Navigation

Inhaltsbereich

Incumbensa da la fracziun da la PLD concernent la realisaziun da la Lescha da polizia tenor la revisiun parziala da l'onn 2018 (emprim sutsegnader Pfäffli)

Sessiun: 27.08.2021

Ils 26-05-2021 ha la Polizia communala da San Murezzan inoltrà al Departament da giustia, segirezza e sanadad (DGSS) ina dumonda da survegnir la cumpetenza da dar multas en chaussa da la Lescha da narcotics (LN) tenor la glista da multas 2. Ils 8-07-2021 ha il DGSS refusà questa dumonda cun la suandanta motivaziun:

«Sut tschertas circumstanzas pon incumbensas da la Polizia chantunala vegnir transferidas en il cas excepziunal per contract e cunter indemnisaziun a las vischnancas. In tal transferiment è fin ussa vegnì fatg exclusivamain a la polizia communala la pli gronda, numnadamain a la Polizia da la citad da Cuira, ed è in'excepziun, er pervia da las structuras creschidas istoricamain. Cun approvar il rapport «Polizia dal Grischun 2015plus» ha la Regenza concludì tranter auter da restar tar il model existent da l'organisaziun poliziala. Quai vul dir ch'i vegn renunzià da stgaffir ina polizia unitara ed uschia er desistì da privar las vischnancas da lur cumpetenzas existentas. Però parta il rapport dal fatg che – cun excepziun da Cuira – las ulteriuras otg vischnancas che han in'atgna polizia vegnian – a vista mesauna – a surdar facultativamain lur incumbensas a la Polizia chantunala. La Regenza vul lura bain er promover questa soluziun da contract, en spezial en il rom da fusiuns da vischnancas e da la regiunalisaziun dincumbensas communalas. Ulteriuras excepziuns analogas a quellas da Cuira n'èn ni planisadas ni existan las premissas necessarias per quai.»

Questa motivaziun stat en ina clera cuntradicziun cun la revisiun parziala da la Lescha da polizia, ch'è vegnida tractada dals 29-08-2018 fin il 1-09-2018 en il Cussegl grond ed alura concludida, ed ignorescha sapientivamain ils votums clers e nets dal represchentant da la Regenza e da differents commembers dal parlament, ch'èn vegnids protocollads en la debatta correspundenta. Uschia è il cusseglier guvernativ cumpetent Rathgeb s'exprimì per il protocol concernent il rapport da polizia 2015, concernent la strategia ed il futur da la Polizia communala sco er concernent sias incumbensas respectivamain cumpetenzas, sco suonda:

«Là avain nus sclerì la dumonda centrala, sche nus vulain lavurar vinavant en il chantun Grischun cun in sistem dual ed avain uschia […] mess giud maisa il tema da la polizia unitara. […] Quai vul dir, nus avain in sistem fin da cumpetenzas ch'èn equilibradas bain tranter il chantun e las vischnancas. Nus empruvain da consolidar quai cun questa revisiun parziala, senza tangar las cumpetenzas da las vischnancas, schizunt anc da las extender in zic ed alura prender soluziuns individualas. […] E nus avain ina regulaziun da basa per alura dar la paisa necessaria als basegns individuals da las vischnancas […] sin plaun d'in contract. E jau sun da l'avis che quai è in model excellent che tegna quint dals basegns dal chantun e da las vischnancas il qual nus cementain cun questa revisiun parziala ed il qual regla tschertas dumondas als puncts da contact. Ma anc ina giada: quests puncts da contact restan natiralmain adina en in chantun che viva quest model dual. Nus vivain quest model, nus al sustegnain cleramain e nus al vulain viver er en l'avegnir (protocol dal Cussegl grond 1/2018/2019, p. 87).»

Medemamain è s'exprimì il president da la cumissiun da quella giada, il deputà Crameri:

«Dal rapport da la polizia […] resorta l'enconuschientscha ch'i duai vegnir renunzià definitivamain d'introducir ina polizia unitara en il chantun Grischun, quai vul dir d'integrar las polizias communalas en la Polizia unitara (protocol dal Cussegl grond 1/2018/2019, p. 80).»

Er concernent la surdada d'incumbensas ha il president da la cumissiun explitgà cleramain:

«Cas cuntrari pon [las vischnancas] ademplir sezzas incumbensas dal chantun. Per quest intent dovran ellas però ina basa contractuala cun il chantun tenor l'art. 5 al. 3 e 4. […] Ils obstachels per surpigliar incumbensas chantunalas sco talas tras las vischnancas na dastgan betg esser memia auts. Ord vista da las vischnancas vegn spetgada ina tscherta bainvulientscha da vart dal chantun (protocol dal Cussegl grond 1/2018/2019, p. 90).»

Sut quest aspect vegn la Regenza incumbensada da procurar ch'il DGSS sa distanzieschia d'ina interpretaziun inexacta dal rapport "Polizia grischuna 2015", che la revisiun parziala da la Lescha da polizia da l'onn 2018 vegnia exequida ed applitgada correctamain e che las opiniuns respectivas e las incumbensas correspundentas da la legislativa dal chantun Grischun na vegnian betg ignoradas vinavant, mabain acceptadas e realisadas.

Cuira, ils 27 d'avust 2021

Pfäffli, Marti, Michael (Castasegna), Alig, Bigliel, Censi, Claus, Engler, Felix, Flütsch, Giacomelli, Hartmann-Conrad, Hitz-Rusch, Hohl, Holzinger-Loretz, Jenny, Jochum, Kasper, Kienz, Kunz (Cuira), Kuoni, Loi, Mittner, Natter, Niggli (Samedan), Papa, Rüegg, Schutz, Stiffler, Thomann-Frank, Thür-Suter, Valär, Waidacher, Weidmann, Wellig, Wieland

Resposta da la regenza

L'art. 4 al. 6 da la Lescha da polizia (LPol; DG 613.000) cuntegna in sustegn explicit per la collavuraziun tranter la Polizia chantunala e las vischnancas e pia in sustegn per il sistem dual. Per in sistem dual dovri dentant diversas repartiziuns da las incumbensas. La cunfinaziun da questas incumbensas chaschuna la finala adina puspè discussiuns. En la debatta dal Cussegl grond (PCG 2018/2019, p. 87) ha la Regenza precisà latiers, che «sche nus vulain però mantegnair quest sistem dual che correspunda er a Vossa voluntad, lura datti cunfins ed ad in tschert punct stuain nus lura trair quest stritg.» Quest sustegn per il sistem dual vala anc adina e tant la Regenza sco er il Departament da giustia, segirezza e sanadad ageschan correspundentamain. Tuttina pon ins leger sin pagina 54 dal rapport «Polizia dal Grischun 2015plus» – ch’è vegnì approvà ils 22 da settember 2015 da la Regenza – ch’i fiss da beneventar, sche las polizias communalas restantas (cun excepziun da la Polizia da la citad da Cuira) pudessan vegnir abolidas a media vista cun soluziuns da contract. Da promover che la Polizia chantunala surpiglia per contract incumbensas da las polizias communalas, correspunda damai a la strategia da la Regenza. La Regenza constatescha pia, ch’il DGSS na fa resp. n’ha fatg naginas interpretaziuns inexactas dal rapport da polizia 2015.

Il stritg menziunà qua survart vegn tratg en spezial là, nua che la basa necessaria manca en il dretg vertent. Sche la basa necessaria na manca percunter betg, ston esser ademplidas las premissas tenor il dretg polizial. Tenor l’art. 5 al. 4 LPol dastgan las cumpetenzas numnadamain mo vegnir delegadas, sche las premissas e las structuras èn dadas per quai. Ultra da quai dovri per ina tala delegaziun – ch’è da reglar cun in contract e che dovra uschia il consentiment dad omaduas partidas – adina raschuns objectivas e raschunaivlas. Ina delegaziun da las incumbensas tenor l'art. 5 al. 4 LPol na datti perquai betg, sch'ina tala delegaziun è incunvegnenta e sche las premissas organisatoricas sco er las premissas persunalas na vegnan betg ademplidas. Sche las incumbensas da la Polizia chantunala vegnan surdadas per contract ad ina polizia communala, sto la Regenza ultra da quai avair en egl la strategia poliziala generala.

Sche vischnancas – sa basond sin l’art. 5 al. 4 LPol – han ina dumonda concreta, per la quala exista la basa necessaria en il dretg vertent, pon ellas drizzar la dumonda al DGSS cun inditgar las explicaziuns correspundentas davart las premissas menziunadas en l’art. 5 al. 4 LPol. Silsuenter examinescha il DGSS la dumonda.

La Regenza constatescha sin basa da las explicaziuns qua survart, che la revisiun parziala da la Lescha da polizia da l'onn 2018 vegn exequida ed applitgada correctamain e che naginas incumbensas correspundentas dal Cussegl grond na vegnan ignoradas.

Sa basond sin questas explicaziuns propona la Regenza al Cussegl grond d'acceptar questa incumbensa ed il medem mument da la stritgar sco liquidada.

27 d’october 2021