Navigation

Inhaltsbereich

Incumbensa Koch concernent la strategia d'immobiglias dal chantun Grischun

Sessiun: 21.04.2021

En la communicaziun a las medias dals 8 da mars 2021 ha la Regenza infurmà ch'ella haja prendì il conclus da sistir per entant la concurrenza d'investiders currenta che concerna l'areal "Loëstrasse" sco er il process da vendita per la Villa Brügger che sa chatta sper l'edifizi chantunal. La Regenza vegnia a decider davart l'ulteriur proceder areguard questa immobiglia, cur che las decisiuns politicas correspundentas sajan avant maun. Questa decisiun prendida a curta vista ha grondas consequenzas. Per l'ina vegn franada ina concurrenza da projects terminada, per l'autra na vegn betg realisada la voluntad dal parlament e dal pievel da l'onn 2012. Ch'ina concurrenza d'investiders vegn franada a curta vista, suenter che las interprendidras ed ils interprendiders, ma er il chantun sez han gì custs considerabels, chaschuna bleras dumondas avertas. Dentant er dal fatg ch'i vegn sa distatgà da la missiva da la votaziun davart «sinergia 1» sco er da la missiva carnet nr. 5 2011-2012 – davart il medem project – resultan bleras dumondas avertas ed ina gronda malsegirezza giuridica. Tras il retgav calculà tenor la missiva per mauns dal Cussegl grond importan las investiziuns nettas en «sinergia 1» 49 milliuns francs. Tras las decisiuns che la Regenza ha prendì ussa, vegnissan questas investiziuns nettas augmentadas per ca. 14,8 milliuns francs. Ma er empermischuns envers la citad da Cuira (guardar missiva pagina 4 – «Cunquai che questas localitads d'abitar e da biro vegnan duvradas meglier, vegn la valur dal center da la citad da Cuira augmentada considerablamain») na vegnan betg tegnidas.

Las sutsegnadras ed ils sutsegnaders èn conscients dal fatg ch'er strategias dastgan vegnir reponderadas ed adattadas. Sin fundament da la situaziun da partenza actuala poi p.ex. esser fitg raschunaivel da mantegnair la Villa Brügger en proprietad dal chantun. In stop andetg, sco ch'el è vegnì fatg en quest cas, è dispitaivel, eventualmain schizunt giuridicamain problematic.

Sin basa da questa situaziun da partenza èsi en mintga cas necessari, ch'il rapport davart las immobiglias che la Regenza ha empermess, cumparia svelt e vegnia discutà en il parlament il pli tard l'october 2021 sco annunzià. Il rapport duai perquai vegnir preschentà sco rapport cun sboz concret dal conclus per ch'il parlament possia far la tractativa detagliada necessaria.

Las sutsegnadras ed ils sutsegnaders incumbenseschan perquai la Regenza:

  1. Da preschentar il rapport davart las immobiglias dal chantun Grischun sco rapport cun sboz concret dal conclus.
  2. Da mussar correspundentamain en il rapport davart las immobiglias variantas, co che las decisiuns correspundentas dal Cussegl grond sco er dal pievel da l'onn 2012 pon vegnir observadas.
  3. Da mussar ina varianta, co che la Villa Brügger resta en proprietad dal chantun e co che las ulteriuras immobiglias vegnan tuttina appurtadas al martgà tenor la missiva carnet nr. 5 2011-2012.
  4. Da mussar tge consequenzas ch'ina eventuala adattaziun da las decisiuns da l'onn 2012 ha e tge consequenzas finanzialas che resultan en quest connex.

Tavau, ils 21 d'avrigl 2021

Koch, Hohl, Giacomelli, Aebli, Berweger, Brandenburger, Casty, Censi, Della Cà, Dürler, Ellemunter, Engler, Favre Accola, Felix, Gort, Grass, Hardegger, Hartmann-Conrad, Hefti, Hug, Kunz (Cuira), Kunz (Fläsch), Loi, Michael (Donat), Mittner, Natter, Rüegg, Salis, Schutz, Stiffler, Thür-Suter, von Ballmoos, Waidacher, Weber, Weidmann, Wellig, Adank-Arioli, Heini, Renkel

Resposta da la regenza

A chaschun da la sessiun d'october 2020 ha la Regenza orientà il Cussegl grond – en il rom da l'ura da dumondas – davart ils proxims pass intenziunads a Cuira suen­ter la retratga da "sinergia 1" (dumondas Holzinger-Loretz concernent la strategia d'immobiglias dal chantun Grischun, PCG 2/2020/2021, p. 435). En quest connex ha ella declerà al parlament ch'ella cuntinueschia cun la strategia chantunala d'immobi­glias ch'ella aveva suttamess al Cussegl grond gia en anteriuras missivas (cf. carnet nr. 6/2009-2010 e carnet nr. 5/2011-2012), fin che la strategia saja realisada cum­plettamain e ch'ella veglia realisar la segunda etappa da "sinergia". Il stadi da la strategia d'immobiglias e l'ulteriur proceder vegnian preschentads al Cussegl grond l'onn proxim en furma d'in rapport.

Durant l'ura da dumondas da la sessiun da december 2020 ha la Regenza explitgà en connex cun la dumonda Michael concernent l'influenza da la strategia d'immobi­glias sin la refurma da las dretgiras (PCG 3/2020/2021, p. 681) che l'emprim stoppia vegnir approvada e terminada la segunda etappa da "sinergia". Alura vegnia renovà l'edifizi chantunal liber. En cas d'in andament optimal dal project stettia alura a dispo­siziun il nov edifizi da dretgira a partir da l'onn 2030 per ina Dretgira superiura. Sch'i vegnia divergià da questa planisaziun strategica, stoppian vegnir chattadas autras soluziuns, resguardond il dretg d'autonomia da las dretgiras chantunalas, ch'è francà en la constituziun.

La Cumissiun per giustia e segirezza (CGS) ha silsuenter inoltrà en la sessiun da december 2020 ina incumbensa a la Regenza, ch'è en il fratemp vegnida acceptada dal parlament, da priorisar la fusiun da las dretgiras chantunalas superiuras en ina sedia giudiziala cuminaivla independentamain da la strategia chantunala d'immobi­glias sco er da mussar opziuns, co che l'edifizi chantunal possia vegnir mess a disposiziun a temp (PCG 3/2020/2021, p. 570).

En sia resposta ha la Regenza renconuschì il giavisch dal Cussegl grond da metter a disposiziun l'edifizi chantunal a la giustia, e quai en moda uschè priorisada sco pus­saivel. Ultra da quai ha ella empermess da preschentar en il rapport davart las immo­biglias, ch'è vegnì annunzià per la sessiun d'october 2021, propostas da variantas che prevesan – en divergenza da la strategia d'immobiglias vertenta – ina midada anticipada da l'Uffizi da construcziun bassa (UCB). Ch'ina Dretgira superiura retiria l'edifizi chantunal saja er en quest cas – pervia da differentas dependenzas – dentant pussaivel il pli baud a partir da la mesadad da l'onn 2025.

Per mantegnair tut las opziuns d'agir dal chantun ha la Regenza – sco consequenza da questa decisiun politica – franà il process da vendita per la Villa Brügger che sa chatta directamain sper l'edifizi chantunal e sistì ad interim la concurrenza d'investi­ders per l'areal chantunal Loë che po actualmain anc vegnir duvrà da l'administraziun chantunala.

Tar ils puncts 1, 2, 3 e 4: Cun il conclus dals 14 da schaner 2020 (prot. nr. 17/2020) aveva la Regenza incumbensà l'Uffizi da construcziun auta d'elavurar ina missiva davart il stadi actual ed ina perspectiva per l'ulteriura realisaziun da la strategia chan­tunala d'immobiglias. Il rapport che vegn suttamess al Cussegl grond per laschar prender enconuschientscha – sin fundament da las prescripziuns da la legislaziun davart il Cussegl grond – vegn a dar al parlament tranter auter ina survista davart las intenziuns oriundas e davart las midadas effectivas dal portfolio d'immobiglias a Cuira sco er davart l'ulteriur svilup. Plinavant vegn quel a cuntegnair opziuns d'agir per in lieu substitutiv dal UCB e lur effects per il portfolio d'immobiglias sco conse­quenza da la retratga anticipada da l'edifizi chantunal tras ina Dretgira superiura. Il Cussegl grond po pia tractar gia en la sessiun d'october 2021 – ultra d'auters temas – er las dumondas da las sutsegnadras e dals sutsegnaders en enconuschientscha dal stadi actual da la strategia chantunala d'immobiglias ed eventualmain prender posiziun en in'atgna decleraziun.

Sa basond sin questas explicaziuns propona la Regenza al Cussegl grond da midar questa incumbensa areguard ils puncts 1 fin 4 sco suonda: La Regenza vegn incum­bensada da dar en il rapport davart las immobiglias annunzià ina survista davart las intenziuns oriundas e davart las midadas effectivas dal portfolio d'immobiglias a Cuira e davart l'ulteriur svilup sco er da preschentar las opziuns d'agir ed ils effects per il portfolio d'immobiglias sco consequenza da la retratga anticipada da l'edifizi chantunal tras ina Dretgira superiura.

25 da zercladur 2021