Navigation

Inhaltsbereich

Dumonda urgenta da la fracziun da la PS concernent mesiras areguard il svilup actual da la pandemia (emprim sutsegnader Caviezel, Cuira)

Sessiun: 25.08.2021

Il svilup da la pandemia da COVID è actualmain pauc allegraivel. L'incidenza crescha fermamain tant en Svizra sco er en il Grischun. Ils dumbers da cas èn actualmain var diesch giadas pli auts che durant il medem temp avant in onn. Actualmain vegnan ospitalisadas var tschintg giadas dapli persunas che l'avust 2020. La varianta delta è extremamain contagiusa. Cun in sguard sin l'experientscha da l'onn passà stoi vegnir fatg quint cun dumbers che s'augmentan anc pli fitg, uschespert ch'ils umans sa trategnan puspè dapli en locals interns.

Actualmain stat natiralmain en il center l'ulteriura intensivaziun da la campagna da vaccinaziun. La Svizra ed il Grischun han ina da las quotas da vaccinaziun las pli bassas dals pajais/da las regiuns dal vest. Ultra da metter la paisa sin novas vaccinaziuns vali però er da proteger quellas persunas che na pon betg sa laschar vaccinar (en spezial uffants sut 12 onns) e quellas, tar las qualas la protecziun da la vaccinaziun sa reducescha (persunas pli veglias ch'èn vegnidas vaccinadas il cumenzament da l'onn). Plinavant stoi vegnir impedì urgentamain ch'il sistem da sanadad vegnia surchargià.

Cun in sguard sin questa situaziun da partenza tschenta la fracziun da la PS las suandantas dumondas:

  1. La varianta delta vegn transmessa decisivamain tras erosols. Dar regularmain aria en las scolas è sa mussà sco favuraivel ed efficazi. È la Regenza pronta d'equipar tut las stanzas da scola en il chantun cun apparats da mesiraziun da CO2?
  2. Ils teams da vaccinaziun mobils èn sa cumprovads cleramain il cumenzament da l'onn en chasas da persunas attempadas e da tgira. Quest proceder duess er vegnir applitgà per giuvenils. La quota da vaccinaziun – malgrà ina clera recumandaziun da sa laschar vaccinar – è fitg bassa en spezial tar ils giuvenils tranter 12 e 20 onns. È la Regenza pronta da porscher a tut ils giuvenils a partir da 12 onns ina pussaivladad da sa laschar vaccinar directamain al lieu (stgalim superiur, gimnasi, scola professiunala e.u.v.)?
  3. Nagin na sa giavischa puspè in lockdown durant l'enviern. Cun il certificat COVID stat ussa a disposiziun ina alternativa reala per far funcziunar la vita sociala, senza chatschar si l'incidenza. En pajais vischins vegn il certificat COVID applitgà cun success en moda bler pli extendida ch'en Svizra. È la Regenza pronta d'extender l'applicaziun dal certificat COVID en il Grischun, sch'ils dumbers da cas creschan vinavant?
  4. Ha er la Regenza tema ch'ina incidenza fitg auta en il Grischun durant l'enviern pudess chaschunar che tscherts turists da l'exteriur vegnan a renunziar da far vacanzas da skis en il Grischun ord ponderaziuns da ristga?

Cuira, ils 25 d'avust 2021

Caviezel (Cuira), Horrer, Spadarotto,Atanes, Baselgia-Brunner, Cahenzli-Philipp, Cantieni, Degiacomi, Gartmann-Albin, Hofmann, Müller (Favugn), Noi-Togni, Perl, Preisig, Rutishauser, Schwärzel, Wilhelm, Tomaschett (Cuira)

Resposta da la regenza

Per cumenzar stoi vegnir menziunà ch'i èn cumprovads actualmain uschè blers cas activs en il chantun Grischun sco durant ils dis extrems da l'emprima e da la segunda unda. Quella giada è la Svizra ida en il "lockdown" resp. per part en in "lockdown". La finamira da la Regenza è quella d'evitar in ulteriur lockdown. Il med il pli efficazi è la vaccinaziun. Bundant la mesadad da la populaziun grischuna è vaccinada. I vegn fatg tut per pudair vaccinar vinavant uschè bleras persunas sco pussaivel che vulan sa laschar vaccinar e per pudair far quai en moda uschè simpla sco pussaivel. Per prevegnir ad ina surchargia dals manaschis dals fatgs da sanadad ed en spezial da lur persunal ston tuttina vegnir examinadas ed eventualmain prendidas ulteriuras mesiras.

Tar la dumonda 1: En cunvegnientscha tranter il Departament d'educaziun, cultura e protecziun da l'ambient e l'Uffizi da sanadad è actualmain vegnì lantschà in project da pilot cun apparat da mesiraziun da CO2. La finamira dal project da pilot è quella da cumprovar il connex tranter la chargia da CO2 en la stanza da scola ed il dumber da las infecziuns. Quest connex n'è fin ussa anc betg vegnì analisà resp. cumprovà empiricamain per surfatschas grondas. Sch'i gartegia da cumprovar in connex vegni decidì, sch'i duai vegnir recumandà a las scolas d'acquistar tals apparats. Tut las scolas èn vegnidas e vegnan rendidas attentas a l'effect e cun quai a l'impurtanza da dar regularmain aria. Er da vart da la Confederaziun è questa recumandaziun vegnida communitgada repetidamain per tut ils locals interiurs.

Tar la dumonda 2: Actualmain èn vaccinads cumplettamain 45 % da las persunas da la gruppa da vegliadetgna 20 fin 29 onns, 52 % da la gruppa da vegliadetgna 30 fin 39, tranter 62 e 79 % en las classas da vegliadetgna 40 fin 69 e bundant 90 % en las classas da vegliadetgna sur 70 onns.

Grazia a las experientschas positivas cun las purschidas walk-in vegnan talas gia offridas dals centers da vaccinaziun en tut il chantun. Dapi ils 23 d'avust 2021 circulescha – en las regiuns – il bus da vaccinaziun ch'è vegnì lantschà en collavuraziun cun AutoDaPosta Grischun. En il bus da vaccinaziun vegnan purschidas gratuitamain e senza preannunzia cussegliaziuns da vaccinaziun e vaccinaziuns cunter il coronavirus. Quai en spezial en quellas regiuns che n'èn betg en vischinanza directa d'in center da vaccinaziun. Grazia ad in team da vaccinaziun mobil vegn purschida a manaschis ed a scolas ultra da quai la pussaivladad da sa laschar vaccinar al lieu, premess ch'in dumber suffizient da persunas che vulan sa laschar vaccinar è avant maun.  La finala duain er las persunas che appartegnan a gruppas marginalas vegnir cuntanschidas pli bain per las porscher la vaccinaziun.

Fin ussa èn la Scola spezialisada superiura da pedagogia sociala, la Scola auta da teologia Cuira, la Scola auta spezialisada dal Grischun, la Scola auta da pedagogia dal Grischun, la Scola professiunala d'economia Cuira, la Scola professiunala artisanala Cuira, la Scola media svizra alpina Tavau, la Scola media evangelica Schiers (qua ha la vaccinaziun gì lieu ils 25 d'avust 2021 en il Center da vaccinaziun Schiers), la Scola d'hotellaria Passugg ed il Lyceum Alpinum Zuoz annunziads per la vaccinaziun. I vegn examinà en il cas singul, sche la vaccinaziun duai vegnir realisada en in center da vaccinaziun, en il bus da vaccinaziun u tras il team da vaccinaziun mobil. Tut tenor la dumonda stoi vegnir examinà d'integrar la media u il medi da scola. Tar la vaccinaziun dals uffants èsi central d'infurmar ils geniturs ad ura. La Scola media evangelica Schiers ha tramess il fegl d'infurmaziun e da scleriment als geniturs in'emna avant il termin da vaccinaziun. Fin ils 25 d'avust 2021 èn sa laschads vaccinar 4 383 uffants e giuvenils da la gruppa da vegliadetgna 12 fin 19 onns (12 onns: 178 = 10 %, 13 onns: 274 = 16 %, 14 onns: 262 = 15 %, 15 onns: 413 = 24 %, 16 onns: 734 = 40 %, 17 onns: 753 = 41 %, 18 onns: 830 = 43 %, 19 onns: 939 = 49 %).

Tar la dumonda 3: Actualmain vegn fatga la procedura da consultaziun areguard l'introducziun da l'obligaziun da disponer d'in certificat per locals interiurs. Sin basa da las experientschas ch'èn vegnidas fatgas durant las consultaziuns passadas da la Confederaziun stoi vegnir fatg quint che l'obligaziun da disponer d'in certificat per locals interiurs vegnia introducida en tut la Svizra. En la consultaziun s'engascha il chantun Grischun  per in'obligaziun da disponer d'in certificat per tut ils secturs da la vita economica e sociala. Per proteger il sistem da sanadad en moda svelta ed efficazia e per impedir in ulteriur lockdown na dastga l'obligaziun da disponer d'in certificat betg sa restrenscher a tschertas spartas ed a tschertas branschas, per las qualas i n'è dal rest betg sclerì dal tuttafatg, sch'ellas èn propi las acceleraturas da la pandemia.

Sche l'obligaziun da disponer d'in certificat na duess – cunter tuttas aspectativas – betg vegnir introducida da la Confederaziun, examinescha il chantun Grischun d'introducir l'obligaziun da disponer d'in certificat per sias instituziuns dals fatgs da sanadad. In'obligaziun da disponer d'in certificat che va pli lunsch duai eventualmain vegnir coordinada cun ils ulteriurs chantuns da la Svizra orientala.

Tar la dumonda 4: Ina incidenza bassa è en mintga cas, pia er per il turissem, meglra ch'ina auta.La Regenza è er da quest avis. La finamira è pia quella da stabilisar la situaziun fin la fin da november/fin il cumenzament da december.

26 d'avust 2021