Navigation

Inhaltsbereich

Dumonda Natter concernent la realisaziun da la «Strategia concernent il spazi da viver guaud-selvaschina 2021»

Sessiun: 03.09.2022

Ils rapports guaud-selvaschina ch'il chantun elavura cuntinuadamain, mussan cleramain che grondas parts dal guaud grischun han deficits da regiuvinaziun alarmants pervia da populaziuns da selvaschina d'ungla memia grondas. En vista a la midada dal clima è quai spezialmain gravant. La selvaschina d'ungla attatga per gronda part quellas spezias da bostgs indigenas che giogan ina rolla centrala per il guaud da protecziun futur, per exempel l'aviez sco er bostgs da feglia sco il ruver, il tigl e l'ischi.

Sin basa da las valitaziuns monetaras dals donns da selvaschina ch'èn cuntegnidas cas per cas en ils rapports guaud-selvaschina, vegnan stimads ils custs che vegnan a resultar per pudair mantegnair l'effect da protecziun dals guauds grischuns en l'avegnir er sut l'influenza actuala da la selvaschina. Las calculaziuns approximativas che sa basan sin quests fatgs, mussan che las posses­suras ed ils possessurs da guaud sco er il maun public stuessan investir circa ina mesa milliarda francs durant ils proxims 50 onns, e quai betg mo per mesiras per proteger la selvaschina, mabain er per rempars e per mesiras d'urgenza en guauds da protecziun.

En consequenza da questa perspectiva alarmanta ha la Regenza deliberà ils 13 d'avust 2021 la «Strategia concernent il spazi da viver guaud-selvaschina 2021»,https://www.gr.ch/RM/medias/communicaziuns/MMStaka/2021/Seiten/2021081301.aspx. Per pudair cuntanscher las finamiras definidas en questa strategia, vegnan formuladas pliras mesiras. In element central da questas mesiras è la reducziun da las populaziuns da selvaschina d'ungla memia grondas. Quai signifitga ina midada da paradigma en la politica da chatscha. Perquai dovri ina buna infurmaziun da las gruppas d'interess dal guaud e da la chatscha. Ma er en la societad pli vasta sto vegnir promovida la conscienza per la problematica dals donns da selvaschina en il guaud da protecziun, per la necessitad da reducir las populaziuns da selvaschina e per l'impurtanza da la chatscha. La strategia è uschia vegnida preschentada detagliadamain a las proprietarias ed als proprietaris grischuns da guaud gia l'avust 2021 a chaschun da lur radunanza generala.

Per che la strategia haja success èsi damai impurtant, che la reducziun da las populaziuns da selvaschina vegnia

integrada en la planisaziun da chatscha e che questa planisaziun da chatscha vegnia realisada da las chatschadras e
dals chatschaders. Sco ch'ins po leger sut punct 5 da l'introducziun a las Prescripziuns da chatscha 2022, https://www.gr.ch/DE/institutionen/verwaltung/diem/ajf/recht/Documents/JBV%202022_dt_Web.pdf, vegn gia quest onn – sin dumonda da la radunanza da delegadas e da delegads da l'Uniun grischuna da chatschaders da patenta UGCP – limitada la durada da la chatscha speziala da tschiervs per regiun a maximalmain 10 mezs dis il november ed il december, quai vul dir che questa durada vegn anc ina giada reducida en cumparegliaziun cun l'onn precedent. Ina chatscha che dura pli ditg vegn permessa exclusivamain sin surfatschas problematicas da guaud-selvaschina. En quest connex stoi dentant vegnir considerà, ch'il tschierv ha in cumportament spezialmain mobil areguard il territori ed areguard il temp. Uschia datti per exempel donns che vegnan chaschunads d'animals che immigreschan da las regiuns da tschiervs vischinas. La chatscha da tschiervs duess perquai vegnir realisada sur tut las regiuns e per ina durada suffizienta.

Las sutsegnadras ed ils sutsegnaders tschentan las suandantas dumondas a la Regenza:

  1. En tge furma ha il chantun infurmà – ultra da las possessuras e dals possessurs da guaud – er las chatschadras ed ils chatschaders e la vasta publicitad davart la nova «Strategia concernent il spazi da viver guaud-selvaschina 2021», en spezial davart la necessitad da reducir las populaziuns da selvaschina, e co vegn questa circulaziun d'infurmaziuns garantida en l'avegnir?
  2. Na vesa la Regenza nagina cuntradicziun envers la «Strategia concernent il spazi da viver guaud-selvaschina 2021», sch'ella reducescha la durada da la chatscha speziala da tschiervs?
  3. Co resguarda la Regenza la migraziun dals tschiervs che variescha temporalmain durant la chatscha dal november e december, per ch'ils plans da prelevaziun possian vegnir ademplids confurm a la «Strategia concernent il spazi da viver guaud-selvaschina 2021»?

Cuira, ils 3 da settember 2022

Natter, Kreiliger, von Ballmoos, Altmann, Atanes, Bachmann, Bardill, Baselgia-Brunner, Bavier, Berther, Berweger, Biert, Bischof, Bleuler-Jenny, Cahenzli (Trin Mulin), Cahenzli-Philipp (Vaz Sut), Censi, Danuser (Cuira), Danuser (Cazas), Degiacomi, Della Cà, Epp, Gredig, Hartmann, Hoch, Hohl, Jochum, Kaiser, Kappeler, Kienz, Kohler, Lamprecht, Loepfe, Maissen, Mazzetta, Michael (Donat), Mittner, Nicolay, Oesch, Perl, Preisig, Rageth, Rodigari, Rusch Nigg, Rutishauser, Sax, Schutz, Walser, Wieland, Wilhelm, Zanetti (Landquart)

Resposta da la regenza

La «Strategia concernent il spazi da viver guaud-selvaschina 2021» è l'element da basa per meglierar en etappas fin l'onn 2035 la situaziun da guaud-selvaschina en il chantun Grischun. Cun la reducziun resp. la regulaziun da las populaziuns da sel­vaschina sto la chatscha prestar ina contribuziun impurtanta per cuntanscher las finamiras. Il svilup da las populaziuns da primavaira dals ultims 3 onns (2020–2022) mussa, che la midada da tendenza ha cumenzà e che la populaziun da tschiervs en il chantun sa diminuescha. Che las finamiras da chatscha tenor la Strategia concer­nent il spazi da viver guaud-selvaschina vegnian cuntanschidas, ha vinavant gronda prioritad per l'Uffizi da chatscha e pestga (UCP). Mo cun la regulaziun da la popula­ziun da selvaschina tras la chatscha na pon ils problems da guaud-selvaschina den­tant betg vegnir schliads. Igl è cumprovà ch'igl èn decisivas e necessarias er mesiras selviculturalas e la garanzia per spazis da viver adattads e senza disturbis per me­glierar la situaziun guaud-selvaschina.

Tar la dumonda 1: La «Strategia concernent il spazi da viver guaud-selvaschina 2021» è vegnida communitgada cun ina communicaziun a las medias. Il UCP orien­tescha regularmain la vasta publicitad e las chatschadras ed ils chatschaders en communicaziuns a las medias, en contribuziuns spezialisadas e referats davart temas da la chatscha. Actualmain lavuran l'Uffizi da guaud e privels da la natira (UGP) ed il UCP cun sustegn extern vi dad in concept da communicaziun unitar per garantir a lunga vista la circulaziun da las infurmaziuns. Ultra dal chantun han er las vischnancas sco proprietarias da guaud ina funcziun impurtanta betg mo per sensi­bilisar la populaziun, mabain er per proteger en moda proactiva il guaud.

Tar la dumonda 2: La valur directiva da 10 dis chatscha speziala cun la pussaivladad da prolungar quella localmain en territoris da problems guaud-selvaschina è raschu­naivla ord vista da la biologia da selvaschina, da la protecziun dals animals e da la planisaziun da la chatscha e stat en concordanza cun la «Strategia concernent il spazi da viver guaud-selvaschina 2021». Ina vasta prolungaziun da la chatscha sen­za resguard sin las cundiziuns externas influenzescha percunter l'aut standard etic, ecologic e da la protecziun dals animals da la chatscha grischuna e stat uschia er en cuntradicziun cun la strategia (cun la segunda finamira principala). Ina prolungaziun generala da la chatscha speziala, sco quai ch'ella era vegnida fixada l'onn 2021, ha ultra da quai mussà, ch'ina tala prolungaziun na chaschuna betg mo gronds disturbis sproporziunads en ils spazis da viver d'enviern, mabain ch'ina tala prolungaziun frun­ta er tar las chatschadras ed ils chatschaders sin malchapientscha. Ultra da quai maina ella las chatschadras ed ils chatschaders als cunfins da lur capacitad da pre­staziun. Quai ha demussà er la preda modesta suenter il 10avel di da chatscha. Per cuntanscher las finamiras da chatscha a vista mesauna fin lunga èsi decisiv, che las chatschadras ed ils chatschaders èn persvadids da las mesiras da chatscha e che la realisaziun è er realistica.

Tar la dumonda 3: La migraziun dals tschiervs è ina gronda sfida per la planisaziun da la chatscha en il Grischun. Durant onns cun solits moviments da migraziun func­ziuna la chatscha speziala fitg bain ed ils plans da prelevaziun pon vegnir ademplids en moda effizienta, suenter l'immigraziun dals tschiervs en ils quartiers d'enviern. Tut tenor situaziun da l'aura u da la situaziun dals animals da rapina gronds poi esser, ch'ils tschiervs migreschan pir suenter ils 20 da december u insumma betg en lur quartiers d'enviern. Per ch'els na mitschian tuttina betg dal squitsch da chatscha e per ch'ils plans da prelevaziun vegnian ademplids, vegn il cumenzament da la cha­tscha speziala fixà decisivamain tras il status dals moviments da migraziun ed adattà a las cundiziuns meteorologicas. La flexibilitad necessaria per quest intent vegn concedida al departament specific tras la legislaziun chantunala da chatscha.

28 d'october 2022