Navigation

Inhaltsbereich

Dumonda Tomaschett (Breil) concernent las controllas posteriuras da chars annexs fin 3,5 tonnas tras la Controlla da vehichels a motor

Sessiun: 08.12.2021

Ils vehichels admess cun numers d'immatriculaziun èn suttamess ad ina controlla posteriura periodica uffiziala. L'autoritad d'admissiun cloma las possessuras ed ils possessurs a la controlla posteriura. Ella po surdar las controllas posteriuras a manaschis u ad organisaziuns che garanteschan che las controllas vegnian fatgas tenor las prescripziuns.

En l'art. 33 da l'Ordinaziun davart las pretensiuns tecnicas a vehichels stradals (OPTV) èn regladas las controllas posteriuras che valan er per chars annexs.

La controlla posteriura cumpiglia tranter auter ils frains. En vista a la segirezza stradala è l'examinaziun dals frains – che vegn fatga sin il banc da prova dals frains – in dals elements centrals da la controlla posteriura. Per questa controlla duain ils autos da furniziun ed ils chars annexs vegnir preschentads cun 75 pertschient dal pais total ch'è inscrit en il document dal vehichel (pais total minus pais da vid; da quai: 75 pertschient). Sch'il vehichel na vegn betg chargià u vegn chargià memia pauc, n'è l'examinaziun dals frains betg expressiva e la controlla posteriura n'è betg realisabla.

Ils autos da furniziun appartegnan per gronda part a firmas che disponan da l'infrastructura necessaria per chargiar lur vehichels sco giavischà. Chasadas privatas che possedan in char annex èn dentant dependentas da l'agid da terzas varts per emplenir il char annex cun la chargia necessaria. Per quest intent fan persunas privatas – en temps dal Green Deal – kilometers nunnecessaris en chavas da glera u en martgads da construcziun per laschar emplenir il char annex cun glera, cun crappugls u cun palettas sco chargia necessaria. Quai chaschuna custs per chargiar e per stgargiar il char annex. Questa ultima lavur vegn per il solit fatga a maun.

Sch'ina proprietaria privata u in proprietari privat d'in char annex vul per exempel spargnar la via ad ina chava da glera, sto il char annex vegnir emplenì cun in pèr tschients kilos. Quai n'è savens betg realisabel per ina persuna privata. Sch'il char annex na vegn betg emplenì cun la chargia giavischada, na vegn il vehichel betg controllà e la possessura u il possessur vegn tramess a chasa.

La deliberaziun dal Green Deal durant la sessiun d'october 2021 dal Cussegl grond dal Grischun oblighescha il stadi e la popula­ziun da metter en dumonda chaussas dal mintgadi e – sch'il potenzial è avant maun – d'optimar las acziuns.

En quest connex vegnan tschentadas las suandantas dumondas a la Regenza:

  1. Vesa la Regenza ina pussaivladad per metter a disposiziun tar ils posts da controlla da vehichels dal chantun elements pesants, per che las possessuras ed ils possessurs dals vehichels possian chargiar quels sin il char annex resp. en l'auto da furniziun avant la controlla posteriura?
  2. Sche betg: Vesa la Regenza in'autra pussaivladad per metter a disposiziun a la possessura u al possessur dal vehichel la chargia pretendida per la controlla posteriura?
  3. È la Regenza pronta d'examinar, sch'ils bancs da prova dals frains tar ils posts da controlla da vehichels pudessan vegnir cumplettads uschia, ch'ils chars annexs pudessan vegnir tratgs a bass sin il banc da prova cun agid da tschintas da fixaziun e che la chargia sin il char annex pudess vegnir simulada en questa moda per il test dals frains?

Cuira, ils 8 da december 2021

Tomaschett (Breil), Favre Accola, Engler, Berther, Bondolfi, Brunold, Buchli-Mannhart, Caluori, Casty, Casutt-Derungs, Crameri, Danuser, Deplazes (Rabius), Dürler, Ellemunter, Epp, Gugelmann, Jochum, Koch, Kunfermann, Lamprecht, Maissen, Märchy-Caduff, Michael (Donat), Müller (Susch), Niggli-Mathis (Grüsch), Niggli (Samedan), Papa, Sax, Schmid, Schutz, Tanner, Tomaschett-Berther (Trun), Ulber, Widmer (Favugn), Widmer-Spreiter (Cuira), Wieland, Zanetti (Landquart), Brändli Capaul, Conrad-Roner, Fasani-Horath, Stocker

Resposta da la regenza

Tenor l'art. 33 al. 2 lit. c da l'Ordinaziun davart las pretensiuns tecnicas a vehichels stradals (OPTV; CS 741.41) ston chars annexs cun in pais total da passa 0,75 t vegnir controllads per l'emprima giada 5 onns, il pli tard dentant 6 onns suenter l'emprima immatriculaziun, alura suenter 3 onns e silsuenter mintga 2 onns. L'onn 2021 èn vegnids controllads en il Grischun 2765 chars annexs da tal gener. A chaschun da la controlla posteriura periodica uffiziala vegnan tranter auter controllads er ils frains. Tenor l'agiunta 7 cifra 22 OPTV ston chars annexs emplenids e vids cuntanscher ina franada d'almain 50 %. Per che la segirezza da la funcziun e dal manaschi dals frains possia vegnir examinada a chaschun da la controlla posteriura, ston ils camiuns, ils autos da furniziun ed ils chars annexs vegnir preschentads cun almain 75 % dal pais total ch'è inscrit en il document dal vehichel.

Per ch'il viadi a la controlla posteriura necessaria saja uschè curt sco pussaivel, stattan a disposiziun tut en tut nov posts da controlla a las possessuras ed als possessurs da vehichels en il chantun Grischun. Cun questa spessa rait da lieus da controlla vegnan ils basegns da la clientella commerziala sco er privata ademplids optimalmain.

Tar la dumonda 1:Il deposit d'elements pesants per chargiar autos da furniziun e chars annexs sco prescrit, dovra blera plazza. Questa plazza n'è betg avant maun tar ils posts da controlla e na po er betg vegnir stgaffida. Independentamain da quai dovri resursas persunalas ed infrastructuras correspundentas sco plunaders, palettas, material da fixaziun e.u.v. per chargiar e per stgargiar ils autos da furniziun ed ils chars annexs. Per pudair observar il ritmus da controlla prescrit da la lescha sto la disposiziun da las examinaziuns da vehichels esser bain organisada. Per ina controlla posteriura periodica d'in char annex fin 3,5 t stattan a disposiziun 20 minutas. Er sch'igl avess avunda plazza per deponer elements pesants correspundents, n'avessan ils experts da traffic betg il temp per er anc s'occupar da l'infrastructura e per chargiar e stgargiar ils chars annexs.

Tar la dumonda 2: Sco explitgà en la resposta a la dumonda 1 na datti – per plirs motivs – nagina pussaivladad da metter a disposiziun elements pesants correspundents. Differents manaschis spezialisads, chavas da glera u martgads da construcziun mettan a disposiziun elements pesants adattads u ballast per chargiar ils chars annexs sco prescrit. En l'interess da la segirezza dal traffic e dal manaschi ston las possessuras ed ils possessurs dals vehichels acceptar ina tscherta lavur e tscherts custs.

Tar la dumonda 3: Sin il martgà vegnan offrids bancs da prova dals frains cun dispositivs da simulaziun da la chargia, en spezial per vehichels a motor grevs. Per che las axas possian vegnir tratgas cun tschintas da fixaziun fin al pais necessari, sto il banc da prova dals frains esser installà sin in foss da prova ed esser equipà cun ina stadaira. Bain dispona l'Uffizi per il traffic sin via da tals foss als posts da controlla da Cuira e da Samedan. A Cuira n'è il banc da prova dals frains dentant betg montà sin il foss, ed a Samedan stuess vegnir installà in banc da prova dals frains dal tuttafatg nov. Ils ulteriurs set posts da controlla n'han betg in foss da prova. L'Uffizi per il traffic sin via n'ha pia betg l'infrastructura necessaria per remplazzar ils bancs da prova dals frains als posts da controlla tras dispositivs da simulaziun da la chargia. Independentamain da quai dovran controllas che vegnan fatgas cun agid da dispositivs da simulaziun da la chargia, fitg bler temp. Mintga axa sto vegnir tratga cun tschintas da fixaziun fin al pais necessari, sto vegnir controllada e puspè laschada liber. In tal proceder da controlla surpassass il spazi da temp actual per examinar ils autos da furniziun ed ils chars annexs e chaschunass gronds retards. Damai mancan l'infrastructura necessaria sco er las resursas persunalas. 

4 da mars 2022