Dumonda Fasani-Horath concernent la situaziun da las datas ed il monitoring dals parameters da decisiun relevants en il chantun Grischun areguard la politica da corona
Sessiun: 08.12.2021
Corona è ussa gia dapi bun dus onns noss accumpagnader permanent. Ina situaziun ch'i n'ha anc mai dà signifitga sfidas ch'i n'ha anc mai dà. Praticamain la suletta pussaivladad per chapir il fenomen, è in'observaziun empirica dal svilup actual sco er la collecziun e l'evaluaziun sistematica da datas relevantas che pussibiliteschan da tschertgar novas soluziuns e da sviluppar mesiras pli adattadas. Perquai che la Confederaziun deleghescha puspè dapli decisiuns areguard la politica da corona al chantun, fissi util ch'il chantun disponiss d'ina collecziun fidada da datas per ses agir.
La Confederaziun metta a disposiziun datas davart differents secturs parzials. Ellas èn dentant suttamessas a largias e pon mo grevamain vegnir deducidas per las relaziuns en il chantun. En il senn d'ina surveglianza epidemiologica activa èsi la finamira da mesirar l'efficacitad effectiva da la vaccinaziun en la realitad, da pudair excluder effects secundars pervia da la vaccinaziun, da survegliar la cumparsa da novas malsognas e da mesirar l'existenza reala dal coronavirus (chavazzin: segirtad da test). En quest senn pudess il chantun Grischun puspè surpigliar ina rolla da pionier ed ils resultats pudessan er esser nizzaivels per auters chantuns.
Tavau sco lieu da perscrutaziun ha en collavuraziun cun la Scola auta spezialisada dal Grischun (Data-Science) tut las pussaivladads d'evaluar las datas generadas er en il senn d'ina medischina translaziunala.
Perquai dumandain nus la Regenza:
- Tge datas da la Confederaziun stattan a disposiziun a la Regenza?
- Tge datas vegnan eruidas directamain en il Grischun ed annunziadas a la Regenza?
- En tge secturs pudess la Regenza preschentar ina meglra situaziun da datas (p.ex. dumber da las pazientas e dals pazients ospitalisads vaccinads u betg vaccinads, definiziun status da vaccinaziun, test PCR cun sintoms u senza sintoms, evaluaziun da giudicament dal success da differents tractaments cun medicaments, criteris per autopsias e lur evaluaziun)?
- Fiss la Regenza pronta da duvrar meds finanzials per in monitoring sistematic da datas da giudicament relevantas (p.ex. registraziun automatica da parameters sco situaziun da letgs, status da vaccinaziun da tut las pazientas ed ils pazients, midadas significativas da facturs da morbiditad e.u.v.)?
Cuira, ils 8 da december 2021
Fasani-Horath
Resposta da la regenza
Tar la dumonda 1: La Confederaziun metta a disposiziun sin ses dashboard a la publicitad ed uschia er a la Regenza mintga di datas cumplessivas areguard COVID-19 (cf. admin.ch -> Informationen des Bundes zum Coronavirus -> Lage: Zahlen). Questas datas cumpiglian infurmaziuns davart cas confermads en il labor, ospitalisaziuns confermadas en il labor, mortoris confermads en il labor, persunas vaccinadas, capacitads dals ospitals, variantas dal virus e.u.v. Sche pussaivel vegnan las datas deducidas sin plaun chantunal e preschentadas en moda survesaivla.
Ulteriuras infurmaziuns da la Confederaziun survegn la Regenza tras il Servetsch sanitar coordinà (SSC) dal sistem d'infurmaziun e d'acziun (SIA). Il SSC è ina plattafurma d'infurmaziun en l'internet che sustegna ils process da las organisaziuns da la direcziun e d'acziun en il sectur da sanitad en il mintgadi ed en situaziuns spezialas ed extraordinarias. Il SSC porscha funcziunalitads sco survista da las resursas en ils fatgs da sanadad, management da persunas e da pazients, communicaziun ed alarm, survista da las capacitads da recepziun da cas urgents e bleras chaussas dapli. Il SIA registrescha cun il SSC – tenor l'Ordinaziun davart las mesiras per cumbatter cunter l'epidemia da COVID-19 en la situaziun speziala – regularmain las capacitads dals ospitals en general e particularmain en la tgira intensiva. Las infurmaziuns registradas sustegnan il giudicament da la situaziun sin plaun federal e permettan ina gulivaziun regiunala fin naziunala da l'occupaziun dals ospitals.
Tar la dumonda 2: Il chantun eruescha las datas dal ISM (sistem d'annunzia per mal-sognas contagiusas) e publitgescha ellas sin plaun regiunal en in dashboard sin sia pagina d'internet (gr.ch -> Info Coronavirus -> Situaziun actuala & updates). Tut tenor la situaziun ed il basegn vegnan registradas datas supplementaras dals uffizis en lur sectur e messas directamain a disposiziun a la Regenza. Per analisas sur in temp pli lung stattan a disposiziun al chantun er la statistica medicinala dals ospitals en il chantun Grischun.
Tar la dumonda 3: Ina meglieraziun considerabla da la situaziun da las datas fiss ord vista da la Regenza mo pussaivla, sche datas persunalisadas da differents secturs pudessan vegnir colliadas ina cun l'autra (p.ex. status da vaccinaziun cun actas da persunas malsaunas u cun resultats da test e.u.v.). Per motivs da la protecziun da datas è quai dentant scumandà per lescha en Svizra.
Tar la dumonda 4: Na, la Regenza na vesa betg la necessitad d'eruir datas supplementaras.
4 da favrer 2022