Navigation

Inhaltsbereich

Incumbensa Michael (Donat) concernent l'applicaziun da la clausula generala da polizia per allontanar il triep dal Beverin sco er tut ils lufs che han in cumportament problematic e che impedeschan ina coexistenza

Sessiun: 03.09.2022

Tenor las infurmaziuns da l'Uffizi da chatscha e pestga (UCP) dals 24-08-2022 èn las suandantas stgarpadas d'animals da niz d'attribuir al triep dal Beverin, malgrà che las muntaneras eran protegidas:

  • 2019: 32 nursas, 16 chauras, 29 ulteriuras nursas sparidas
  • 2020: 43 nursas stgarpadas sin la Stutzalp, 1 asen mort, 1 vadè mort
  • 2021: 28 nursas mortas, 3 asens blessads, 5 bovids blessads e 2 bovids morts
  • 2022: 2 vatgas-mamma, 3 attatgas sin arments (senza blessuras), 5 nursas blessadas e 69 nursas mortas

Ultra da las stgarpadas d'animals da niz hai dà ils suandants inscunters problematics cun umans:

  • 25-03-21: Il luf è restà per pli ditg en la vischinanza directa dal vitg da Nufenen ed ha pudì vegnir stgatschà mo, perquai ch'il guardiaselvaschina ha dà in culp d'avertiment.
  • 11-08-21 e 17-08-21, Alp digl Oberst: Inscunter cun ina pastura. Tar l'emprim inscunter han ils lufs mussà in cumporta­ment da smanatscha. Tar il segund inscunter han els empruvà da tschiffar il chaun pastur.
  • 27-08-21: Inscunter a curta distanza tranter dus turists ed il triep da lufs durant ina spassegiada a la Alperschällilucka. Quatter dals lufs giuvens han apparentamain pudì vegnir stgatschads pir suenter pliras emprovas.
  • 22-09-21: Inscunter tranter in chatschader e plirs lufs a Spleia. Ils lufs èn suandads il chatschader a curta distanza durant pliras minutas. Il di suenter hai dà in nov inscunter.
  • 03-01-22: Inscunter a Dumagns tranter viandants ed in luf ch'è sa trategnì per pli ditg en la vischinanza d'umans e che n'è betg sa laschà stgatschar. Suenter è il luf s'allontanà mo plaunet.

Sin basa da la Lescha e da l'Ordinaziun federala da chatscha ha la surveglianza da chatscha sajettà l'onn 2019 quatter lufs giuvens, l'onn 2021 trais lufs giuvens e l'onn 2022 dus lufs giuvens da quest triep. Supplementarmain han gì lieu differentas acziuns da spaventar ils lufs. Las mesiras prendidas, sco las spaventadas u las sajettadas da lufs giuvens, n'han betg mussà l'effect giavischà e n'èn betg chapaivlas per las persunas pertutgadas.

Ils problems cun ils lufs s'augmentan en tut il chantun. En spezial en il Partenz, en l'Engiadina Bassa, en la Surselva ed en il Mesauc n'è la coexistenza tranter il luf e la cultivaziun dal territori da muntogna betg pli dada. Quai da maniera sumeglianta sco en la regiun Viamala. Causa las grondas suffrientschas per il muvel da niz na vegnan las alps betg pli chargiadas u vegnan stgargiadas pli baud pervia da la preschientscha dal luf. Sche las alps na vegnan betg pli chargiadas, è quai ina perdita da proprietad. Plinavant han bleras puras e bleras purs sco er ina gronda part dal persunal d'alp problems psichics pervia da la preschientscha dal luf e pervia da las consequenzas da tala. Uschia èn differents bains giuridics, sco il corp, la vita, la sanadad u la proprietad, periclitads e per part gia pers. Las pussaivladads da la legislaziun vertenta da proteger ils bains che dovran protecziun èn inefficazias (guardar exempel dal triep dal Beverin). Sch'i manca ina basa giuridica per proteger ils bains che dovran protecziun, pon ins recurrer a la clausula generala da polizia.

Al fatg che bains che dovran protecziun van a perder pervia da lufs cun in cumportament problematic, stoi vegnir fatg frunt cun tut ils meds existents. Perquai pretendan las sutsegnadras ed ils sutsegnaders da la Regenza ch'ils suandants lufs en il chantun Grischun vegnian allontanads sin basa da la clausula generala da polizia:

a. l'entir triep dal Beverin,

b. tut ils auters lufs che han in cumportament problematic e che impedeschan ina coexistenza.

Cuira, ils 3 da settember 2022

Michael (Donat), Roffler, Loi, Altmann, Bachmann, Bavier, Beeli, Bergamin, Berther, Bettinaglio, Binkert, Bleuler-Jenny, Brandenburger, Brunold, Bundi, Butzerin, Cahenzli (Trin Mulin), Candrian, Collenberg, Cortesi, Crameri (Surava), Danuser (Cazas), Della Cà, Derungs, Dürler, Epp, Favre Accola, Föhn, Furger, Gansner, Gort, Grass, Hartmann, Hefti, Heini, Hohl, Holzinger-Loretz, Hug, Kasper, Kienz, Koch, Kocher, Kohler, Krättli, Lamprecht, Lehner, Loepfe, Maissen, Mani, Menghini-Inauen, Messmer-Blumer, Metzger, Michael (Castasegna), Mittner, Morf, Natter, Rauch, Righetti, Rüegg, Salis, Sax, Schutz, Sgier, Spagnolatti, Stocker, Tanner, Tomaschett, Ulber, Weber, Widmer, Wieland, Zanetti (Sent), Zanetti (Landquart)

Resposta da la regenza

Tenor l'art. 5 da la Constituziun federala (Cst.; CS 101) è il dretg la basa ed il limit da l'activitad dal stadi. In'excepziun da quest princip è la clausula generala da polizia sco ultima pussaivladad per prevegnir ad in privel imminent. Er sche questa pussaivladad è indispensabla, per ch'il stadi possia agir en moda flexibla e confurm a la situaziun, è ella suttaposta al privel d'abus. Perquai dastga ella vegnir applitgada mo en cas excepziunals absoluts. Tenor la giurisdicziun dal Tribunal federal ston las suandantas premissas esser ademplidas en moda cumulativa: Sco emprim ston esser pertutgads bains protegids fitg elevads (fundamentals) dal stadi u da persunas singulas. Latiers tutgan en spezial la segirezza publica u la protecziun dal corp e da la vita. Sco segund ston quests bains protegids esser exponids ad in privel serius ed imminent che don­negescha cun ina probabilitad adequata quests bains. Quai ston esser donns consi­derabels, betg mo simpels dischavantatgs. Sco terz vegni premess ch'i na dettia na­ginas mesiras legalas adattadas e che quellas na sa laschian – pervia da l'urgenza – er betg crear svelt. E sco quart sto vegnir garantida la commensurabladad en connex cun l'applicaziun da la clausula generala da polizia, en spezial sto quai esser la mesira adequata la pli miaivla.

Tar il punct 1: Ils animals che appartegnan a trieps e che han in cumportament problematic vegnan sajettads en il rom da la regulaziun ch'è fixada explicitamain en la legislaziun federala da chatscha (art. 12 al. 4 da la Lescha federala da chatscha [LChP; CS 922.0] en cumbinaziun cun l'art. 4bis da l'Ordinaziun federala da chatscha [OChP; CS 922.01]). Sco menziunà en l'intervenziun sezza han gia plirs lufs dal triep dal Beverin pudì vegnir sajettads sin fundament da questa basa legala, er pervia dal causal da la periclitaziun considerabla d'umans. Perquai ch'igl è reglà tras lescha, co ch'ins sto proceder, sche animals da trieps pericliteschan considerablamain umans u chaschunan donns, n'èsi – ord vista giuridica – strusch pussaivel d'applitgar la clau­sula generala da polizia. En spezial na porscha ella sut circumstanzas regularas nagina pussaivladad da sajettar in entir triep.

Tar il punct 2: Cuntrari ad animals da trieps n'exista nagina regulaziun legala explicita areguard il tractament da singuls lufs cun in cumportament problematic. En la lescha exista pia ina largia che pussibilitescha al chantun da sajettar singuls lufs sin basa da la clausula generala da polizia per mantegnair la segirezza publica. Da questa pussai­vladad ha il chantun fatg diever il cumenzament da quest onn, cura ch'el ha sajettà sisum la Surselva in luf cun in cumportament problematic. En quest connex han ins stuì agir svelt, perquai ch'igl aveva dà paucs dis avant in inscunter privlus tranter il luf ed ina persuna. Quai, suenter ch'ins aveva observà durant in temp pli lung ina man­canza da timiditad sco consequenza d'in process d'endisada respectivamain sco consequenza d'in svilup disfavuraivel dal cumportament dal luf envers ils umans. Sche las premissas èn ademplidas – vul dir en cas d'urgenza ed en cas, nua che bains giuridics fundamentals èn exponids ad in privel serius ed imminent che na sa lascha betg prevegnir autramain – vegn il chantun a far diever er en l'avegnir da questa basa giuridica substitutiva. I sto dentant vegnir menziunà che lufs dastgan vegnir sajettads cun agid da la clausula generala da polizia mo sco ultim med, sche tut las mesiras pli miaivlas han disditg.

Il svilup actual dal luf fa quitads als posts chantunals cumpetents ed è ina gronda sfida per tut las parts participadas. Il chantun ed ils posts da servetsch cumpetents han dapi onns la medema tenuta: Ils chantuns ston avair la pussaivladad da regular la populaziun da lufs analogamain ad autras spezias d'animals selvadis, avant ch'i dat donns. Per quest intent dovri las basas giuridicas necessarias. Il project da re­visiun inizià va en la dretga direcziun. Independentamain da quai è la Regenza den­tant vinavant pronta d'applitgar la clausula generala da polizia, sche las premissas giuridicas èn ademplidas. Sa basond sin questas explicaziuns propona la Regenza al Cussegl grond da midar l'incumbensa qua avant maun sco suonda:

La Regenza sustegna il project inizià per la revisiun da la LChP, cun la finamira da regular la populaziun da lufs analogamain ad autras spezias d'animals selvadis. Sa basond sin la clausula generala da polizia sajetta il chantun vinavant lufs, sche las premissas èn ademplidas.

28 d'october 2022