La Regenza è s'exprimida gia pliras giadas avertamain a favur da las finamiras inter­naziunalas e naziunalas da la politica da clima e d'energia. A medem temp han il Cussegl grond e la Regenza demussà en differents reguards lur intenziun da vulair prestar contribuziuns per cuntanscher questas finamiras. Elements essenzials da la Strategia d'energia 2050 da la Confederaziun èn tranter auter l'extensiun da la pro­ducziun d'energia regenerabla indigena, sco per exempel er da la fotovoltaica. Per reducir las emissiuns da gas cun effect da serra fin l'onn 2050 a netto nulla, sto – tenor las perspectivas energeticas 2050+ da la Confederaziun – la producziun d'energia dals implants da fotovoltaica vegnir augmentada en tut la Svizra a 34 uras terawatt (TWh). Igl è incontestà che las relaziuns climaticas en il chantun Grischun èn bunas per producir electricitad cun implants da fotovoltaica, cunzunt durant l'en­viern. Il potenzial da cuntanscher buns retgavs cun implants da fotovoltaica vi da e sin infrastructuras existentas è avant maun (cf. stimaziun dal potenzial dal current solar en il Grischun da l'Uffizi per il svilup dal territori [UST] 2014). Ils ultims onns è l'extensiun da la fotovoltaica sa sviluppada fermamain en il chantun. Tant l'obligaziun da producir atgna electricitad, ch'è vegnida introducida en il rom da la revisiun parzia­la da la Lescha d'energia dal chantun Grischun (LEG; DG 820.200; cf. art. 9b), sco er la realisaziun da l'incumbensa Gasser concernent dapli electricitad per il Grischun producida l'enviern cun fotovoltaica, fan effect gia oz.

Cun l'augment annual da circa 8 GWh/a e cun ina producziun totala da var 100 GWh/a è la contribuziun actuala dal Grischun a favur da la Strategia d'energia 2050 en il sectur da la fotovoltaica sin buna via. La cumpart da la fotovoltaica vi da la producziun d'electricitad en il Grischun importa actualmain 1 pertschient. Per motivs da l'utilisaziun spargnusa dal terren e da la prescripziun da schanegiar la cuntrada stoi vegnir prendì en mira ch'ils implants solars vegnian installads en emprima lingia vi da resp. sin edifizis existents ed infrastructuras existentas. Il potenzial da sur­fatschas da var 1150 GWh/a (tenor la stimaziun dal potenzial dal current solar en il Grischun [2014]) tar ils edifizis ed ils stabiliments d'infrastructura existents utilisabels basta per cumenzar cun in'offensiva solara. In'ulteriura promoziun da la producziun d'electricitad cun implants da fotovoltaica è pia pussaivla e raschunaivla tras mesiras adattadas. Questa promoziun po prestar ina contribuziun en il senn da la politica da clima e d'energia chantunala, naziunala ed internaziunala. L'etappa II dal «Plan d'ac­ziun Green Deal» dal chantun Grischun (en quai che suonda: AGD) vegn suttamessa da la Regenza al Cussegl grond previsiblamain l'avrigl 2025 cun ina missiva per la discussiun e per la decisiun. Igl è inditgà d'adattar resp. d'optimar en quest reguard er las basas giuridicas ed ils stimuls finanzials per pussibilitar ina promoziun pli vasta dals implants da fotovoltaica. En quest connex pon er las disposiziuns da la planisa­ziun dal territori ed autras disposiziuns da permissiun che tutgan tar il champ da cum­petenza dal chantun, vegnir concepidas correspundentamain. Da promover ils im­plants da fotovoltaica anc pli svelt sin basa dal dretg chantunal vertent fiss pussaivel unicamain en il rom d'ina adattaziun dal credit d'impegn general brut da 67 milliuns francs. Quest credit ha il Cussegl grond concedì gia en la sessiun d'october 2021 per realisar l'etappa I dal AGD (cf. missiva carnet nr. 4/2021–2022, p. 335). Ord vista actuala na fissi però betg cunvegnent d'augmentar il credit d'impegn general e da mantegnair a medem temp las basas giuridicas chantunalas vertentas.

Per cuntanscher las finamiras è la Regenza plinavant da l'avis che l'offensiva solara dal Grischun stoppia vegnir integrada uschè svelt sco pussaivel en ina strategia d'energia cumplessiva. Questa strategia duai cumpigliar ultra da la fotovoltaica e da la forza idraulica er autras energias regenerablas per producir electricitad. Per avair ina vista cumplessiva duai ella resguardar ultra da quai er ils purtaders d'energia sco er la producziun ed il consum d'energia termica e processuala. Questa strategia cumplessiva duai sa basar sin il Plan directiv chantunal d'energia (che vegn actual­main elavurà) e cuntegnair mesiras e finamiras concretas che duain alura vegnir pre­schentadas al dretg temp al Cussegl grond. Perquai che la situaziun da partenza e las cundiziuns generalas èn differentas, n'èsi betg cunvegnent d'elavurar ina singula strategia concernent la fotovoltaica analogamain a la Strategia concernent la forza idraulica per il chantun Grischun 2022–2050. 

Sa basond sin questas explicaziuns propona la Regenza al Cussegl grond da midar questa incumbensa sco suonda:

En l'etappa II dal «Plan d'acziun Green Deal» ston vegnir lantschadas promoziuns persistentas en il sectur da l'energia solara. En quest connex na ston betg mo vegnir examinads ils stimuls finanzials dal chantun, mabain ston er vegnir optimadas las disposiziuns da la planisaziun dal territori ed ulteriuras disposiziuns da permissiun per implants da fotovoltaica sin plaun chantunal, uschenavant che quai è cunvegnent.

22 da zercladur 2022