesiras èn vegni­das accordadas cun la Confederaziun e cun ils auters chantuns che han er desistì d'incassar tschains da retard e taxas d'admoniziun per l'onn 2020.

Per l'onn 2021 incassescha il chantun Grischun – sco er la Confederaziun ed ils auters chantuns – puspè ils tschains da retard e las taxas d'admoniziun usitadas. Ils tschains da retard importan 4 pertschient e la taxa per la segunda admoniziun 30 francs. Sco quai che la cumparegliaziun cun la Confederaziun e cun ils auters chantuns mussa, èn quests 4 pertschient en in rom usità e bain giustifitgabel (Confederaziun 3%; AG 5,1%; BL 5,0%; BE 3,0%; GL 4,5%; LU 3,5%; SG 4,0%; ZH 4,5%).

Sa basond sin l'art. 154 al. 1 da la Lescha da taglia po l'Administraziun da taglia – sch'i existan relaziuns spezialas – prolungar il termin da pajament ubain permetter pajaments en ratas per taglias, per tschains u per multas che ston vegnir pajads. En quest connex po ella er desister d'incassar in tschains da retard. Questa disposiziun è cunvegnenta e raschunaivla. Ina renunzia generala a tschains da retard per l'onn chalendar 2021 fiss percunter actualmain ina soluziun singula isolada. Ni la Confe­deraziun ni ils auters chantuns na desistan da tschains da retard per l'onn 2021. I n'è er betg pli previs da renunziar a taxas d'admoniziun u da scussiun. La tariffa tscher­nida da 4 pertschient è giustifitgada objectivamain ed adequata en ils conturns inter­chantunals. La renunzia a tschains da retard per l'onn 2021 stuess vegnir realisada retroactivamain per il 1. da schaner 2021. Ils tschains da retard gia incassads stues­san vegnir restituids, quai che chaschunass lavur administrativa che na fiss strusch da dumagnar. Plinavant fiss quai ina regulaziun pauschala che na gidass betg propi las interpresas ch'èn pertutgadas fermamain da la crisa da corona. Tar cas da direz­za per propi po l'Administraziun da taglia desister d'incassar ils tschains da retard en cas da moratoris e da pajaments en ratas. Sch'in pajataglia duvrass in moratori per surviver la crisa economica actuala, na sto el betg pajar – sco pretendì en l'interven­ziun – tschains da retard per quints da taglia betg pajads. Da resguardar vali er en quest connex ch'ils tschains da retard n'èn strusch da gronda impurtanza per paja­taglias che pateschan fitg da la crisa da COVID-19. Da las entradas pli bassas respectivamain dal gudogn che manca resultan er taglias considerablamain pli bas­sas. La regulaziun proponida fiss in avantatg oravant tut per pajataglias cun auts debits da taglia, che pudessan pajar quels pli tard senza consequenzas finanzialas.

Las vischnancas grischunas pon fixar sezzas l'autezza dals tschains da retard. Sch'ellas s'orienteschan tenor ils tschains da retard dal chantun e sch'ellas n'èn betg d'accord cun l'autezza da quels, èn ellas libras da fixar ina regulaziun divergenta. Per regla surpiglian las vischnancas las tariffas dal chantun. Per l'onn current 2021 han las suandantas vischnancas concludì ina regulaziun divergenta: Roveredo 2,5%; Trimmis e Tavau 0% (concludì uschia posteriuramain).

L'orientaziun tenor il tschains da retard chantunal vul dir che quasi tut la vischnancas fissan er pertutgadas d'in tschains chantunal da 0% e che er quasi tut las vischnan­cas stuessan restituir ils tschains da retard gia incassads, quai che chaschunass er per ellas custs supplementars administrativs considerabels.

Sa basond sin questas explicaziuns propona la Regenza al Cussegl grond da refusar questa incumbensa.

9 d'avrigl 2021