Cun ils programs d'impuls lantschads la stad/l'atun e l'enviern passà ha il turissem da temp liber pudì vegnir stimulà cun mesiras da communicaziun attractivas. Bleras destinaziuns avevan cunter tuttas aspectativas ina buna stagiun da stad e d'enviern, in pèr dad ellas schizunt cun resultats sur la media (pernottaziuns). Cleramain betg sa recreadas n'èn las destinaziuns turisticas ch'èn plitgunsch orientadas ad in turissem da citad che dependa en emprima lingia da giasts internaziunals, da giasts da cultura e da transit, da gruppas e da viagiaturs da fatschenta. Questas destinaziuns pateschan anc adina considerablamain e demussan tar las pernottaziuns vinavant in minus da fin 70 % per mais cumpareglià cun l'onn precedent. Exempels per talas destinaziuns èn (ma betg definitivamain) Cuira, Viamala, Moesa, ma er Tavau cun lur fatschenta MICE (meetings incentives conventions exhibitions/events).

Entant ch'il turissem da temp liber chatta puspè la via enavos en ina normalitad da creschientscha in zic autra, èn parts dal turissem da fatschenta e dal turissem MICE suttamessas a gronds process da midada, per exempel cun spustar meetings, interacziuns u scuntradas en in spazi virtual. Emprimas valitaziuns quintan per exempel circa cun la mesadad dal volumen d'avant la pandemia. La speranza d'in svelt meglierament per las pernottaziuns en hotels è fitg pitschna per questas destinaziuns, perquai che lur gruppas en mira na vegnan ditg betg a returnar u vegnan a returnar mo fitg plaun. Er ils giasts dals martgads lontans vegnan a mancar vinavant. La pandemia dal coronavirus vegn a midar persistentamain la branscha turistica.

Ils programs d'impuls menziunads qua survart n'èn betg en mintga cas favuraivels per questas destinaziuns che pateschan fermamain, perquai che la sistematica da finanziaziun tar las promoziuns da las organisaziuns da tetg prevesa che las destinaziuns e ch'ils furniturs da prestaziuns associads sa participeschian en ina moda considerabla a tala. Questas contribuziuns n'èn betg pli finanziablas per las destinaziuns ch'èn ussa pertutgadas spezialmain! Dals programs d'impuls profiteschan pia quellas destinaziuns ch'èn gia sa recreadas u ch'èn sin buna via da sa recrear.

Il chantun guarda plain fidanza sin la stagiun da stad e d'atun 2021. Emprims scenaris fan quint cun frequenzas turisticas d'ina dimensiun sumeglianta a quellas da l'onn precedent. In privel exista però ch'i dettia tar las Svizras ed ils Svizzers – sche la gronda part da las persunas è vaccinada – in'euforia da viadi «post corona» che vegn a sa manifestar eventualmain gia l'onn 2021 u alura il pli tard a partir da l'onn 2022. Giasts svizzers vegnan a planisar lur viadis a l'exteriur ch'els avevan suspendì per part, uschespert che quai vegn ad esser pussaivel. Differents chantuns preparan pervia da quai preventivamain in'offensiva per far frunt uschè bain sco pussaivel a questa tendenza.

Resumond constatain nus che las consequenzas negativas da la pandemia tutgan bler pli ferm ed en moda bler pli persistenta las destinaziuns che han ina purschida ch'è plitgunsch orientada ad in turissem da citad, perquai ch'i mancan anc pli ditg ils giasts da l'exteriur, dal sectur da fatschenta e da gruppas resp. perquai che quests giasts na returnan anc ditg betg. Plinavant èsi da temair che las Svizras ed ils Svizzers vulessan puspè reservar pli gugent e pli savens lur vacanzas a l'exteriur.

Las sutsegnadras ed ils sutsegnaders incumbenseschan perquai la Regenza:

1. d'examinar, co che las destinaziuns pertutgadas en moda surproporziunala resp. lur furniturs da prestaziuns pon vegnir sustegnids per reacquistar resp. per cumpensar ils segments pers (business, MICE, congress e.u.v.).
2. da duvrar uschè paucs meds finanzials chantunals supplementars sco pussaivel per programs d'impuls che sa restrenschan unicamain a promover la dumonda (p.ex. pura inspiraziun, campagnas da reclama, communicaziun, reclama), mabain da lantschar in program per stabilisar la dumonda che resguarda il cumportament futur dals giasts ed il cumportament futur da viadi.
3. da concepir il program per stabilisar la dumonda uschia, che en spezial las destinaziuns donnegiadas il pli ferm pon sa participar en l'avegnir cun custs uschè pitschens sco pussaivel a programs d'impuls futurs e profitar da tals.

Tavau, ils 21 d'avrigl 2021

Rüegg, Caluori, Loi, Atanes, Berweger, Bigliel, Brunold, Cahenzli-Philipp, Caviezel (Cuira), Censi, Danuser, Della Cà, Dürler, Ellemunter, Engler, Fasani, Felix, Flütsch (Spleia), Föhn, Grass, Gugelmann, Hardegger, Hartmann-Conrad, Hohl, Holzinger-Loretz, Horrer, Jochum, Kienz, Koch, Kunfermann, Loepfe, Maissen, Marti, Michael (Donat), Mittner, Müller (Susch), Natter, Perl, Pfäffli, Rettich, Rutishauser, Schutz, Stiffler, Thomann-Frank, Thür-Suter, von Ballmoos, Waidacher, Weidmann, Wellig, Widmer (Favugn), Wilhelm, Adank-Arioli, Costa, Flütsch (St. Antönien), Tomaschett (Cuira), Pajic, Spadarotto